.jpg)
បុគ្គលិកកំពុងបញ្ជាការលើកដាក់ទូកុងតឺន័រនៅចំណតផែថ្មីនៃកំពង់ផែភ្នំពេញនាពេលកន្លងមក។ ហុង មិនា
ភ្នំពេញៈ វិស័យដឹកជញ្ជូនរបស់កម្ពុជាជាមួយនឹងប្រទេស ចិន បានមើលឃើញពីការធ្លាក់ចុះចាប់តាំងពីការផ្ទុះឡើងនៃវីរុស Covid-19។ នេះបើយោងតាមប្រធានសមាគមភ្នាក់ងារបញ្ជូនទំនិញកម្ពុជា។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបានប្រាប់ភ្នំពេញ ប៉ុស្តិ៍កាលពីថ្ងៃព្រហស្បតិ៍ថា ដោយសារកម្ពុជាមានទំនាក់ទំនងពាណិជ្ជកម្មច្រើនជាមួយប្រទេសចិន ហេតុនេះនៅពេលចិនមានបញ្ហា វិស័យដឹកជញ្ជូនទំនិញនៅកម្ពុជាក៏រងផលប៉ះពាល់ដែរ។ លោកបានថ្លែងថា៖ «ឥឡូវនេះវិស័យដឹកជញ្ជូនកំពុងមានផលប៉ះពាល់ខ្លាំង ដែលធ្វើប្រាក់ចំណូលពីវិស័យនេះធ្លាក់ចុះជាបន្តបន្ទាប់»។
លោកបានបន្តថា វិស័យដឹកជញ្ជូននៅកម្ពុជាបានធ្លាក់ចុះចាប់តាំងពីអំឡុងបុណ្យចូលឆ្នាំចិនមក ដោយសកម្មភាពនៃការដឹកទំនិញពីប្រទេសចិនមកកម្ពុជាបានធ្លាក់ចុះប្រមាណជិត ៥០ ភាគរយ ចំណែកការដឹកជញ្ជូនទំនិញទៅចិនបានធ្លាក់ចុះពីជិត ៤០ ភាគរយ បើធៀបនឹងមុនចូលឆ្នាំចិន ឬមុនការផ្ទុះនៃវីរុស Covid-19។
ទោះយ៉ាងនេះក្តីសកម្មភាពនៃការដឹកជញ្ជូនជាមួយប្រទេសផ្សេងទៀតហាក់មិនមានការប្រែប្រួលនោះទេ។
លោកបន្តថា៖ «ជារៀងរាល់ឆ្នាំសកម្មភាពនៃការដឹកជញ្ជូនរវាងកម្ពុជា និងចិន អាចមានការធ្លាក់ចុះខ្លះនៅអំឡុងពេលចូលឆ្នាំចិន តែវាតែងប្រសើរឡើងវិញបន្ទាប់ពីពិធីបុណ្យរួចរាល់ ១ សប្តាហ៍ ប៉ុន្តែពេលនេះទោះបីជាពិធីបុណ្យបានកន្លងផុតទៅ ៣-៤ សប្តាហ៍ហើយក៏ដោយ ក៏វានៅមិនទាន់បង្ហាញសញ្ញាវិជ្ជមានដដែល»។
ទោះយ៉ាងណាលោក ចន្ទី ប្រាប់ថាមិនមានទិន្នន័យពីតម្លៃដែលទទួលបានក្នុងវិស័យដឹកជញ្ជូននាពេលកន្លងមកទេ។
លោកនាយករដ្ឋមន្ត្រី ហ៊ុន សែន បានថ្លែងក្នុងពិធីប្រគល់សញ្ញាបត្រដល់គរុសិស្សនៃវិទ្យាស្ថានជាតិអប់រំកាលពីថ្ងៃអង្គារថា ការព្រួយបារម្ភ និងខ្លាចនៃវីរុសកូរ៉ូណាកំពុងធ្វើឲ្យមានផលប៉ះពាល់យ៉ាងខ្លាំងដល់វិស័យទេសចរណ៍នៅគ្រប់ប្រទេសទូទាំងពិភពលោករាប់ទាំងកម្ពុជាផងដែរ។
លោកបន្តថា ការខ្លាចរអារនេះកំពុងធ្វើឲ្យប៉ះពាល់ដល់សេដ្ឋកិច្ចក្នុងនោះក៏មានវិស័យដឹកជញ្ជូនដែរ។ លោកបានថ្លែងថា៖ «ចំណុចនេះគឺជាចំណុចវាយប្រហារលើបញ្ហាសេដ្ឋកិច្ច ដោយវាយប្រហារដំបូងគេលើសេវាទេសចរណ៍ បន្ទាប់ទៅគឺសេវាកម្មដឹកជញ្ជូន»។
លោក ឃុត សារឿន សហស្ថាបនិក និងជានាយកប្រតិបត្តិក្រុមហ៊ុនដឹកជញ្ជូន SHA Transport Express Co., Ltd បានឲ្យដឹងថា បន្ទាប់ពីការផ្ទុះវីរុស Covid-19 សកម្មភាពនៃការដឹកជញ្ជូនទំនិញរបស់ក្រុមហ៊ុនលោករវាងកម្ពុជា និងចិន អាចមានការធ្លាក់ចុះប្រមាណ ១០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ លោកបន្តថា ការដឹកជញ្ជូននឹងធ្លាក់បន្ថែមទៀត បើរោងចក្រផលិតវត្ថុធាតុដើមនៅប្រទេសចិន និងវៀតណាមដែលត្រូវនាំចូលមកកម្ពុជាបន្តផ្អាកសកម្មភាព។
លោកថ្លែងថា៖ «សកម្មភាពនៃការដឹកជញ្ជូននាពេលនេះមានការធ្លាក់ចុះបន្តិចបន្តួច ដោយវាមិនទាន់ក្លាយជាហានិភ័យសម្រាប់វិស័យដឹកជញ្ជូននៅកម្ពុជាទេ»។
លោកប្រាប់ទៀតថា ទោះយ៉ាងណាលោកសង្ឃឹមថាសកម្មភាពដឹកជញ្ជូននឹងល្អឡើងវិញក្នុងពេលឆាប់ៗ ខណៈមានព័ត៌មានមួយចំនួនបានឲ្យដឹងថា រោងចក្រផលិតវត្ថុធាតុដើមផលិតនៅចិនដែលត្រូវនាំយកមកកម្ពុជាបានចាប់ផ្តើមដំណើរការឡើងវិញខ្លះហើយ។
អនុប្រធានសហព័ន្ធស្រូវអង្ករកម្ពុជាលោក ចាន់ សុខឃាំង បាននិយាយថា សកម្មភាពនៃការដឹកជញ្ជូនទំនិញនៅកម្ពុជាចាប់តាំងពីបុណ្យចូលឆ្នាំចិនអាចមានការធ្លាក់ចុះខ្លះ តែសម្រាប់ការបញ្ជាទិញអង្ករទៅកាន់ទីផ្សារអន្តរជាតិ គឺមិនមានការប្រែប្រួលអ្វីច្រើនទេ ដោយការនាំចេញបានកើនឡើងនៅទីផ្សារអឺរ៉ុប តែមានការធ្លាក់ចុះខ្លះនៅប្រទេស ចិន។
ទោះយ៉ាងណាលោកទទួលស្គាល់ថា វិស័យដឹកជញ្ជូននៅទូទាំងពិភពលោក ពិតជាមានការធ្លាក់ចុះនាពេលនេះ ជាពិសេសទំនិញ ឬផលិតផលដែលផលិត ឬឆ្លងកាត់តាមប្រទេស ចិន។
លោកលើកឡើងថា មូលហេតុដែលធ្វើឲ្យការដឹកជញ្ជូនធ្លាក់ចុះនៅពេលនេះ គឺភាគច្រើនបណ្តាលមកពីការនាំចូលវត្ថុធាតុដើមពីប្រទេស ចិន ត្រូវបានពន្យារពេល ឬផ្អាកដោយសារតែអាជ្ញាធរចិនបានតម្រូវឲ្យផ្អាកសកម្មភាពមួយរយៈដើម្បីទប់ស្កាត់ការរីករាលដាលផ្ទុះឡើងនៃវីរុស Covid-19។ លោកបន្តថា សកម្មភាពនៃការដឹកជញ្ជូនទំនិញអាចនឹងបន្តធ្លាក់ចុះទៀត បើការផ្គត់ផ្គង់វត្ថុធាតុដើមពីប្រទេសចិនមកកម្ពុជានៅតែមានបញ្ហា។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈលោក ហេង សួរ កាលពីសប្តាហ៍មុនបានចែកចាយព័ត៌មានតាមប្រព័ន្ធតេឡេក្រាមថា ក្នុងខែមីនាខាងមុខអាចនឹងមានរោងចក្រកាត់ដេរមួយចំនួននៅកម្ពុជា ព្យួរការងារកម្មករ និងបិទទ្វារមួយរយៈ ដោយសារខ្វះក្រណាត់ដែលជាវត្ថុធាតុដើមចេញពីប្រទេសចិន ខណៈរោងចក្រផលិតក្រណាត់មួយចំនួននៅចិនបានបិទទ្វារចាប់តាំងពីប្រទេសនេះបានផ្ទុះនូវវីរុស Covid-19។
បើតាមលោក សួរ រោងចក្រកាត់ដេរ ១០០ ភាគរយគឺសល់ក្រណាត់ក្នុងស្ដុកសម្រាប់ចង្វាក់ផលិតកម្មរហូតដល់ខែកុម្ភៈនេះរោងចក្រ ៩៥ ភាគរយ អាចសល់ត្រឹមសប្ដាហ៍ទី ២ នៃខែមីនា និង ៩០ ភាគរយ អាចដល់ដំណាច់ខែមីនា៕ LA
