ភ្នំពេញៈ ផលិតផលកសិកម្មកម្ពុជាបានពឹងផ្អែកលើទីផ្សារប្រទេសជិតខាងអស់រយៈពេលជាច្រើនឆ្នាំសម្រាប់ការនាំចេញជាវត្ថុធាតុដើម។
ដំឡូងមីគឺជាផលិតផលកសិកម្មមានសក្ដានុពលរបស់កម្ពុជា ដែលរួមចំណែកដល់ការរកប្រាក់ចំណូលរបស់កសិករ។
ប៉ុន្តែ ឧស្សាហកម្មនេះនឹងមើលឃើញការផ្លាស់ប្តូរ ដោយសារតែក្រុមហ៊ុន Green Leader មានមូលដ្ឋាននៅទីក្រុងហុងកុងបានវិនិយោគ ១៥០ លានដុល្លារលើរោងចក្រកែច្នៃដំឡូងមីនៅក្នុងប្រទេសនេះ ដោយរោងចក្រមួយកំពុងសាងសង់នៅក្នុងខេត្តក្រចេះ។ រោងចក្រដែលចាប់ផ្ដើមដំណើរការសាងសង់ កាលពីខែមេសា គ្រោងនឹងប្រតិបត្តិការត្រឹមចុងឆ្នាំនេះ ហើយនឹងត្រូវការដំឡូងមីប្រហែល ៦០០ ០០០ តោនដើម្បីកែច្នៃ។
អ្នកយកព័ត៌មានភ្នំពេញប៉ុស្តិ៍ បានជួបជាមួយលោក Michael Tse អគ្គនាយកក្រុមហ៊ុននេះ ដើម្បីនិយាយអំពីសក្ដានុពលរបស់ឧស្សាហកម្មដំឡូងមីនៅកម្ពុជា។
ហេតុអ្វីបានជាអ្នកសម្រេចចិត្ត បើករោងចក្រនៅទីនេះ? អ្វីដែលអ្នករំពឹងថា នឹងទទួលបានពីឧស្សាហកម្មនេះ?
ដំឡូងមីគឺជាដំណាំកសិកម្មឈានមុខគេទី ២ នៅកម្ពុជាបន្ទាប់ពីដំណាំស្រូវ។ យោងតាមក្រសួងកសិកម្មផ្ទៃដីដាំដុះប្រហែល ៦០០ ០០០ ហិកតា បច្ចុប្បន្នកំពុងដាំដុះដំឡូងមី ដោយមានការផលិតដំឡូងមីស្រស់ប្រចាំឆ្នាំប្រហែល ១៤ លានតោន។
ប៉ុន្តែ មានរោងចក្រកែច្នៃម្សៅដំឡូងមីមិនដល់ ៧ ទេដែលកំពុងប្រតិបត្តិការនៅពេលបច្ចុប្បន្ន ដូច្នេះភាគច្រើននៃដំឡូងមីស្រស់ ត្រូវបាននាំចេញទៅប្រទេស វៀតណាម និងថៃ ជាវត្ថុធាតុដើមសម្រាប់រោងចក្រកែច្នៃរបស់ពួកគេ។ ហើយកសិករកម្ពុជា ត្រូវបានបង្ខំចិត្តលក់ដំឡូងមីស្រស់របស់ពួកគេឲ្យប្រទេសជិតខាង ដែលប្រឈមនឹងការប្រែប្រួលតម្លៃ និងលក្ខខណ្ឌទីផ្សារមិនមានស្ថិរភាព។
ក្រុមហ៊ុន Green Leader មើលឃើញឱកាសក្នុងការក្លាយជាក្រុមហ៊ុននាំមុខទីផ្សារនៅក្នុងវិស័យដ៏សំខាន់នេះ។ តាមរយៈការបង្កើតរោងចក្រកែច្នៃនេះ យើងអាចប្រើប្រាស់ដំឡូងមីស្រស់ក្នុងបរិមាណច្រើន ដែលបានដាំដុះដោយកសិករ និងកែច្នៃទៅជាម្សៅដំឡូងមី និងម្សៅដំឡូងមីកែច្នៃ ដែលមានតម្រូវការនៅក្នុងបណ្ដាប្រទេសអាស៊ាន និងអឺរ៉ុបផ្សេងទៀត។
ការធ្វើការងារជាមួយកសិកម្ម តាមរយៈផែនការ «ធ្វើកសិកម្មតាមកិច្ចសន្យា» យើងអាចទុកតម្លៃបន្ថែមឲ្យកសិករក្នុងស្រុក តាមរយៈការធានាដល់ពួកគេនូវស្ថិរភាពទីផ្សារ និងតម្លៃទិញព្រមព្រៀងគ្នា។ នេះគឺជាស្ថានភាពឈ្នះឈ្នះ សម្រាប់ទាំងក្រុមហ៊ុន Green Leader ជាវិនិយោគិន និងកសិករក្នុងស្រុក។
តើការវិនិយោគរបស់អ្នក នឹងផ្លាស់ប្តូរឧស្សាហកម្មដែលរងផលប៉ះពាល់រយៈពេលយូរឆ្នាំមកហើយនេះដែរឬទេ? ហើយដោយរបៀបណា?
មានរោងចក្រកែច្នៃនៅក្នុងតំបន់ជាច្រើនដែលដាំដុះដំឡូងមី ក្រុមហ៊ុន Green Leader អាចផ្ដល់ដល់កសិករនូវទីផ្សារប្រកបដោយស្ថិរភាព។ តាមរយៈការធ្វើការងារជាមួយ UNDP ក្រសួងកសិកម្ម និងក្រសួងពាណិជ្ជកម្ម យើងនឹងអភិវឌ្ឍផែនការ «ធ្វើកសិកម្មតាមកិច្ចសន្យា» ជាមួយកសិករ ដើម្បីធានាឲ្យពួកគេអាចលក់ដំឡូងមីស្រស់របស់ពួកគេ ឲ្យរោងចក្ររបស់យើង ដោយតម្លៃការពារអប្បបរមា។
នេះគឺជានយោបាយឈ្នះ-ឈ្នះ សម្រាប់ពួកយើង ដោយសារតែយើងត្រូវការការធានាការផ្គត់ផ្គង់ដំឡូងមីស្រស់ ហើយកសិករអាចលក់ដំឡូងមីស្រស់របស់ពួកគេដោយផ្ទាល់ដល់យើង ដែលចៀសផុតពីឈ្មួញកណ្ដាល ក្នុងការកេងចំណេញតម្លៃលក់។
បញ្ហាប្រឈមគឺជាការអនុវត្តកិច្ចព្រមព្រៀង «ធ្វើកសិកម្មតាមកិច្ចសន្យា» ជាមួយកសិករជាច្រើន។ នេះគឺជាកន្លែងដែលយើងត្រូវការការគាំទ្រ និងបទពិសោធរបស់ UNDP និងស្ថាប័នរដ្ឋាភិបាល ដោយការជួយក្នុងការបង្កើតសមាគមកសិកម្មក្នុងស្រុក។ ការធ្វើកសិកម្មតាមកិច្ចសន្យារបស់យើង អាចត្រូវបានរៀបចំឡើងជាមួយសមាគមកសិកម្មក្នុងស្រុក ដែលងាយស្រួលបំផុតក្នុងការរក្សាទំនាក់ទំនងការងារ។
តើអ្វីជាអត្ថប្រយោជន៍សម្រាប់ប្រជាជន និងកសិករក្នុងស្រុក?
បេសកកម្មរបស់យើងនឹងលើកកម្ពស់ជីវភាពរបស់កសិករក្នុងស្រុកដោយការទិញដំឡូងមីស្រស់របស់ពួកគេ។ ទោះបីជាកសិករក្នុងស្រុក មានដី និងកម្លាំងពលកម្មក៏ដោយ ក៏ពួកគេភាគច្រើនខ្វះប្រាក់ក្នុងការទិញឧបករណ៍កសិកម្ម ដូចជា ត្រាក់ទ័រ ដើម្បីកែលម្អដីរបស់ពួកគេដែរ។ ពួកគេខ្វះប្រាក់ ដើម្បីទិញជី ដូច្នេះ ទិន្នផលដំឡូងមីមិនល្អទេ។
យើងអាចកែលម្អទិន្នផលរបស់ពួកគេ តាមរយៈការផ្ដល់សេវាកសិកម្ម ដូចជាការភ្ជួរដី និងការដាក់ជី ជាឥណទានស្ថិតក្រោមផែនការធ្វើកសិកម្មតាមកិច្ចសន្យា។ ស្ថិតក្រោមផែនការនេះ កសិករ នឹងបង្កើនទិន្នផលដំឡូងមីស្រស់របស់ពួកគេ ដូច្នេះ នឹងអាចរកប្រាក់បានកាន់តែច្រើន បន្ទាប់ពីការកាត់បន្ថយសេវាបន្ថែម និងតម្លៃទំនិញ។
តើក្រុមហ៊ុនរបស់អ្នកអនុវត្តតាមផែនការ ក្នុងការវិនិយោគនៅក្នុងប្រទេសកម្ពុជាដែរឬទេ?
យើងគឺជាក្រុមហ៊ុនចុះបញ្ជីមកពីទីក្រុង ហុងកុង។ ដោយសារតែឈ្មោះក្រុមហ៊ុនរបស់យើង ជាការចង្អុលបង្ហាញថា Green Leader មានបំណងក្នុងការធ្វើជាវិនិយោគិនឈានមុខគេនៅក្នុងវិស័យបៃតង។ យើងប្ដេជ្ញាចិត្តយ៉ាងពេញលេញថា នឹងវិនិយោគនៅក្នុងវិស័យកសិកម្មរបស់កម្ពុជា។ រោងចក្រដំបូងរបស់យើងនៅស្រុកស្នួល មានសមត្ថភាពផលិតម្សៅដំឡូងមី និងម្សៅដំឡូងកែច្នៃប្រចាំឆ្នាំ ១៥០ ០០០ តោន។
ដោយមានការបង្កើត និងការដំណើរការរោងចក្រដំបូងរបស់យើង យើងនឹងចាប់ផ្ដើមសាងសង់រោងចក្របន្ថែមទៀតនៅទីតាំងផ្សេងទៀត ជាមួយនឹងការផ្គត់ផ្គង់ដំឡូងមីស្រស់គ្រប់គ្រាន់។ វាជាផែនការរបស់យើង ក្នុងការបង្កើតរោងចក្រ ៥ នៅក្នុងរយៈពេល ៣ ឆ្នាំក្រោយក្នុងទឹកប្រាក់ ១៥០ លានដុល្លារដែលនឹងផ្ដល់នូវទីផ្សារប្រកបដោយស្ថិរភាពសម្រាប់ដំឡូងមីស្រស់ប្រហែល ៣ លានតោនដល់កសិករក្នុងស្រុក។ យើងមានទំនុកចិត្តថា រោងចក្រកែច្នៃម្សៅដំឡូងមីស្រស់របស់យើង នឹងទទួលបានជោគជ័យ ហើយនឹងនាំយកភាពរីកចម្រើនដល់កសិករកម្ពុជា។
ទីបំផុត យើងសង្ឃឹមថា គំរូភាពជាដៃគូឯកជនសាធារណៈរបស់យើង នឹងបង្ហាញភាពជោគជ័យ និងទាក់ទាញក្រុមវិនិយោគិនបៃតងផ្សេងទៀតដើម្បីចូលរួមនៅក្នុងវិស័យកសិកម្មរបស់កម្ពុជា៕LA