.jpg)
ទេសចរក្នុងស្រុកទស្សនាអង្គរវត្តនាពេលកន្លងមក។ រូបថត រ៉ាហ៊ីម
ភ្នំពេញៈ ធនាគារជាតិនៃកម្ពុជា (NBC) បានឲ្យដឹងថា សេដ្ឋកិច្ចកម្ពុជាបានទទួលរងផលប៉ះពាល់ខ្លាំងនៅឆមាសទី ១ ឆ្នាំនេះ ដោយសារតែផ្ទុះឡើងនៃជំងឺកូវីដ ១៩ ដែលបង្កឲ្យមានការធ្លាក់ចុះយ៉ាងធ្ងន់ធ្ងរនូវសេដ្ឋកិច្ចពិភពលោក ខណៈរដ្ឋាភិបាលបានអះអាងថាសេដ្ឋកិច្ចរបស់ខ្លួននឹងធ្លាក់ចុះអវិជ្ជមាន «-១,៩» ភាគរយក្នុងឆ្នាំនេះ។
លោក ជា ចាន់តូ ទេសាភិបាលធនាគារជាតិនៃកម្ពុជាលើកឡើងក្នុងរបាយការណ៍ប្រចាំឆមាសទី ១ ដែលចេញផ្សាយកាលពីសប្តាហ៍មុនថា ចាប់តាំងពីដើមឆ្នាំ ២០២០ មក ការរីករាលដាលជំងឺកូវីដ១៩ បានធ្វើឲ្យពិភពលោកទាំងមូលជួបប្រទះនឹងវិបត្តិសុខាភិបាលដែលអាចនាំទៅរកវិបតិ្តសេដ្ឋកិច្ចធ្ងន់ធ្ងរជាងវិបត្តិហិរញ្ញវត្ថុសកលកាលពីឆ្នាំ ២០០៨-២០០៩។
លោកបន្ថែមថា កម្ពុជាពិតណាស់មិនអាចគេចផុតពីផលប៉ះពាល់សេដ្ឋកិច្ចដែលកើតចេញពីវិបត្តិនេះឡើយ ដោយវិស័យចម្បងៗដូចជា ទេសចរណ៍ ការនាំចេញ និងការវិនិយោគកំពុងធ្លាក់ចុះខ្លាំង។
លោកអះអាងថា៖ «ថ្វីដ្បិតតែកំណើននៃវិស័យខាងក្រៅធ្លាក់ចុះ កំណើនវិស័យកសិកម្មបានកើនឡើងបន្តិច ហើយវិស័យហិរញ្ញវត្ថុទទួលបានកំណើនវិជ្ជមានផងដែរ ទោះជាមានកម្រិតទាប»។
បើយោងតាមរបាយការណ៍របស់ NBC វិស័យទេសចរណ៍បានទទួលរងផលប៉ះពាល់ធ្ងន់ធ្ងរជាងគេ ដោយភ្ញៀវទេសចរអន្តរជាតិចូលមកកម្ពុជាត្រូវបានប៉ាន់ស្មានថាធ្លាក់ចុះរហូតដល់ «-៥៥» ភាគរយដោយឆ្នាំមុនកើន ១១,២ ភាគរយក្នុងឆមាសទី ១ ឆ្នាំមុន។
ភ្ញៀវទេសចរចិនដែលឈរលំដាប់ទី ១ នៃភ្ញៀវទេសចរសរុបមានសមាមាត្រ ២២,៧ ភាគរយគិតត្រឹម ៤ ខែដើមឆ្នាំ ២០២០ បានធ្លាក់ចុះយ៉ាងគំហុកប្រមាណ -៧១,៤ ភាគរយ។ សម្រាប់វិស័យកម្មន្តសាល ផលិតផលសរុបដែលសម្រេចបានក្នុងវិស័យនេះត្រូវប៉ាន់ស្មានថាធ្លាក់ចុះ«-១១» ភាគរយដែលជាចម្បងដោយសារការរអាក់រអួលនៃការនាំចូលវត្ថុធាតុដើម និងការថយចុះនៃតម្រូវការខាងក្រៅ។
ផលិតផលឧស្សាហកម្មសម្រាប់នាំចេញបានធ្លាក់ចុះ«-១២,៥» ភាគរយ (ក្នុងនោះការនាំចេញសម្លៀកបំពាក់ធ្លាក់ចុះ «-១០» ភាគរយ ស្បែកជើងកើនឡើង ២ ភាគរយ និងទំនិញសម្រាប់ធ្វើដំណើរកើន ៨ ភាគរយ) ខណៈផលិតផលឧស្សាហកម្មសម្រាប់ទីផ្សារក្នុងស្រុកបានកើនឡើង ១៣,២ ភាគរយដោយសារការកើនឡើងនៃការប្រើប្រាស់ផលិតផលក្នុងស្រុក។
កំណើនវិស័យសំណង់មាននិន្នាការថយចុះ ដោយសារការថយចុះនៃតម្រូវការលំនៅឋាន និងការបញ្ចប់គម្រោងសាងសង់មួយចំនួននាពេលកន្លងមកគួបផ្សំនឹងភាពរអាក់រអួលនៃការនាំចូល សម្ភារ និងបរិក្ខារសំណង់ដែលធ្លាក់ចុះប្រមាណ «-១៤» ភាគរយ។ ប៉ុន្តែសំណង់សាធារណៈដូចជា ស្ពាន ថ្នល់ ជាពិសេស ផ្លូវល្បឿនលឿននៅមានសកម្មភាព។
ដោយសារការថមថយគ្រោះធម្មជាតិគួបផ្សំនឹងការកើនឡើងផ្ទៃដីដាំដុះវិស័យកសិកម្មកើនឡើង 0,2 ភាគរយ ដោយទិន្នផលស្រូវកើនឡើង ២១,៧ ភាគរយ ហើយបរិមាណផលកៅស៊ូបានកើនឡើង ៩,២ ភាគរយ។ ផលនេសាទទឹកសាប និងសមុទ្រមានកម្រិតទាបជាងឆ្នាំមុនបន្តិច ខណៈវារីវប្បកម្មបានបន្តកើនឡើងតាមរយៈការចិញ្ចឹមត្រី និង បង្គារ។
យោងតាមលោក ជា ចាន់តូ រហូតត្រឹមចុងឆមាសទី ១ ឆ្នាំនេះការរីករាលដាលជំងឺកូវីដ ១៩ នៅមិនទាន់បង្ហាញសញ្ញាថមថយនៅឡើយទេ ដែលបញ្ហានេះបន្តធ្វើឲ្យសេដ្ឋកិច្ចពិភពលោកប្រឈមនឹងភាពមិនច្បាស់លាស់ខ្លាំង បន្ថែមលើបញ្ហាប្រឈមដែលបាននិងកំពុងកើតមានដូចជា ជម្លោះពាណិជ្ជកម្មរវាងមហាយក្សសេដ្ឋកិច្ចធំទាំងពីរ គឺសហរដ្ឋអាមេរិក និងចិន និងភាពតានតឹងក្នុងភូមិសាស្ត្រនយោបាយ។ល។
«ក្នុងបរិការណ៍នេះសេដ្ឋកិច្ចកម្ពុជាបន្តប្រឈមនឹងហានិភ័យខាងក្រៅដែលមានភាពមិនប្រាកដប្រជាខ្ពស់»៕
