.jpg)
លោក អ៊ិន ចាន់នី ប្រធានសមាគមធនាគារនៅកម្ពុជា ABC និងជាប្រធានអគ្គនាយករបស់ធនាគារ អេស៊ីលីដា។ ហ៊ាន រង្សី
សៀមរាបៈ ប្រធានសមាគមធនាគារនៅកម្ពុជា (ABC) បានអះអាងកាលពីថ្ងៃសុក្រថា វិស័យហិរញ្ញវត្ថុនៅកម្ពុជានឹងមិនប្រឈមនឹងកង្វះសាច់ប្រាក់ដើម្បីផ្តល់កម្ចីដល់សហគ្រាសក្នុងស្រុកសម្រាប់បង្កើនល្បឿនអាជីវកម្មក្នុងការជួយគាំទ្រដល់កំណើនសេដ្ឋកិច្ចឡើយ ទោះបីនៅក្នុងអំឡុងពេលនៃការរីករាលដាលជំងឺកូវីដ ១៩ ក៏ដោយ ហើយថាវិស័យនេះនៅតែស្វាគមន៍ពីប្រភពទុនទាំងក្នុងស្រុក និងក្រៅស្រុក។
លោក អ៊ិន ចាន់នី ប្រធាន ABC និងជាប្រធានអគ្គនាយករបស់ធនាគារ អេស៊ីលីដា បានថ្លែងបែបនេះក្នុងកិច្ចប្រជុំស្ដីពីយុទ្ធសាស្ដ្រអនុវត្ដការងារ ឆ្នាំ ២០២១ នៅខេត្ដសៀមរាបនាព្រឹកថ្ងៃទី ២៩ ខែមករា ដោយលោកលើកឡើងអំពីការចាត់វិធានការដ៏មានប្រសិទ្ធភាព និងទាន់សភាពការណ៍របស់រដ្ឋាភិបាលតាមរយៈធនាគារជាតិនៃកម្ពុជា (NBC) ដែលជានិយតករ បានដាក់ចេញនូវវិធានការបន្ធូរបន្ថយផ្នែកគតិយុត្តដែលអនុញ្ញាតដល់ប្រតិបត្តិករក្នុងវិស័យនេះមានទុនគ្រប់គ្រាន់ និងកាន់តែមានភាពងាយស្រួលក្នុងការរកកម្ចីពីប្រភពទុនបរទេសកាលពីឆ្នាំកន្លងមក។
លោកបានថ្លែងថា៖ «ចំពោះវិស័យធនាគារបានការបន្ធូរបន្ថយផ្នែកនិយតកម្មពីរដ្ឋាភិបាលមានដូចជា ទុនបម្រុងកាតព្វកិច្ច (Capital reserve requirement) ដោយត្រូវបានបន្ធូរពី ១២ ភាគរយមកត្រឹម ៧ ភាគរយគឺមានសារៈសំខាន់ណាស់ដែលធ្វើឱ្យយើងមានសាច់ប្រាក់ទំនេរយកទៅប្រើប្រាស់បន្ថែមទៀតរាប់ពាន់លានដុល្លារបានដាក់បញ្ចូលនៅក្នុងការលូតលាស់ក្នុងឆ្នាំ ២០២០។ មួយទៀតនោះគឺដើមទុនទ្រនាប់ (Capital Conservation Buffer) ដែលបានអនុវត្តហើយក្នុងឆ្នាំ ២០២០ ដែលធនាគារជាតិបានពន្យារពេលដែលធ្វើឱ្យមានសាធនភាព ឬមូលនិធិរាប់ពាន់លានដែរក្នុងការយកមកប្រើប្រាស់»។
លោកបន្ថែមទៀតថា អ្វីដែលកាន់តែពិសេសនោះគឺការបន្ធូរបន្ថយពន្ធកាត់ទុកលើកម្ចីពីបរទេសដែលអនុញ្ញាតឱ្យវិស័យហិរញ្ញវត្ថុកាន់តែមានលទ្ធភាពងាយស្រួលក្នុងការរកប្រភពទុនបន្ថែមពីក្រៅប្រទេស។ លោកបានបញ្ជាក់ថា៖ «ជាការពិតណាស់យើងមិនខ្វះទេមូលនិធិក្នុងប្រទេសកម្ពុជាយើង»។
លោកបន្តថា៖ «មកដល់ពេលនេះគ្មានអ្នកឱ្យខ្ចីនៅក្រៅប្រទេសណាមួយនិយាយថា ការផ្តល់កម្ចីមកកម្ពុជាមានហានិភ័យនោះទេ អ៊ីចឹងយើងនៅតែរកបានច្រើន។ ការណ៍នេះគឺជាសញ្ញាល្អមួយសម្រាប់វិស័យហិរញ្ញវត្ថុក៏ដូចជាវិស័យសេដ្ឋកិច្ចដែរ ព្រោះធនាគារគឺជាឆ្អឹងខ្នងសម្រាប់ទ្រទ្រង់សេដ្ឋកិច្ច ដោយបានគាំទ្រដល់សហគ្រាសតូច និងធំទាំងអស់»។
បើតាមលោក អ៊ិន ចាន់នី ក្នុងឆ្នាំ ២០២១ នេះសម្រាប់ធនាគារអេស៊ីលីដា គ្រោងនឹងបញ្ចេញទុន ៦០០ លានដុល្លារសម្រាប់វិស័យ SMEs។
កាលពីពាក់កណ្ដាលខែមីនា NBC បានចេញវិធានការមួយចំនួនសម្រាប់ធ្វើឱ្យវិស័យហិរញ្ញវត្ថុនៅកម្ពុជាមានភាពល្អប្រសើរ រួមមាន ការកាត់បន្ថយអនុបាតទុនបម្រុងកាតព្វកិច្ច (RRR) លើតុល្យភាពប្រាក់បញ្ញើពី ៨ ភាគរយ មកនៅ ៧ ភាគរយ លើប្រាក់រៀល និង ១២,៥ ភាគរយលើប្រាក់ដុល្លារក្នុងអំឡុងពេល ៦ ខែបន្ទាប់ ការពន្យារពេលលក្ខខណ្ឌតម្រូវទ្រនាប់សន្ទនីយភាពដើមទុន (CCB) ដល់ឆ្នាំ ២០២១ ដែលត្រូវរំពឹងថា នឹងបន្ទាបអត្រាភាពមិនអាចសងបំណុលបាន ខណៈក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ១៩ ខែមករា ក៏បានប្រកាសកាត់បន្ថយពន្ធកាត់ទុកដែលធនាគារ និងគ្រឹះស្ថានមីក្រូហិរញ្ញវត្ថុ ត្រូវបានតម្រូវក្នុងការកាត់ទុកលើការទូទាត់អត្រាការប្រាក់ដែលពួកគេធ្វើឡើងចំពោះធនាគារក្នុងស្រុក និងក្រៅប្រទេស។
ទន្ទឹមនឹងនេះធនាគារិកដែលគ្រប់គ្រងដោយក្រុមហ៊ុន Financial Times Group មានមូលដ្ឋាននៅក្នុងទីក្រុងឡុងដ៍ក៏បានផ្ដល់ពានរង្វាន់ឱ្យលោក ជា ចាន់តូ ទេសាភិបាលធនាគារជាតិនៃកម្ពុជា (NBC) ជាធនាគារិកកណ្ដាលប្រចាំឆ្នាំនៅអាស៊ីប៉ាស៊ីហ្វិក សម្រាប់ភាពជាអ្នកដឹកនាំឆ្នើមក្នុងការដឹកនាំប្រកបដោយជោគជ័យក្នុងពេលលំបាកបំផុតកាលពីឆ្នាំ ២០២០ ដោយសារវិបត្តិជំងឺកូវីដ១៩។
បើយោងតាមរបាយការណ៍ប្រចាំឆ្នាំ NBC ទ្រព្យសកម្មសរុបរបស់ឧស្សាហកម្មហិរញ្ញវត្ថុបានកើនដល់ ៥៩,៤ ពាន់លានដុល្លារកាលពីចុងឆ្នាំមុនកើនឡើង ១៥,៧ ភាគរយធៀបនឹងចុងឆ្នាំ ២០១៩។ កម្ចីក្នុងឧស្សាហកម្មហិរញ្ញវត្ថុប្រទេសកម្ពុជា រួមបញ្ចូលគ្នារវាងធនាគារ និងគ្រឹះស្ថានមីក្រូហិរញ្ញវត្ថុបានកើនឡើង ១៤,៨ ភាគរយដល់ ៣៧,៣ ពាន់លានដុល្លារត្រឹមចុងឆ្នាំមុន ខណៈប្រាក់បញ្ញើកើន ១៥,៤ ភាគរយដល់ ៣៣,៨ ពាន់លានដុល្លារ។
លោក អ៊ិន ចាន់នី បានលើកឡើងថា ជាមួយនឹងកំណើនឥណទាន និងប្រាក់បញ្ញើក្នុងវិស័យហិរញ្ញវត្ថុរង្វង់ពី ១៥ ទៅ ១៦ ភាគរយ គឺជាកំណើនខ្ពស់ជាងគេធៀបនឹងប្រទេសជិតខាង។ លោកបន្តទៀតថា កំណើននេះក៏ជាការដោះស្រាយនូវកង្វល់របស់ដៃគូអភិវឌ្ឍន៍អន្តរជាតិនានាដែលបារម្ភពីការកើនឡើងខ្ពស់របស់វិស័យហិរញ្ញវត្ថុកម្ពុជាកើនជាង ២០ ភាគរយរៀងរាល់ឆ្នាំមុនវិបត្តិសុខាភិបាលនេះ។
លោកថ្លែងថា៖ «ការដែលមានក្នុងកំណើនក្នុងរង្វង់ ១៥ ឬ ១៦ ភាគរយនេះក៏ជាការដោះស្រាយកង្វល់របស់ដៃគូអភិវឌ្ឍន៍ដូចជា ADB, IMF និង World Bank ជាដើម ដូច្នេះនៅពេលយើងមានកំណើនកម្រិតនេះគឺដៃគូអភិវឌ្ឍន៍យើងគាត់ថា យើងអាចទប់ស្កាត់ហានិភ័យបាន»៕ LA
