ភ្នំពេញៈ លោក ជា ចាន់តូ ទេសាភិបាលធនាគារជាតិនៃកម្ពុជា (NBC) បានឲ្យដឹងថា ទោះបីជាការរីករាលដាលជំងឺកូវីដ ១៩ ធ្វើឲ្យថមថយកំណើនសេដ្ឋកិច្ច ដែលកំពុងប៉ះពាល់ដល់វិស័យសំខាន់ៗនៅក្នុងប្រទេសកម្ពុជាក៏ដោយក៏វិស័យហិរញ្ញវត្ថុនៅតែមាននិន្នាការកើនឡើងប្រកបដោយស្ថិរភាព។
ការលើកឡើងបែបនេះបានធ្វើឡើងនៅក្នុងកិច្ចប្រជុំមួយនៅទីស្នាក់ការកណ្ដាលរបស់ NBC នៅភ្នំពេញកាលពីចុងសប្ដាហ៍មុន។
លោក ជា ចាន់តូ បានឲ្យដឹងថា ផលប៉ះពាល់ដោយសារការរាលដាលជំងឺកូវីដ ១៩ បានធ្វើឲ្យសេដ្ឋកិច្ចរបស់ប្រទេសកម្ពុជាធ្លាក់ចុះ ជាពិសេសវិស័យទេសចរណ៍ សម្លៀកបំពាក់ និងស្បែកជើង ទោះយ៉ាងណា វិស័យហិរញ្ញវត្ថុ និងកសិកម្មនៅតែមានកំណើន។
លោកថ្លែងថា៖ «នៅក្នុងវិស័យធនាគារ ធនាគារជាតិនៃកម្ពុជាបានបន្តក្នុងការដាក់ចេញវិធានការជាច្រើនជាបន្តបន្ទាប់ ដើម្បីផ្ដល់ឱកាសសម្រាប់ធនាគារ និងគ្រឹះស្ថានហិរញ្ញវត្ថុទទួលបានសន្ទនីយភាពគ្រប់គ្រាន់ និងលើកទឹកចិត្តដល់ពួកគេរៀបចំឥណទានឡើងវិញក្នុងការជួយសម្រួលដល់ការលំបាកដល់អតិថិជន ដែលទទួលរងផលប៉ះពាល់ដោយជំងឺនេះ»។
កាលពីខែមីនា NBC បានដាក់ចេញនូវវិធានការនានាដែលវិធានការរួមទាំងនេះត្រូវបានប៉ាន់ថាមានទឹកប្រាក់គិតជាឥណទានប្រមាណ ២ ពាន់លានដុល្លារសម្រាប់ផ្តល់លទ្ធភាពដល់គ្រឹះស្ថានហិរញ្ញវត្ថុបន្តផ្តល់ឥណទាន។
ជាមួយគ្នានោះដែរ NBC ក៏បានចេញសារាចរណែនាំដល់គ្រឹះស្ថានហិរញ្ញវត្ថុ ក្នុងការរៀបចំឥណទានឡើងវិញ សម្រាប់វិស័យអាទិភាព ៤ ដូចជា វិស័យកាត់ដេរ សំណង់ ទេសចរណ៍ និងដឹកជញ្ជូន និងឡូជីស្ទិក។
លោក Shin Chang-moo ប្រធានធនាគារ Phnom Penh Commercial Bank Plc បានប្រាប់ភ្នំពេញប៉ុស្ដិ៍ ថា ធនាគារលោកនៅតែរក្សាកំណើនហិរញ្ញវត្ថុរហូតដល់រយៈពេលនេះ។ ដោយទ្រព្យសកម្មសរុបរបស់ធនាគារលោកបានកើនឡើង ៧ ភាគរយ ដោយមិនរាប់បញ្ចូលទឹកប្រាក់ដែលបានមកពីការបោះផ្សាយលក់សញ្ញាប័ណ្ណដែលមានតម្លៃ ១០ លានដុល្លារអាមេរិក ខណៈដែលប្រាក់កម្ចី និងប្រាក់បញ្ញើបានកើនប្រមាណជិត ៧ ភាគរយផងដែរ។
លោកលើកឡើងថា៖ «យើងធ្លាប់ជួបប្រទះនូវស្ថានការណ៍ទីផ្សារបែបនេះពីមុនមក ដូច្នេះការកំណត់ទិសដៅរបស់យើងក៏ត្រូវបានកែតម្រូវ ប៉ុន្តែយើងនឹងកើនឡើងវិញទាំងបរិមាណ និងប្រាក់ចំណេញ ហើយក៏កំពុងអនុវត្តតាមផែនការការវិនិយោគ ដូចជា ការបើកសាខាថ្មី ២ ដែលកំពុងស្ថិតក្នុងដំណើរការសាងសង់ និងអនុម័ត»។
លោកបន្តថា៖ «ជាយោបល់ខ្ញុំផ្ទាល់ ខ្ញុំបានឆ្លងកាត់វិបត្តិហិរញ្ញវត្ថុពិភពលោក ២ រួចមកហើយ។ ក្នុងចំណោមការផ្លាស់ប្តូរជាច្រើន អាទិភាពរបស់យើងគឺការគ្រប់គ្រងសន្ទនីយភាពតាមរយៈការរឹតបន្តឹងការគ្រប់គ្រងទ្រព្យសកម្ម និងលំហូរសាច់ប្រាក់ (ALM) និងការត្រួតពិនិត្យឥណទាន ដែលយើងបន្ថែមចំណាត់ថ្នាក់កាន់តែច្រើនរួមមានការកែតម្រូវលំហូរសាច់ប្រាក់ និងសក្ដានុពលការស្ទុះងើបឡើងវិញជាដើម»។
លោក សាយ សូនី នាយកប្រតិបត្តិរបស់គ្រឹះស្ថានមីក្រូហិរញ្ញវត្ថុប្រាសាក់ ក៏បានរាយការណ៍អំពីកំណើនពីអាជីវកម្មក្នុងអំឡុងពេលវេលាដ៏ពិបាកនេះផងដែរ។ គិតត្រឹមខែឧសភា ឆ្នាំ ២០២០ ផលបត្រកម្ចីសរុបមានចំនួន ២,៦៤ ពាន់លានដុល្លារអាមេរិក កើនឡើង ៥,៨៣ ភាគរយ ធៀបនឹងចុងខែធ្នូឆ្នាំ ២០១៩ ខណៈដែលតុល្យភាពប្រាក់បញ្ញើមានចំនួន ១,៨៩ ពាន់លានដុល្លារ កើនឡើង ៥,៧៦ ភាគរយ។
លោកថ្លែងថា៖ «កំណើនកម្ចីរបស់យើងនឹងមិនសម្រេចបានតាមការព្យាកររបស់យើងនោះទេ ដោយសារតែផលប៉ះពាល់របស់ជំងឺកូវីដ ១៩។ ជាលទ្ធផល យើងនៅសល់សាច់ប្រាក់ និងសន្ទនីយភាពដែលមិនបានប្រើខ្ពស់ផងដែរ។ យើងកត់សម្គាល់ថា កំណើនអាជីវកម្មរបស់យើង យឺត ប៉ុន្តែមានភាពល្អប្រសើរ»។
លោកបន្តទៀតថា៖ «យើងនៅតែរក្សាទំនាក់ទំនងល្អ និងពិភាក្សាជាមួយអតិថិជន ដើម្បីស្វែងរកដំណោះស្រាយដែលអាចជួយជម្នះនឹងវិបត្តិនេះ។ ជាមួយគ្នានេះយើងក៏នៅបន្តការផ្ដល់កម្ចីគ្រប់ប្រភេទដល់អតិថិជន ហើយជាពិសេសយើងក៏បានចូលរួមក្នុងផែនការសហហិរញ្ញប្បទានរបស់រដ្ឋាភិបាល ដើម្បីផ្ដល់កម្ចីដល់ SME ជាមួយអត្រាការប្រាក់កាន់តែទាបចំនួន ០,៥៨ ភាគរយក្នុង ១ ខែផងដែរ»។
ប្រាសាក់ បានបញ្ចេញកម្ចីដល់វិស័យអប់រំប្រហែល ២,១ លានដុល្លារអាមេរិកដែលកម្ចីភាគច្រើនសម្រាប់បម្រើការបណ្ដុះបណ្ដាលជំនាញវិជ្ជាជីវៈដូចជា គ្រឹះស្ថានបណ្ដុះបណ្ដាលភាសាបរទេស និងមជ្ឈមណ្ឌលមត្តេយ្យសាលាជាដើម៕LA