ភ្នំពេញៈ វិស័យឯកជនកម្ពុជាស្វាគមន៍ចំពោះគោលបំណងរបស់ប្រតិបត្តិករផ្សារទំនើបនៅប្រទេសថៃ ចំពោះការចង់ឲ្យមានការចាប់ផ្ដើមជើងហោះហើរឡើងវិញជាមួយបណ្តាប្រទេសនៅ CLMV (កម្ពុជា ឡាវ មីយ៉ាន់ម៉ា និងវៀតណាម) ដើម្បីបើកដំណើរការអាជីវកម្មជាថ្មី ដោយអះអាងថាអំណាចទិញរបស់ប្រទេសទាំងនេះគឺមានកម្រិតខ្ពស់។
យោងតាមកាសែតបាងកកប៉ុស្ដិ៍កាលពីថ្ងៃពុធដែលបានដកស្រង់សម្ដីរបស់លោកស្រី Mayuree Chaipromprasit អនុប្រធានប្រតិបត្តិជាន់ខ្ពស់ផ្នែកទីផ្សារនៅក្រុមហ៊ុន Siam Piwat ថាក្រុមហ៊ុននេះចង់ស្នើឲ្យរដ្ឋាភិបាលអនុញ្ញាតឲ្យភ្ញៀវទេសចរបរទេសមកពីក្រុមប្រទេស CLMV ទស្សនាប្រទេសថៃ ដោយលើកឡើងពីចំនួនទាបនៃជំងឺកូវីដ១៩ នៅក្នុងបណ្ដាប្រទេសទាំងនេះ។
លោកស្រីបានឲ្យដឹងថា ភ្ញៀវទេសចរមកពីក្រុមប្រទេសនេះមានអំណាចទិញខ្ពស់ និងមានចំនួនច្រើនដែលបានទៅទស្សនាផ្សារទំនើប Siam Center, Siam Discovery និង Siam Paragon។ មានភ្ញៀវទេសចរបរទេសចំនួន ៤០ ភាគរយនៃភ្ញៀវទេសចរសរុបនៅក្នុងផ្សារទំនើបទាំង ៣ នេះហើយ ៣០ ភាគរយក្នុងចំណោមនោះមកពីបណ្ដាប្រទេសទាំង ៤។
លោកស្រី Mayuree ថ្លែងថា៖ «ភ្ញៀវទេសចរមកពីក្រុមប្រទេស CLMV បានចំណាយប្រាក់ជាមធ្យម ១០០ ០០០ បាត ក្នុងពេលមកទស្សនាម្តង។ ពួកគេចូលចិត្តទិញអីវ៉ាន់ និងសេវាផ្សេងៗចាប់ពីសម្លៀកបំពាក់ដល់គ្រឿងសម្អាង»។
លោកស្រី Voralak Tulaphorn ប្រធានផ្នែកទីផ្សារនៅក្រុមហ៊ុន The Mall Group បានឲ្យដឹងថា ដោយសារក្រុមហ៊ុនលក់រាយរបស់ថៃពឹងផ្អែកលើទេសចរណ៍ ក្រុមហ៊ុនរំពឹងថា ឧស្សាហកម្មលក់រាយដែលមានតម្លៃ ៣,៦ ពាន់ពាន់លានបាតនេះនឹងធ្លាក់ចុះអត្រា ២ ខ្ទង់នៅឆ្នាំនេះ។
លោកស្រីបន្តថា៖ «ប្រហែល ៥០ ភាគរយនៃអតិថិជនរបស់យើង បានចាប់ផ្ដើមទិញអីវ៉ាន់ឡើងវិញ ប៉ុន្តែការលក់មិនទាន់ស្ទុះងើបវិញតាមនោះទេ»។
លោក លឹម ហេង អនុប្រធានសភាពាណិជ្ជកម្មកម្ពុជាបានស្វាគមន៍វិធានការនេះ ដោយវានឹងមិនគ្រាន់តែជួយបង្កើនសកម្មភាពសេដ្ឋកិច្ចក្នុងប្រទេសថៃប៉ុណ្ណោះទេ ប៉ុន្តែថែមទាំងនៅប្រទេសកម្ពុជាផងដែរ។
លោកថ្លែងថា៖ «ពិតហើយប្រទេសយើងមិនហាមឃាត់ជើងហោះហើរទេ។ វាជាសញ្ញាវិជ្ជមានបំផុតក្នុងការចាប់ផ្ដើមជើងហោះហើរជាថ្មី និងការបើកដំណើរការជាថ្មីនូវសកម្មភាពអាជីវកម្ម ដោយសារតែវានឹងមិនគ្រាន់តែផ្ដល់អត្ថប្រយោជន៍ដល់ប្រទេសថៃប៉ុណ្ណោះទេ ប៉ុន្តែថែមទាំងកម្ពុជាផងដែរ»។
លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបាននិយាយថា វានឹងជួយជំរុញការផ្លាស់ប្តូរពាណិជ្ជកម្ម និងទេសចរណ៍រវាងប្រទេសទាំងនេះ ទោះបីជាការរីករាលដាលជំងឺកូវីដ១៩ មិនទាន់ត្រូវបានទប់ស្កាត់ទាំងស្រុងក៏ដោយ។
លោកស្រីថ្លែងថា៖ «យើងមើលឃើញថា ការរីករាលដាលជំងឺកូវីដ ១៩ បានប៉ះពាល់យ៉ាងខ្លាំងដល់អំណាចទិញ និងសេដ្ឋកិច្ចជាតិ ខណៈដែលមេដឹកនាំរបស់ប្រទេសនីមួយៗបានចាត់វិធានការយ៉ាងតឹងរ៉ឹង ដើម្បីទប់ស្កាត់ការរីករាលដាល។ នៅពេលនេះស្ថានការណ៍គឺកាន់តែប្រសើរ។ យើងមិនអាចរង់ចាំរហូតដល់ការរីករាលដាលនេះចប់ទាំងស្រុងទើបចាប់ផ្ដើមអាជីវកម្មឡើងវិញនោះទេ។ យើងនឹងស្លាប់ ឬបើមិនអ៊ីចឹងទេ ប្រឈមនឹងការក្ស័យធនមិនខាន»។
រដ្ឋាភិបាលកម្ពុជាបានចាត់វិធានការដោយតម្រូវឲ្យមានការត្រួតពិនិត្យជាមុននូវជំងឺកូវីដ ១៩ ជាចាំបាច់លើជនបរទេសដែលមកដល់ប្រទេសកម្ពុជាដែលរួមមានការធានារ៉ាប់រងសុខភាពអប្បបរមាក្នុងទឹកប្រាក់ ៥ ម៉ឺនដុល្លារ ត្រូវមានវិញ្ញាបនបត្របញ្ជាក់សុខភាពថាមិនមានកូវីដ ១៩ និងប្រាក់តម្កល់ ៣ ពាន់ដុល្លារសម្រាប់ការត្រួតពិនិត្យសុខភាព។
ទិន្នន័យពីស្ថានទូតកម្ពុជាប្រចាំនៅទីក្រុងបាងកកបង្ហាញថា ពាណិជ្ជកម្មទ្វេភាគីរវាងកម្ពុជា និងថៃមានតម្លៃប្រហែល ៣,១ ពាន់លានដុល្លារនៅរយៈពេល ៤ ខែដំបូងឆ្នាំ ២០២០ កើន ១៨,៣ ភាគរយធៀបនឹងរយៈពេលដូចគ្នាឆ្នាំមុន។
ចំនួនភ្ញៀវទេសចរបរទេសមកប្រទេសកម្ពុជាបានធ្លាក់ចុះជាង ៥៤ ភាគរយក្នុងរយៈពេល ៤ ខែដំបូង ដោយមានចំនួនជាង ១,១ លាននាក់ធៀបនឹង ២,៤ លាននាក់ក្នុងរយៈពេលដូចគ្នាកាលពីឆ្នាំមុន។ ភ្ញៀវថៃកើនឡើង ២១ ភាគរយពីចំនួន ១២៧ ០៨៥ នាក់ដល់ ១៥៣ ៨១១ នាក់។ នេះបើតាមទិន្នន័យក្រសួងទេសចរណ៍៕ LA