មន្ដ្រីជាន់ខ្ពស់នៃសមាគមរោងចក្រកាត់ដេរកម្ពុជា (GMAC) និងអ្នកតំណាងពីសមាគមន៍ពាណិជ្ជកម្មអន្តរជាតិចាត់ទុកថា ការសម្រេចចិត្តរបស់រដ្ឋាភិបាលក្នុងការបិទខ្ទប់តំបន់មួយចំនួន ដើម្បីប្រយុទ្ធប្រឆាំងនឹងការកើនឡើងការរីករាលដាលជំងឺកូវីដ១៩ គឺជាវិធានការឆ្លើយតបដ៏ទាន់សភាពការណ៍មួយ ដើម្បីរក្សាសុខុមាលភាពប្រជាពលរដ្ឋ និងសង្គម ទោះបីជាមានការខាតបង់សេដ្ឋកិច្ចខ្លះៗក៏ដោយ ប៉ុន្តែវាគ្រាន់តែរយៈពេលខ្លីប៉ុណ្ណោះ។
កាលពីថ្ងៃទី ១៤ ខែមេសា រដ្ឋាភិបាលបានប្រកាសបិទខ្ទប់ទីក្រុងភ្នំពេញ និងក្រុងតាខ្មៅ ខេត្តកណ្ដាល រហូតដល់ថ្ងៃទី ២៨ និងត្រូវបានពន្យារពេលរហូតដល់ថ្ងៃទី ៥ ខែឧសភាខាងមុខនេះ។
លោក កាំង ម៉ូនីកា អគ្គនាយករង GMAC បានប្រាប់ភ្នំពេញប៉ុស្ដិ៍ថា ទោះបីជាមានបញ្ហាប្រឈមសេដ្ឋកិច្ច ក្នុងអំឡុងពេលការបិទខ្ទប់ក៏ដោយ ក៏វាជារឿងដែលត្រឹមត្រូវដែលគ្រប់មេដឹកនាំត្រូវតែជ្រើសរើស ដើម្បីដាក់ការថែរក្សាសុខភាពរបស់ប្រជាជនគឺជាអាទិភាពចម្បង។
លោកថ្លែងថា៖ «ការសម្រេចចិត្តរបស់រដ្ឋាភិបាលគឺពិតជាចាំបាច់ ទោះបីជាបញ្ហាប្រឈមនៃការខាតបង់សេដ្ឋកិច្ចក៏ដោយ។ ការការពារសុខភាពសាធារណៈ ដើម្បីសង្គ្រោះជីវិតមនុស្សគឺមានសារៈសំខាន់ខ្លាំងជាងអ្វីៗទាំងអស់»។
លោកលើកឡើងថា៖ «អ្វីដែលយើងកំពុងធ្វើគឺការផ្សព្វផ្សាយទាន់ពេលវេលានៃបទប្បញ្ញត្តិ និងវិធានការដែលធ្វើបច្ចុប្បន្នភាពជាប់ទាក់ទងនឹងការសម្រេចបិទខ្ទប់របស់រដ្ឋាភិបាល សម្រាប់ការអនុវត្តប្រកបដោយប្រសិទ្ធភាពរបស់សមាជិករបស់យើង។ ទី ២ សម្រាប់កម្រិតគោលនយោបាយ យើងបន្តធ្វើការងារលើគោលនយោបាយប្រាក់ឈ្នួល និងការគាំទ្រប្រាក់ឧបត្ថម្ភ ដោយពឹងផ្អែកលើគោលការណ៍មនុស្សជាតិ សេវាឡូជីស្ទីក បម្រើសមាជិកនៅជិត ឬនៅក្រៅតំបន់បិទខ្ទប់ និងសំខាន់ជាងនេះទៅទៀត គឺផែនការចង្អុលផ្លូវមេ ដើម្បីបើកដំណើរការឡើងវិញ ឬក្រោយវិធានការបិទខ្ទប់»។
លោក Anthony Galliano អគ្គនាយកក្រុមហ៊ុនប្រឹក្សាហិរញ្ញវត្ថុ Cambodia Investment Management Co Ltd និងជាប្រធានសភាពាណិជ្ជកម្មអាមេរិកបានប្រាប់ភ្នំពេញប៉ុស្ដិ៍ថា ដោយសារតែមានការកើនឡើងអ្នកឆ្លងប្រចាំថ្ងៃ ដោយមានការធ្វើតេស្ដមានកម្រិត ការបិទខ្ទប់គឺចាំបាច់ដើម្បីទប់ស្កាត់ការរីករាលដាលនេះ។
លោកបន្តថា៖ «ការបិទខ្ទប់នេះគឺជាយុទ្ធសាស្ដ្រនៃតុល្យភាព ការរក្សាដង្ហើមសេដ្ឋកិច្ច ខណៈដែលការទប់ស្កាត់ការរីករាលដាល និងជម្រើសដែលអាចមានចំពោះរដ្ឋាភិបាល នៅពេលនេះគឺត្រូវបានកម្រិតយ៉ាងខ្លាំង ដោយសារតែការឆ្លងកើនឡើងខ្លាំង»។
លោកបានពន្យល់ថា ខណៈដែលសក្ដានុពលនៃការបិទខ្ទប់អាចនឹងមានជាច្រើនសប្ដាហ៍ វាហាក់ដូចជាមានរងផលប៉ះពាល់ដំបូងមួយចំនួនក្នុងរយៈពេលពីរបីថ្ងៃមុននេះ។ ហើយការបែងចែកអាហារនៅតាមភោជនីយដ្ឋាន ត្រូវបានរឹតបន្តឹងយ៉ាងខ្លាំង ដោយសារតែការទប់ស្កាត់ការធ្វើដំណើរទូទាំងទីក្រុង ក្នុងអំឡុងពេលនៃការបិទខ្ទប់នេះ។
លោកបន្តថា៖ «ច្បាស់ណាស់វិធានការដែលធ្វើឡើងនេះ បម្រាមគោចរ និងការបិទខ្ទប់ មានសារៈសំខាន់សម្រាប់សន្ដិសុខ និងសុវត្ថិភាពរយៈពេលវែងរបស់ប្រទេសជាតិ។ រដ្ឋាភិបាលបានអនុវត្តបានយ៉ាងត្រឹមត្រូវ និងជាផលប្រយោជន៍ល្អបំផុតរបស់ប្រជាជន»។
រដ្ឋាភិបាលកាលពីថ្ងៃទី ២៥ ខែមេសា បានចេញសេចក្ដីសម្រេចចិត្តមួយស្ដីពី «ការលើកលែងការហាមឃាត់ការធ្វើដំណើរ និងការបញ្ចប់ការបិទខ្ទប់នៃរមណីយដ្ឋានទេសចរណ៍ ទូទាំងប្រទេស» ទោះបីយ៉ាងណា ប្រសិនបើជំងឺកូវីដ១៩នៅតែមាន អាជ្ញាធរមូលដ្ឋានត្រូវបានផ្ដល់សិទ្ធិក្នុងការស្វ័យប្រកាសក្នុងការបិទខ្ទប់កន្លែងណាមួយដែលមានហានិភ័យខ្លាំងបំផុត។
យោងតាមលោក កាំង កម្មករ និយោជិត បានទទួលការគាំទ្រពីរដ្ឋាភិបាល។ GMAC ក៏បានអំពាវនាវដល់រោងចក្រទាំងអស់ ត្រូវពិចារណាការគាំទ្របន្ថែមទៀត។ លោកបន្តថា៖ «យើងបានអំពាវនាវដល់អ្នកទិញទាំងអស់ មិនត្រូវផាកពិន័យសមាជិករបស់យើងដែលមិនបានគោរពតាមពេលវេលាកំណត់តាមកិច្ចព្រមព្រៀងដើមនៃការបែងចែកនោះទេ»។
លោកលើកឡើងថា៖ «យើងបានរងផលប៉ះពាល់រួចទៅហើយលើការនាំចេញរបស់យើង។ ប៉ុន្តែអ្វីដែលកាន់តែប្រឈមខ្លាំងទៅទៀតនោះ គឺភាពប្រាកដប្រជា និងការព្យាករអនាគតរបស់យើងក្នុងរយៈពេលជាច្រើនខែខាងមុខនេះ។ ជារួម វាជាភារកិច្ចដ៏ស្មុគស្មាញបំផុតមួយ ប៉ុន្តែខ្ញុំគិតថា ជាមួយគ្នានេះយើងអាចជម្នះឧបសគ្គនេះបាន»។ លោកបន្តថា៖ «ខ្ញុំជឿជាក់ថា ការចាក់វ៉ាក់សាំងនឹងធ្វើឡើងកាន់តែយ៉ាងរហ័ស ដោយសារមានការចូលរួមពីកងកម្លាំងយោធា»។
ធនាគារអភិវឌ្ឍន៍អាស៊ីកាលពីថ្ងៃទី ២៨ ខែមេសាបានព្យាករថា សេដ្ឋកិច្ចកម្ពុជានឹងកើនឡើង ៤,០ ភាគរយនៅឆ្នាំនេះ និង ៥,៥ ភាគរយនៅឆ្នាំ ២០២២ ដោយសារតែសេដ្ឋកិច្ចស្ទុះងើបឡើងវិញនៅក្នុងដៃគូពាណិជ្ជកម្មសំខាន់ៗ ជំរុញតម្រូវការការនាំចេញរបស់ប្រទេសកម្ពុជា។
ធនាគារនេះបានឲ្យដឹងថា ផលិតកម្មឧស្សាហកម្មត្រូវបានព្យាករថា នឹងកើនឡើង ៧,១ ភាគរយក្នុងឆ្នាំ ២០២១ និង ៧,០ ភាគរយនៅឆ្នាំ ២០២២ ដោយសារតែការស្ទុះងើបឡើងវិញផ្នែកសម្លៀកបំពាក់ ស្បែកជើង និងទំនិញអ្នកធ្វើដំណើរ ព្រមទាំងកំណើននៅក្នុងផលិតកម្មធុនស្រាលផ្សេងទៀត ដូចជាគ្រឿងអគ្គិសនី និងកង់ជាដើម៕LA