.jpg)
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា។ ហេង ជីវ័ន
ភ្នំពេញ: តំណាងវិស័យឯកជនកម្ពុជា និងតំណាងវិស័យឯកជនជប៉ុនដែលទាំង ២ មានឥទ្ធិពលក្នុងវិស័យធុរកិច្ចនឹងជួបពិភាក្សាគ្នានៅថ្ងៃនេះក្នុងទីក្រុងភ្នំពេញក្នុងគោលបំណងជំរុញធុរកិច្ច និងទាក់ទាញការវិនិយោគបន្ថែមទៀតរវាងកម្ពុជា-ជប៉ុនឱ្យរីកចម្រើន ខណៈទិន្នន័យនៃពាណិជ្ជកម្មទ្វេភាគីបង្ហាញពីនិន្នាការធ្លាក់ចុះតិចតួចក្នុងពេលរីករាលដាលជំងឺកូវីដ១៩។
លោក គិត ម៉េង ប្រធានសភាពាណិជ្ជកម្មកម្ពុជានឹងទទួលស្វាគមន៍លោកស្រី ម៉ារីសា ហារ៉ូតា (Ms. Marisa Haruta) ប្រធានតំណាងថ្មីនៃអង្គការពាណិជ្ជកម្មក្រៅប្រទេសជប៉ុនប្រចាំកម្ពុជា (Jetro) ដែលភាគីទាំង ២ នឹងពិភាក្សាលើរបៀបវារៈនៃការពង្រឹងកិច្ចសហប្រតិបត្តិការក្នុងការលើកកម្ពស់ទំនាក់ទំនងធុរកិច្ច និងការវិនិយោគលើវិស័យពាណិជ្ជកម្មរបស់ធុរជនប្រទេសទាំង ២។ នេះបើតាមសេចក្តីប្រកាសព័ត៌មានរបស់សភាពាណិជ្ជកម្មកម្ពុជាចេញផ្សាយកាលពីថ្ងៃសៅរ៍។
សេចក្តីប្រកាសព័ត៌មានបន្តថា ជំនួបនេះក៏ជាការសម្តែងការគួរសម និងណែនាំខ្លួនរបស់លោកស្រី ហារ៉ូតា ក្នុងឱកាសដែលលោកស្រីត្រូវបានចាត់តាំងជាប្រធានតំណាងថ្មីនៃអង្គការពាណិជ្ជកម្មក្រៅប្រទេសជប៉ុនប្រចាំកម្ពុជាផងដែរ។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជាប្រាប់ ភ្នំពេញ ប៉ុស្តិ៍ កាលពីថ្ងៃចន្ទថា ជំនួបពិភាក្សានេះនឹងផ្តោតសំខាន់លើការពង្រឹងកិច្ចសហប្រតិបត្តិការរវាងសភាពាណិជ្ជកម្មកម្ពុជាជាមួយនឹងអង្គការ Jetro លើវិស័យធុរកិច្ច និងពាណិជ្ជកម្ម ដែលកម្ពុជា និងជប៉ុនតែងតែលើកកម្ពស់ក្នុងពេលកន្លងមក។
លោកថ្លែងថា៖ «យើងសង្កេតឃើញថា ធុរកិច្ចជប៉ុនមានការចាប់អារម្មណ៍មកវិនិយោគនៅប្រទេសយើងយ៉ាងខ្លាំង។ [ព្រោះហេតុនោះ] ទើបយើងចង់ពង្រឹងកិច្ចសហប្រតិបតិ្តការបន្ថែមដើម្បីផ្តល់ទំនុកចិត្តរវាង [វិនិយោគិន] ជប៉ុន និងកម្ពុជាយើង ដែលនេះជាការខិតខំប្រឹងប្រែងរបស់រដ្ឋាភិបាលដើម្បីទាក់ទាញវិនិយោគិនជប៉ុនកាន់តែច្រើនថែមទៀត។ ពួកគាត់មានចំណាប់អារម្មណ៍មកវិនិយោគលើវិស័យកសិកម្មនៅកម្ពុជាកាន់តែច្រើន»។
លោក សុក ចិន្តាសោភា អគ្គលេខាធិការ ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងតាមរយៈសេចក្តីប្រកាសព័ត៌មានស្តីពីលទ្ធផលកិច្ចប្រជុំលើកទី ២០ នៃគណៈកម្មាធិការចម្រុះកម្ពុជា-ជប៉ុន កាលពីខែកញ្ញាកន្លងទៅថា ភាគីទាំង ២ បានប្តេជ្ញានឹងបន្តសហការគ្នាដោយខិតខំដោះស្រាយបញ្ហានៅសេសសល់ក្នុងការសម្របសម្រួលបែបបទនីតិវិធីឱ្យកាន់តែសាមញ្ញ និងឆាប់រហ័ស ដើម្បីឱ្យគម្រោងវិនិយោគរបស់ជប៉ុនដែលកំពុងដំណើរការមានសកម្មភាពកាន់តែល្អប្រសើរធានាបាននូវការប្រកួតប្រជែង។
លោកថ្លែងថា៖ «ខ្ញុំថ្លែងអំណរគុណយ៉ាងជ្រាលជ្រៅដល់អ្នកវិនិយោគជប៉ុនដែលតែងតែជឿជាក់មកលើរាជរដ្ឋាភិបាលកម្ពុជា»។
លោក សុក ចិន្តាសោភា បានឱ្យដឹងថា សកម្មភាពវិនិយោគរបស់វិនិយោគិនជប៉ុនទាំងអស់នៅកម្ពុជាជាពិសេស ការវិនិយោគក្នុងវិស័យកម្មន្តសាលមិនមែនវាយនភណ្ឌ បាននិងកំពុងដើរតួនាទីយ៉ាងសំខាន់ក្នុងការរួមចំណែកដល់ការធ្វើពិពិធកម្មសេដ្ឋកិច្ចកម្ពុជា ការអភិវឌ្ឍធនធានមនុស្ស ស្របទៅតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា។
គិតត្រឹមខែកក្កដា ឆ្នាំ ២០២០ CDC បានចុះបញ្ជីគម្រោងវិនិយោគរបស់ជប៉ុនចំនួន ១៤៤ គម្រោង ដែលមានទុន វិនិយោគសរុប ២,៨ ពាន់ដុល្លារ។ ក្នុងនោះគម្រោងចំនួន ៦៦ បានវិនិយោគនៅក្នុងតំបន់សេដ្ឋកិច្ចពិសេស ដែលមានទុនវិនិយោគសរុប ៣៤០ លានដុល្លារ។ នេះបើតាម CDC។
អង្គការពាណិជ្ជកម្មក្រៅប្រទេសជប៉ុនគឺជាអង្គការមួយរបស់រដ្ឋាភិបាលជប៉ុនដែលមានគោលដៅចម្បងក្នុងការលើកកម្ពស់ពាណិជ្ជកម្ម និងការវិនិយោគរវាងប្រទេសជប៉ុនជាមួយបណ្តាប្រទេសនានាជុំវិញពិភពលោក។ អង្គការនេះត្រូវបានបង្កើតឡើងនៅក្នុងឆ្នាំ ១៩៥៨ ដើម្បីជំរុញការនាំចេញរបស់ជប៉ុនទៅបរទេស។
យោងតាមទិន្នន័យពីអង្គការ (Jetro) កម្ពុជាបាននាំចេញទំនិញមានតម្លៃជាង ១ ០៤៥ លានដុល្លារទៅកាន់ទីផ្សារប្រទេសជប៉ុន ក្នុងរយៈពេល ៨ ខែដើមឆ្នាំ ២០២០ ដែលធ្លាក់ចុះ ៥,៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩ ដែលមានចំនួនជាង ១ ១០៣ លានដុល្លារ។
ទិន្នន័យដដែលបានឱ្យដឹងថា ក្នុងអំឡុងពេលនេះកម្ពុជាក៏បាននាំចូលទំនិញមកវិញ មានតម្លៃជាង ៣០០ លានដុល្លារ ធ្លាក់ចុះ ១៤,២ ភាគរយបើធៀបនឹងរយៈពេលដូចគ្នាកាលពីឆ្នាំមុនដែលមានចំនួនជាង ៣៥០ លានដុល្លារ៕ LA
