.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងវេទិការាជរដ្ឋាភិបាលផ្នែកឯកជនលើកទី ១៨ កាលពីឆ្នាំមុន។ រូបថត SPM
ភ្នំពេញៈ វេទិការាជរដ្ឋាភិបាលផ្នែកឯកជនលើកទី ១៩ នឹងត្រូវបានរៀបចំឡើងនៅថ្ងៃទី ១ ខែមេសា ខណៈវិស័យឯកជនរំពឹងថា បញ្ហាប្រឈមនានានឹងត្រូវបានដោះស្រាយក្នុងជំនួបជាមួយប្រមុខរដ្ឋាភិបាល។ នេះបើយោងតាមប្រធានផ្នែកសម្របសម្រួលការងារផ្នែកឯកជននៃវេទិការាជរដ្ឋាភិបាលផ្នែកឯកជន។
នៅក្នុងជំនួបដែលគេត្រូវបានធ្វើឡើងរាងរាល់ឆ្នាំនេះ វិស័យឯកជនមកពីវិស័យចំនួន ១៣ និងជួបប្រជុំជាមួយលោកនាយករដ្ឋមន្ត្រី ហ៊ុន សែន ដើម្បីផ្តល់លើកយកបញ្ហាសំខាន់ៗមកប្រាប់ដល់ប្រមុខរាជរដ្ឋាភិបាល។
លោក លឹម ហេង អនុប្រធានសភាពាណិជ្ជកម្ម និងជាប្រធានផ្នែកសម្របសម្រួលនៃក្រុមការងារផ្នែកឯកជននៃ «វេទិការាជរដ្ឋាភិបាលផ្នែកឯកជន» បានឲ្យដឹងកាលពីថ្ងៃអង្គារថានេះជាយន្តការមួយដែលត្រូវបានបង្កើតឡើងដោយលោកនាយករដ្ឋមន្ត្រី ហ៊ុន សែន ដើម្បីជួបជាមួយអ្នកតំណាងមកពីវិស័យឯកជន និងរដ្ឋក្នុងន័យទទួលបានព័ត៌មានពីវិស័យឯកជន និងរិះរកវិធីដោះស្រាយរួមគ្នា។
លោកបានថ្លែងថា៖ «តាមរយៈជំនួបជាមួយសម្តេច ហ៊ុន សែន បញ្ហាធំៗដែលពិបាកៗ ហើយអាជ្ញាធរថ្នាក់ក្រោមមិនអាចដោះស្រាយបាននឹងត្រូវបានវះកាត់»។
លោកបានបន្តថា ចាប់តាំងពីបង្កើតមក យន្តការនេះបានជួយដោះស្រាយបញ្ហាប្រឈមនានារបស់វិស័យឯកជនជាច្រើនដូចជាក្នុងជំនួបលើកទី ១៨ កាលពីឆ្នាំមុនបញ្ហាសំខាន់ៗចំនួន ១៧ ត្រូវបានដោះស្រាយក្នុងនោះរួមមានការកាត់បន្ថយនីតិវិធីស្មុគស្មាញក្នុងការបំពេញបែបបទនាំចេញ លុបចោលស្ថាប័នកាំសាប និងកាំកុងត្រូល និងចុះបញ្ជីអាជីវកម្មជាដើម។
បើយោងតាមលោក លឹម ហេង ក្រុមការងារវិស័យឯកជនចំនួន ១៣ កំពុងពិភាក្សាគ្នាដើម្បីលើកយកបញ្ហាប្រឈមសំខាន់ៗឲ្យលោកនាយករដ្ឋមន្ត្រីជួយដោះស្រាយ ប៉ុន្តែនៅមិនទាន់ដឹងថា បញ្ហាសំខាន់ៗអ្វីខ្លះដែលនឹងត្រូវលើកជូនលោកនាយករដ្ឋមន្ត្រីនៅឡើយទេមកដល់ពេលនេះ។
ក្រុមការងារក្នុងវិស័យឯកជនទាំង ១៣ នោះមានមកពីវិស័យកសិកម្ម និងកសិឧស្សាហកម្ម វិស័យទេសចរណ៍ កម្មន្តសាល និងសហគ្រាសធុនតូច និងមធ្យម និងសេវា ក្រុមការងារនីតិកម្ម ពន្ធដារ និងអភិបាលកិច្ច វិស័យសេវាធនាគារ និងហិរញ្ញវត្ថុ វិស័យដឹកជញ្ជូន និងហេដ្ឋារចនាសម្ព័ន្ធ ផលិតកម្មកែច្នៃសម្រាប់នាំចេញ និងកិច្ចសម្រួលពាណិជ្ជកម្ម ទំនាក់ទំនងវិជ្ជាជីវៈ ក្រុមការងារស្រូវអង្ករ ក្រុមការងារវិស័យថាមពល និងធនធានរ៉ែ វិស័យអប់រំ សុខាភិបាល និងវិស័យសំណង់ និងអចលនទ្រព្យ។
បើតាមលោក លឹម ហេង បច្ចុប្បន្នសភាពាណិជ្ជកម្មកម្ពុជាមានទីស្នាក់ការនៅគ្រប់រាជធានី-ខេត្តដោយមានក្រុមហ៊ុន/សហគ្រាសជាសមាជិកជាង ៥ ០០០។
វេទិការាជរដ្ឋាភិបាល និងផ្នែកឯកជនត្រូវបានរដ្ឋាភិបាលប្រើប្រាស់ជាយន្តការសម្រាប់ធ្វើកំណែទម្រង់សេដ្ឋកិច្ចផ្ទៃក្នុងរបស់កម្ពុជាក្នុងការទាក់ទាញអ្នកវិនិយោគឲ្យចូលមកវិនិយោគនៅកម្ពុជា និងបង្កើនសក្តានុពលសម្រាប់ការនាំចេញទំនិញកម្ពុជាទៅកាន់ទីផ្សារអន្តរជាតិ។
របាយការណ៍ធនាគារនៃកម្ពុជាបានឲ្យដឹងថា នៅក្នុងឆ្នាំ ២០១៩ លំហូរទុនវិនិយោគផ្ទាល់ពីបរទេសមកកម្ពុជាមានតម្លៃសរុប ៣ ៥៨៨ លានដុល្លារ កើនឡើង ១១,៧ ភាគរយ ពីចំនួន ៣ ២១២ លានដុល្លារ កាលពីឆ្នាំ ២០១៨។
សម្រាប់ការនាំចេញទំនិញកម្ពុជាទៅទីផ្សារអន្តរជាតិក្នុងរយៈពេល ៣ ត្រីមាសដំបូងក្នុងឆ្នាំ ២០១៩ មានតម្លៃសរុប ១០,៩ ពាន់លានដុល្លារ៕LA
