.jpg)
បុគ្គលិកធនាគារអេស៊ីលីដាកំពុងពិនិត្យក្រដាសប្រាក់ដុល្លារ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃពុធបានប្រកាសថា បុគ្គលិកពីស្ថាប័នរដ្ឋ និងឯកជននៅកម្ពុជានឹងចាប់ផ្តើមបើកប្រាក់បៀវត្សរ៍ ២ ដងក្នុង ១ ខែជំនួសឲ្យការបើកជាប្រចាំខែវិញ ដោយការសម្រេចនេះនឹងចាប់ផ្តើមអនុវត្តចាប់ពីឆ្នាំ ២០១៩ តទៅ។
ការផ្លាស់ប្តូរនេះបានធ្វើឲ្យពាណិជ្ជករជាម្ចាស់សហគ្រាសខ្នាតតូច និងមធ្យម លើកឡើងជាក្តីបារម្ភថាអាចប៉ះពាល់ដល់លំហូរសាច់ប្រាក់នៅក្នុងក្រុមហ៊ុន ស្របពេលពាណិជ្ជករខ្លះលើកឡើងថាពួកគេនឹងត្រូវធ្វើការច្រើនជាងមុនលើបែបបទរដ្ឋបាលដើម្បីធ្វើរបាយការណ៍ប្រាក់បៀវត្សរ៍សម្រាប់បុគ្គលិក។
ថ្លែងក្នុងពិធីជួបកម្មកររោងចក្រកាត់ដេរចំនួន ១៤ ៧៩៩ នាក់នៅភ្នំពេញកាលពីម្សិលមិញលោក ហ៊ុន សែន បានលើកឡើងពីការផ្លាស់ប្តូររបៀបនៃការបើកបៀវត្សរ៍នេះ ហើយបានផ្តាំទៅម្ចាស់សហគ្រាសឲ្យមានការត្រៀមខ្លួនជាមុន។
លោកថ្លែងថា៖ «សូមឲ្យម្ចាស់រោងចក្រទាំងអស់ ត្រៀមខ្លួនទុកឲ្យហើយ។ បណ្តាក្រុមហ៊ុននៅក្នុងព្រះរាជាណាចក្រកម្ពុជាទាំងអស់ ត្រៀមទុកឲ្យហើយ។ នៅឆ្នាំ ២០១៩ យើងមិនបើកបៀវត្សរ៍ប្រចាំខែទេ យើងបើកបៀវត្សរ៍ប្រចាំសប្តាហ៍ម្តង បានសេចក្តីថា ២ អាទិត្យបើកម្តង»។
ការផ្លាស់ប្តូរនេះគឺអនុលោមតាមច្បាប់ការងារកម្ពុជាដែលត្រូវបានបង្កើតឡើង ចាប់តាំងពីឆ្នាំ ១៩៩៧ ខណៈមាត្រា ១១៦ នៅក្នុងច្បាប់នេះបានចែងថា ប្រាក់ឈ្នួលរបស់កម្មករនឹងត្រូវបើកយ៉ាងហោចណាស់ ២ ដងក្នុង ១ ខែ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា (GMAC) បានឲ្យដឹងកាលពីម្សិលមិញថា ការផ្លាស់ប្តូរនេះនឹងបង្កើតការងាររដ្ឋបាលកាន់តែច្រើនដល់កម្មករធៀបនឹងការបើកប្រាក់ប្រចាំខែ ប៉ុន្តែបញ្ហានេះអាចត្រូវបានដោះស្រាយ ប្រសិនបើរោងចក្រផ្ដល់ប្រាក់ខែតាមរយៈធនាគារ។ នេះបើយោងតាមលោក ម៉ូនីកា ៩០ ភាគរយនៃសមាជិករបស់ GMAC គឺនៅតែបើកប្រាក់ខែជាសាច់ប្រាក់ ខណៈមាន ១០ ភាគរយប៉ុណ្ណោះកំពុងធ្វើតាមរយៈគ្រឹះស្ថានហិរញ្ញវត្ថុធនាគារ។
លោកថ្លែងថា៖ «ខ្ញុំមិនគិតថា វាជាបន្ទុកដ៏ធំគ្រាន់តែផ្លាស់ប្តូរពីការផ្ដល់ប្រាក់ប្រចាំខែទៅជាការបើក ២ ដងក្នុង ១ ខែនោះទេ»។
លោកបន្ថែមថាតាមរយៈការបើកប្រាក់ខែតាមរយៈធនាគារ ម្ចាស់រោងចក្រ មិនត្រូវការរើសបុគ្គលិកបន្ថែម ដើម្បីធ្វើការងារនោះទេ។ លោកបញ្ជាក់ថា៖ «បញ្ហាលំហូរសាច់ប្រាក់ អាចកើតឡើងនៅក្នុងរយៈពេល ២-៣ ខែដំបូង ប៉ុន្តែបន្ទាប់ពីនោះវានឹងត្រឡប់ទៅធម្មតាវិញ»។
លោកស្រី កែវ មុំ ប្រធានក្រុមហ៊ុននំស្រួយលីលីដែលផ្ដល់ការងារដល់បុគ្គលិក ២៥០ នាក់ ហើយបច្ចុប្បន្នផ្ដល់ការបើកប្រាក់ខែ តាមរយៈសេវាធនាគារបានឲ្យដឹងថា សហគ្រាសធុនតូច និងមធ្យមដូចជាក្រុមហ៊ុនរបស់លោកស្រី ត្រូវការរយៈពេលយូរក្នុងការធ្វើរបាយការណ៍ស្ដីពីប្រាក់ខែ ដោយសារតែមានតម្រូវការក្នុងការបញ្ជាក់លើវត្តមាននៅខែនីមួយៗរបស់កម្មករ ការទូទាត់ប្រាក់ថែមម៉ោងរបស់ពួកគេ និងអត្ថប្រយោជន៍បន្ថែមផ្សេងទៀត។
លោកស្រីថ្លែងថា៖ «បើយើងត្រូវការផ្ដល់ប្រាក់ខែ ២ ដងក្នុង ១ ខែ យើងនឹងមានការងារកាន់តែច្រើនត្រូវដោះស្រាយលើបញ្ហាដូចគ្នា ហើយយើងបារម្ភថា យើងអាចធ្វើឲ្យមានកំហុសមួយចំនួន»។
លោកស្រីបន្តថាការផ្លាស់ប្តូរនេះធ្វើឲ្យអាជីវកម្មរបស់លោកស្រីកាន់តែពិបាកក្នុងការគ្រប់គ្រងលំហូរសាច់ប្រាក់ ដោយសារតែលំហូរសាច់ប្រាក់ចូល និងចេញរបស់សហគ្រាសធុនតូច និងមធ្យមដូចជាក្រុមហ៊ុនរបស់លោកស្រីមានកម្រិត។
ប៉ុន្តែក្រុមហ៊ុនធំដូចជាធនាគារអេស៊ីលីដាមិនមានការបារម្ភណាមួយ ជាមួយនឹងការផ្លាស់ប្តូរនេះទេ។ នេះបើតាមលោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា។
លោកបន្តថា៖ «ការធ្វើរបាយការណ៍មិនពិបាកទេ ដោយសារវាធ្វើតាមរយៈកុំព្យូទ័រ។ ការដកប្រាក់ខែ មិនពិបាកនោះទេ ដោយសារតែកម្មករអាចប្រើប្រាស់កាតអេធីអឹម»៕ LA
