.jpg)
លោក គិត ម៉េង (ឆ្វេង) និងលោក គុណ ញឹម។ រូបថត សហការី
ភ្នំពេញៈ វិស័យឯកជនបានស្នើសុំចំនួន ៨ ចំណុច ទៅរដ្ឋាភិបាលតាមរយៈអគ្គនាយកដ្ឋានគយ និងរដ្ឋាករឲ្យជួយសម្រាលបន្ទុកពាក់ព័ន្ធនឹងការនាំចេញ-នាំចូលទំនិញបន្ថែមទៀតនៅក្នុងអំឡុងពេលការរាតត្បាតជំងឺកូវីដ ១៩។
សេចក្តីប្រកាសព័ត៌មានបានឲ្យដឹងថា ការស្នើសុំនោះរួមមានការពង្រឹងការអនុវត្តកម្រៃសេវាផ្លូវគយរបស់អគ្គនាយកដ្ឋានគយ និងរដ្ឋាករ ការកាត់បន្ថយបន្ទុកនានាបន្ថែមទៀតចំពោះការវិនិយោគលើវិស័យកាត់ដេរ និងកសិកម្ម ការពង្រឹងប្រសិទ្ធភាពនៃការបង្ការ និងបង្ក្រាបអំពើរត់គេចពន្ធ ការពង្រីកវិសាលភាពនៃការអនុវត្តនីតិវិធីបំពេញបែបបទគយមុនពេលទំនិញមកដល់ និងការកែលម្អនីតិវិធី E-Payment។
ទន្ទឹមនឹងនេះវិស័យឯកជនក៏បានស្នើសុំឲ្យរដ្ឋាភិបាលជួយជំរុញការអនុវត្តយន្តការលើកទឹកចិត្តសហគ្រាសធុនតូច និងមធ្យម ការពង្រីកចំនួនសមាជិកក្រុមធុរជនល្អបំផុតដើម្បីលើកទឹកចិត្តធុរជនមានអនុលោមភាពខ្ពស់ និងការធ្វើសាមញ្ញកម្ម និងទំនើបកម្មនីតិវិធីគយ។
សំណើទាំងនេះត្រូវបានលើកឡើងក្នុងកិច្ចប្រជុំពិសេសរវាងលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងជាសហប្រធានក្រុមការងារបច្ចេកទេសរដ្ឋាភិបាលនៃយន្តការភាពជាដៃគូគយផ្នែកឯកជន ជាមួយលោក គិត ម៉េង ប្រធានសភាពាណិជ្ជកម្មកម្ពុជា និងជាសហប្រធានក្រុមការងារបច្ចេកទេសផ្នែកឯកជនកាលពីថ្ងៃអង្គារ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) ប្រាប់ភ្នំពេញប៉ុស្តិ៍កាលពីថ្ងៃពុធថា GMAC បានលើកសំណើមួយចំនួននាពេលកន្លងមក រួមមានការដឹកជញ្ជូន និងឡូជីស្ទីក ខណៈហេដ្ឋារចនាសម្ព័ន្ធរូបវន្តត្រូវបានធ្វើឲ្យប្រសើរឡើងហើយដំណើរការនីតិវិធីមួយចំនួនត្រូវបានធ្វើឲ្យមានភាពសាមញ្ញ និងទំនើប។
លោកបន្តថា នៅក្នុងវិស័យឡូជីស្ទីកមានឈ្មួញកណ្តាល ដូច្នេះនៅពេលតម្លៃសេវាគ្មានតម្លាភាព វានឹងផ្តល់ឱកាសឲ្យឈ្មួញកណ្តាលគ្មានសីលធម៌មួយចំនួនបំប៉ោងតម្លៃសេវា។
លោកថ្លែងថា៖ «វាជាបញ្ហាថ្លៃដើមធ្ងន់ធ្ងរសម្រាប់ការនាំចេញទំហំតូចជាពិសេស ព្រោះពួកគេត្រូវបានគិតថ្លៃក្នុង ១ ឯកសារ ឬការដឹកជញ្ជូន ១ ជើង ដោយមិនមែនតាមតម្លៃនាំចេញនោះទេ។ គ្រប់ភាគីដែលពាក់ព័ន្ធត្រូវតែមានតម្លាភាព»។
លោក គិត ម៉េង បានឲ្យដឹងថា បន្ទាប់ពីបានធ្វើការពិភាក្សាលើចំណុចសំណូមពរខាងលើរួចមក កិច្ចប្រជុំបានឯកភាពគ្នាឲ្យក្រុមការងារជំនាញនីមួយៗបន្តបង្កើតការពិភាក្សាដោះស្រាយបញ្ហាដែលកើតមានឡើងជាយថាហេតុនៅពេលខាងមុខឲ្យទាន់ពេលវេលា និងមានប្រសិទ្ធភាព។
ជាមួយគ្នានេះលោក គុណ ញឹម បាននិយាយថា៖ «អគ្គនាយកដ្ឋានគយ និងរដ្ឋាករកម្ពុជានឹងរង់ចាំសហការជាមួយវិស័យឯកជនជានិច្ចក្នុងការពិភាក្សាស្វែងរកដំណោះស្រាយបន្តទៀត»៕ LA
