.jpg)
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម និងមន្ត្រីតំណាងពីក្រសួងប្រៃសណីយ៍ និងទូរគមនាគមន៍។ រូបថត ហ្វេសប៊ុក
ភ្នំពេញ: វិស័យឯកជន និងស្ថាប័នរដ្ឋកាលពីថ្ងៃម្សិលមិញបានជួបពិភាក្សាផ្លាស់ប្តូរយោបល់គ្នាពីការវិវឌ្ឍនៃឌីជីថលក្នុងវិស័យឧស្សាហកម្មហិរញ្ញវត្ថុនៅកម្ពុជា។
សន្និសីទឆ្នាំ ២០១៩ ស្តីពីការវិវឌ្ឍនៃឌីជីថលក្នុងវិស័យឧស្សាហកម្មហិរញ្ញវត្ថុ មានការចូលរួមពីអ្នកជំនាញជាង ១០០ នាក់ទាំងក្នុងស្រុក និងក្រៅស្រុក ក្នុងនោះខាងរដ្ឋាភិបាលមានការចូលរួមពីលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម និងមន្ត្រីតំណាងពីក្រសួងប្រៃសណីយ៍ និងទូរគមនាគមន៍។
សន្និសីទនេះរៀបចំដោយ Kepstar Data Centre Management Co. Ltd ជាក្រុមហ៊ុនសាងសង់ និងដំណើរការមជ្ឈមណ្ឌលទិន្នន័យមួយនៅកម្ពុជាបានសហការជាមួយវិទ្យាស្ថានប្រៃសណីយ៍ទូរគមនាគមន៍ បច្ចេកវិទ្យាគមនាគមន៍និងព័ត៌មាន។
លោក Sigfried Ching នាយកគ្រប់គ្រងក្រុមហ៊ុន Price water house Coopers Singapore ឲ្យដឹងថា ព្រឹត្តិការណ៍នេះបានផ្តោតសំខាន់ទៅលើការគ្រប់គ្រងនិរន្តរភាពអាជីវកម្មតាមរយៈបច្ចេកវិទ្យា។ លោកថ្លែងថា៖ «អង្គភាពនានានៅកម្ពុជាមានលក្ខណៈកាន់តែរីកធំទៅៗ និងភាពស្មុគស្មាញកាន់តែកើនឡើងដែលទាមទារឲ្យមានការអភិវឌ្ឍបច្ចេកវិទ្យាដើម្បីកាត់បន្ថយការគំរាមកំហែងដល់ប្រតិបត្តិការ»។
លោក Vivek Gullapalli អ្នកជំនាញមកពីសិង្ហបុរីបានឲ្យដឹងថា ការខាតបង់បង្កឡើងដោយបទឧក្រិដ្ឋតាមប្រព័ន្ធអ៊ីនធឺណិតអាចនឹងមានតម្លៃ ៦ ពាន់ពាន់លានដុល្លារ ត្រឹមឆ្នាំ ២០២១ ប្រសិនមិនមានប្រព័ន្ធបច្ចេកវិទ្យាសុវត្ថិភាពមួយនោះទេ៕LA
