ភ្នំពេញៈ ខណៈអាជ្ញាធរបានដាក់វិធានការរឹតបន្តឹងត្រួតពិនិត្យលក្ខណៈបច្ចេកទេសយានយន្តដឹកទំនិញចេញចូលកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ អ្នកនៅក្នុងវិស័យដឹកជញ្ជូនបានឲ្យដឹងថា វិធានការនេះនឹងប៉ះពាល់ដល់ការដឹកជញ្ជូនទំនិញ ពិសេសក្នុងវិស័យវាយនភណ្ឌ។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបានឲ្យដឹងថា វិធានការរបស់ក្រសួងនឹងធ្វើឲ្យការបញ្ជូនទំនិញទៅឲ្យអ្នកបញ្ជាទិញមិនទាន់ពេលវេលា។ លោកថ្លែងថា៖ «ខ្ញុំកំពុងជជែកជាមួយវិស័យកាត់ដេរពីបញ្ហាស្ទះឥឡូវនេះ រយៈពេល ១៥ ថ្ងៃហើយ បើពន្យារពេលដល់ ២ អាទិត្យទៀត ចាល់ទំនិញនឹងមានការប៉ះពាល់អ្នកបញ្ជាទិញឈប់កុម៉្មង់ទំនិញវិញ ព្រោះវាហួសពេលវេលា»។
លោក ស៊ិន ចន្ធី បានឲ្យដឹងថា ប្រសិនបើការបញ្ជូនទំនិញតាមកប៉ាល់មានភាពយឺតយ៉ាវ ក្រុមហ៊ុនមានតែបង្ខំចិត្តបញ្ជូនតាមផ្លូវអាកាសដែលត្រូវចំណាយខ្ពស់។ លោកថ្លែងថា៖ «ការដឹកតាមកប៉ាល់ និងយន្តហោះវាមានតម្លៃខុសគ្នាច្រើនណាស់ប្រហែល ១០ ទៅ ២០ ដង។ [បើ] ដឹកតាមកប៉ាល់ថ្លៃ ៥ ០០០ ដុល្លារ ១ កុងតឺន័រទៅអាមេរិក ឬអឺរ៉ុប ការដឹកតាមជើងយន្តហោះនឹងមានរហូតប្រមាណពី ១៥ ០០០ ដុល្លារ ទៅ ២០ ០០០ ដុល្លារ»។
ដើម្បីកាត់បន្ថយផលប៉ះពាល់ដែលជាក្តីបារម្ភរបស់វិស័យឯកជន លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចេញវិធានការចំនួន ៣ ដើម្បីសម្រួលបញ្ហាកកស្ទះរថយន្តដឹកទំនិញ។ ទី១ បង្រៀនអ្នកបើកបរមិនទាន់មានបណ្ណប្រមាណ ៧០ នាក់ ដោយឥគគិតថ្លៃ ទី២ ដាក់រថយន្តត្រួតពិនិត្យលក្ខណៈបច្ចេកទេសចល័តចំនួន ២ គ្រឿង នៅក្បែរកំពង់ផែស្វយ័តក្រុងព្រះសីហនុ និង ទី៣ បន្ថែមម៉ោងធ្វើការរហូតដល់ម៉ោង ១០ យប់ នៅកន្លែងត្រួតពិនិត្យបច្ចេកទេសរថយន្តទាំង ៥ ទីតាំង នៅរាជធានីភ្នំពេញ។
លោក ស៊ិន ចន្ធី បានបញ្ជាក់ឲ្យដឹងថា ក្រោយពីមានវិធានការរឹតបន្តឹងច្បាប់ចរាចរណ៍ផ្លូវគោក សមាគមលោកនឹងជំរុញឲ្យក្រុមហ៊ុនដឹកជញ្ជូនណែនំាដល់អ្នកបើកបរឲ្យគោរពច្បាប់ចរាចរណ៍។
ទោះបីយ៉ាងនេះក្តីលោកបានស្នើឲ្យក្រសួងផ្អាកការត្រួតពិនិត្យលក្ខណៈបច្ចេកទេសយានយន្ត និងបណ្ណបើកបររថយន្តជាបណ្តោះអាសន្នសិន ឬត្រួតពិនិត្យជាជំហានៗ។
លោក វ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូន សុំមិនបកស្រាយចំពោះសំណើរបស់សមាគមភ្នាក់ងារបញ្ជូនទំនិញកម្ពុជា។ ប៉ុន្តែលោកបញ្ជាក់ថា គ្រប់ភាគីទាំងអស់នឹងរួមគ្នាដោះស្រាយ។ លោកបានថ្លែងថា៖ «យើងត្រូវរួមគ្នាដោះស្រាយ វាជាការអនុវត្តច្បាប់»។
លោក គង់ សុវណ្ណ ទីប្រឹក្សាសុវត្ថិភាពចរាចរណ៍ បានប្រាប់ភ្នំពេញប៉ុស្តិ៍កាលពីម្សិលមិញថា វាត្រូវដល់ពេលហើយដែលក្រុមហ៊ុនដឹកជញ្ជូនទាំងអស់ត្រូវចូលរួមគោរពច្បាប់ចរាចរណ៍ឲ្យស្របទៅតាមការអនុវត្តច្បាប់របស់រដ្ឋាភិបាល។
លោកថ្លែងថា៖ «ការស្នើសុំរបស់សមាគមពន្យារពេលនៅពេលនេះមិនមែនជាលើកទី១ ទេ ហើយ តើពេលណាជាពេលស័ក្តិសម ដែលម្ចាស់អាជីវកម្ម ក្រុមហ៊ុនដឹកជញ្ជូនទាំងនោះត្រៀមខ្លួនរួចរាល់ក្នុងការគោរពច្បាប់ យើងរកស៊ី ធ្វើជំនួញក៏មិនត្រូវឲ្យប៉ះពាល់ជីវិតអ្នកដទៃដែរ»។
លោក សុវណ្ណ បន្ថែមថា ម្ចាស់អាជីវកម្ម និងក្រុមហ៊ុនដឹកជញ្ជូនទាំងអស់ត្រូវផ្តល់វគ្គបណ្តុះបណ្តាលច្បាប់ចរាចរណ៍ផ្លូវគោកដល់បុគ្គលិករបស់ខ្លួន។
កម្ពុជាបាននិងកំពុងប្រឈមនឹងបញ្ហាប្រកួតប្រជែងរួចហើយដោយសារថ្លៃផលិត និងការដឹកជញ្ជូនខ្ពស់ បើធៀបនឹងប្រទេសក្នុងតំបន់។
អាជ្ញាធរ បានត្រួតពិនិត្យលក្ខណៈបច្ចេកទេសយានយន្ត និងបណ្ណបើកបររថយន្តចំនួន ១ ៩៥៤ គ្រឿង នៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុរយៈពេល ១៥ ថ្ងៃគិតត្រឹមថ្ងៃទី ៣០ មិថុនា ឆ្នាំ ២០១៩។ ក្នុងនោះអាជ្ញាធររកឃើញរថយន្តចំនួន ២២៤ គ្រឿងល្មើសលិខិតស្នាម និងលក្ខណៈបច្ចេកទេស។
ការនាំចេញសំខាន់បំផុតរបស់កម្ពុជា គឺនៅក្នុងវិស័យវាយនភណ្ឌ និងផលិតផលកសិកម្ម ដែលជាក្បាលម៉ាស៊ីននៃកំណើនសេដ្ឋកិច្ច។
កាលពីឆ្នាំ ២០១៨ ប្រទេស កម្ពុជា បាននាំចេញសម្លៀកបំពាក់ និងស្បែកជើងមានតម្លៃសរុប ១០ ពាន់លានដុល្លារ កើនឡើង ២៤ ភាគរយ ធៀបនឹងឆ្នាំ ២០១៧។ នេះបើយោងតាមរបាយការណ៍ប្រចាំឆ្នាំ ២០១៨ របស់ធនាគារជាតិនៃកម្ពុជា៕LA