.jpg)
សកម្មភាពរាប់លុយរបស់អតិថិជនប្រើប្រាស់កម្ចីខ្នាតតូចនាពេលកន្លងមក។ ហេង ជីវ័ន
ភ្នំពេញៈ ប្រតិបត្តិករអាជីវកម្មក្នុងវិស័យឯកជនបានស្វាគមន៍ចំណាត់ការធនាគារជាតិនៃកម្ពុជា (NBC) ដែលទើបចេញសារាចរណែនាំដល់គ្រឹះស្ថានធនាគារ និងហិរញ្ញវត្ថុទាំងអស់នៅកម្ពុជាឲ្យរៀបចំ «ឥណទានឡើងវិញ» ដែលគេជឿថា គឺជាផ្នែកមួយនឹងជួយសម្រាលបន្ទុកទៅដល់អ្នកខ្ចីប្រាក់ដែលកំពុងប្រឈមនឹងការធ្លាក់ចុះ ឬបាត់បង់ប្រាក់ចំណូលនាអំឡុងពេលនេះ។
ធនាគារជាតិនៃកម្ពុជា (NBC) កាលពីថ្ងៃទី ២៧ ខែ មីនា ឆ្នាំ ២០២០ បានចេញនូវសារាចរណែនាំមួយដល់ស្ថាប័នហិរញ្ញវត្ថុស្តីពី «ឥណទានរៀបចំឡើងវិញ» ដែលជាចំណាត់ការត្រូវបានគេទន្ទឹងរង់ចាំមើលយ៉ាងអន្ទះសាក្រោយវិបត្តិវីរុសកូរ៉ូណាដែលប្រតិបត្តិករអាជីវកម្មយល់ថា «នឹងរួមចំណែកបន្ថយបន្ទុក» ក្នុងកាលៈទេសៈដ៏លំបាកនេះ។
NBC បានស្នើឲ្យរៀបចំឥណទានឡើងវិញដោយផ្តោតលើវិស័យអាទិភាពចំនួន ៤ រួមមាន វិស័យទេសចរណ៍ (សណ្ឋាគារ ផ្ទះសំណាក់ និងភោជនីយដ្ឋានដោយរាប់បញ្ចូលទាំងចំណីអាហារ ភេសជ្ជ និងសេវាកម្មគាំទ្រផ្សេងៗ) វិស័យកាត់ដេរ (រាប់បញ្ចូលទាំងនិយោជិត) វិស័យសំណង់ (ចំពោះតែឥណទានសាងសង់ផ្ទះ/ហាងដំបូង និងឥណទានទិញផ្ទះដំបូង) និងវិស័យដឹកជញ្ជូន (ជាពិសេសអ្នកបើកបរតាក់ស៊ី និងរ៉ឺម៉កកង់ ៣) និងឡូជីស្ទិក។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ខណៈវិស័យទេសចរណ៍នៅកម្ពុជាកំពុងជាប់គាំងខ្លាំងដែលធ្វើឲ្យលំហូរសាច់ប្រាក់អ្នកនៅក្នុងវិស័យនេះត្រូវជួបបញ្ហាគ្រប់គ្នានោះ សារាចររបស់ធនាគារជាតិនឹងក្លាយជាដំណោះស្រាយដ៏សំខាន់មួយរយៈសម្រាប់ពួកគេ។
អ្នកស្រីបន្តថា ការរីករាលដាលនៃជំងឺកូវីដ ១៩ បានធ្វើឲ្យក្រុមហ៊ុនទេសចរណ៍ស្ទើរទាំងអស់បាត់ចំណូលទាំងស្រុង និងមានមួយចំនួនចាប់ផ្តើមបិទទ្វារអាជីវកម្ម ព្រោះមិនមានថវិកាទ្រទ្រង់ប្រតិបត្តិការ។
អ្នកស្រីថ្លែងថា៖ «សារាចរណែនាំស្តីពី «ឥណទានរៀបចំឡើងវិញ» នឹងចូលរួមចំណែកច្រើនដល់វិស័យទេសចរណ៍តាមរយៈការរក្សានិរន្តរភាពវិស័យសេវាកម្មទេសចរណ៍ ក៏ដូចជាជួយដោះស្រាយដល់អ្នកបម្រើការងារក្នុងវិស័យនេះឲ្យមានលទ្ធភាពក្នុងការទូទាត់ជាមួយគ្រឹះស្ថានហិរញ្ញវត្ថុរហូតដល់អ្វីៗមានភាពល្អប្រសើរឡើងវិញ»។
ទិន្នន័យពីក្រសួងទេសចរណ៍បង្ហាញថា នៅក្នុងឆ្នាំ ២០១៩ កម្ពុជាទទួលបានប្រាក់ចំណូលពីវិស័យទេសចរណ៍អន្តរជាតិ ៤,៩១ លានដុល្លារ និងវិស័យទេសចរណ៍ក្នុងស្រុកមានតម្លៃប្រមាណ ៥០០ លានដុល្លារ ប៉ុន្តែអាជីវកម្មនេះរងផលប៉ះពាល់ដ៏ខ្លាំងក្លាមិនត្រឹមតែកម្ពុជានោះទេ ប៉ុន្តែទូទាំងពិភពលោក ដោយសារការរីករាលដាលវីរុសកូរ៉ូណាចាប់តាំងពីចុងឆ្នាំ ២០១៩។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបាននិយាយថា សារាចររបស់ធនាគារជាតិ គឺជាដំណឹងល្អសម្រាប់អ្នកនៅក្នុងវិស័យដឹកជញ្ជូនដែលជាវិស័យទទួលរងផលប៉ះពាល់យ៉ាងខ្លាំងចាប់តាំងពីការផ្ទុះឡើង និងរីករាលដាលជំងឺកូវីដ១៩មក។ ពេលដំបូងវិស័យដឹកជញ្ជូននៅកម្ពុជារងផលប៉ះពាល់តែពីការដឹកជញ្ជូនទំនិញជាមួយប្រទេសចិនប៉ុណ្ណោះ តែពេលនេះគឺគ្រប់គោលដៅទាំងអស់។ លោកបន្តថា ទោះយ៉ាងណាលោកមិនទាន់ដឹងថា សារាចរនេះអាចជួយដល់អ្នកពឹងផ្អែកលើចំណូលពីក្នុងវិស័យដឹកជញ្ជូនបានកម្រិតប៉ុនណានោះទេ។
លោកអះអាងថា៖ «ខ្ញុំស្វាគមន៍ចំណាត់ការរបស់ធនាគារជាតិ តែយើងគ្រប់គ្នាត្រូវធ្វើការជាមួយធនាគារឯកជន ហេតុនេះខ្ញុំមិនទាន់ដឹងថាគេនឹងអនុវត្តបន្តទៅបែបណានោះទេ»។
លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging Markets Consulting បានសរសេរនៅលើប្រព័ន្ធសង្គមរបស់លោកកាលពីថ្ងៃសៅរ៍ថា លោកសូមគាំទ្រចំពោះសារាចររបស់ធនាគារជាតិនៃកម្ពុជាក្នុងការតម្រូវឲ្យគ្រឹះស្ថានធនាគារ និងហិរញ្ញវត្ថុបន្ធូរបន្ថយលក្ខខណ្ឌកម្ចី និងការសងត្រឡប់នេះ ទោះបីជាសារាចរនេះមិនទាន់មានលក្ខណៈបរិយាប័ន្ន (Inclusive) គ្របដណ្តប់គ្រប់វិស័យក៏ដោយ។
លោកថ្លែងថា៖ «ធនាគារជាតិនៃកម្ពុជាគប្បីពង្រីកវិសាលភាពនៃសារាចរនេះឲ្យគ្របដណ្តប់វិស័យដទៃទៀត ដ្បិតអីផលប៉ះពាល់នៃជំងឺឆ្លងកូវីដ១៩ នេះមានផលអវិជ្ជមានស្ទើរគ្រប់វិស័យទាំងអស់»។
លោកលើកឡើងថា នៅក្នុងកាលៈទេសៈនេះផលប៉ះពាល់ពីជំងឺកូវីដ ១៩ គឺមានលើគ្រប់វិស័យទាំងអស់។ លោកបានថ្លែងថា៖ «ខ្ញុំជឿជាក់ថា ប្រសិនបើស្ថានភាពរីករាលដាលនៃកូវីដ ១៩ នៅតែបន្ត រដ្ឋាភិបាលប្រហែលជាត្រូវលូកដៃឲ្យជ្រៅជាងពេលនេះ»។
លោក Shin Chang Moo នាយកធនាគារ PPCBank បានឲ្យដឹងថា ធនាគារជាតិនៃកម្ពុជាកំពុងធ្វើការយ៉ាងមានប្រសិទ្ធភាព និងមានប្រសិទ្ធភាពក្នុងការការពារឧស្សាហកម្មដែលរងការខូចខាត និងវិស័យធនាគារក្នុងពេលតែមួយ ព្រោះវិស័យធនាគារគឺជាមធ្យោបាយចុងក្រោយក្នុងការគាំទ្រដល់សេដ្ឋកិច្ចជាតិ។
លោកថ្លែងថា៖ «ខ្ញុំប្រាកដណាស់ថា ធនាគារទាំងអស់កំពុងប្រឹងប្រែងអស់ពីសមត្ថភាពដើម្បីជួយអាជីវកម្មឲ្យបានច្រើនតាមដែលអាចធ្វើទៅបាននៅក្នុងវិស័យផ្សេងៗអាស្រ័យលើសមត្ថភាពរបស់ពួកគេ»។
យោងតាម NBC «ឥណទានរៀបចំឡើងវិញ» គឺជាឥណទានដែលលក្ខខណ្ឌនៃកិច្ចសន្យាដើមត្រូវបានកែប្រែដោយផ្តល់ការអនុគ្រោះដល់អតិថិជនដែលជួបស្ថានភាពលំបាកផ្នែកហិរញ្ញវត្ថុជាក់ស្តែង និងបណ្តោះអាសន្ន។
នៅក្នុងសារាចរនេះក៏បានណែនាំថា ការរៀបចំឥណទានឡើងវិញនេះ គ្រឹះស្ថានធនាគារ និងហិរញ្ញវត្ថុត្រូវកំណត់ឲ្យច្បាស់ថា អតិថិជនកំពុងជួបការលំបាកផ្នែកហិរញ្ញវត្ថុមុនពេលការអនុគ្រោះត្រូវបានផ្តល់ជូន។ ចំពោះឥណទានមិនដំណើរការនឹងត្រូវរក្សាចំណាត់ថ្នាក់នៅដដែល ទោះបីឥណទានទាំងនេះត្រូវបានរៀបចំឡើងវិញក៏ដោយ។
រាជរដ្ឋាភិបាលកម្ពុជាក៏ធ្លាប់បានប្រកាសពីការលើកលែងពន្ធដល់អាជីវកម្មសណ្ឋាគារ និងផ្ទះសំណាក់ក្នុងខេត្តសៀមរាបចំនួន ៤ ខែ ចាប់ពីខែកុម្ភៈ រហូតដល់ខែឧសភា។
កាលពីសប្តាហ៍មុនក្រសួងសេដ្ឋកិច្ច និងហិរញ្ញវត្ថុបានចេញប្រកាសលើកលែងពន្ធលើប្រាក់ចំណេញរយៈពេល ៦ ខែ ដល់អ្នកប្រកបអាជីវកម្មក្នុងវិស័យវាយនភណ្ឌកាត់ដេរនៅកម្ពុជាដែលរងផលប៉ះពាល់ដោយសារការដកប្រព័ន្ធអនុគ្រោះពន្ធ EBA ពីសហភាពអឺរ៉ុប៕ LA
វីដេអូ៖
