ភ្នំពេញ: វិស័យឯកជនស្វាគមន៍វិធានការបន្តបន្ទាប់ពីរដ្ឋាភិបាលក្នុងការជំរុញកំណើនសេដ្ឋកិច្ច និងសកម្មភាពអាជីវកម្មក្នុងអំឡុងពេលការរីករាលដាលជំងឺកូវីដ ១៩។
កាលពីថ្ងៃពុធ រដ្ឋាភិបាលបានប្រកាសដាក់ចេញវិធានការបន្ថែមជុំទី៦ សម្រាប់វិស័យកាត់ដេរ វាយនភណ្ឌ វិស័យទេសចរណ៍ និងវិស័យអាកាសចរណ៍នៅតែជាវិស័យដែលទទួលរងផលប៉ះពាល់ខ្លាំងជាងគេពីវិបត្តិកូវីដ ១៩។ សម្រាប់វិស័យកាត់ដេរ រដ្ឋាភិបាលនឹងបន្តផ្ដល់ប្រាក់ឧបត្ថម្ភចំនួន ៤០ ដុល្លារ ក្នុង ១ ខែ ដល់កម្មករ-កម្មការិនី ដែលបាត់បង់ការងារ ឬរោងចក្ររបស់ពួកគេត្រូវព្យួរការងារ។
កម្មវិធីនេះនឹងបន្ត ៣ ខែទៀតរហូតដល់ដំណាច់ខែធ្នូ ឆ្នាំ ២០២០ នេះ។ ម្ចាស់រោងចក្រត្រូវបន្ថែម ៣០ ដុល្លារ ទៅលើចំនួន ៤០ ដុល្លារនេះ ដើម្បីឱ្យកម្មករ-កម្មការិនីទទួលបាន ៧០ ដុល្លារ ក្នុង ១ ខែ។
លោក ខេន លូ អគ្គលេខាធិការសមាគមរោងចក្រកាត់ដេរកម្ពុជា (GMAC) សាទរជាមួយនឹងការអន្តរាគមន៍ពីរដ្ឋាភិបាល ដើម្បីជួយដល់ឧស្សាហកម្មនេះ ដែលកំពុងត្រូវបានទទួលរងផលប៉ះពាល់យ៉ាងខ្លាំងដោយសារការរីករាលដាលវីរុសកូរ៉ូណា។
លោកថ្លែងថា៖ «ការសម្រេចចិត្តក្នុងការបន្តផែនការ ៤០ ដុល្លារ សម្រាប់កម្មករដែលព្យួរការងារគឺល្អខ្លាំងណាស់។ ការបន្តនេះនឹងជួយដល់កម្មករដែលរងផលប៉ះពាល់នៅក្នុងពេលវេលាដ៏ពិបាក ហើយជាមួយគ្នានេះក៏ជួយដល់ថៅកែផងដែរ។ ថៅកែមិនមានការបញ្ជាទិញនៅពេលបច្ចុប្បន្នអាចដាក់ពាក្យសុំការផ្អាកដំណើរការ និងប្រើប្រាស់ពេលវេលាក្នុងការព្យាយាម និងទទួលបានឱកាសវិនិយោគថ្មីៗ»។ លោកថា៖ «ការពន្យារពេលពន្ធសម្រាប់ផែនការការពារសង្គមក៏នឹងបន្ទូរបន្ថយបន្ទុករបស់ថៅកែបន្ថែមទៀតផងដែរ»។
សម្រាប់អ្នកបម្រើការក្នុងវិស័យទេសចរណ៍រួមមានសណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ពួកគេនឹងទទួលបាន ៤០ ដុល្លារ រយៈពេល ៣ ខែដូចគ្នា។ ម្ចាស់រោងចក្រត្រូវបន្ថែមប្រាក់តាមលទ្ធភាពទៅលើចំនួន ៤០ ដុល្លារនេះ។
ជាមួយគ្នានេះដែរ រដ្ឋាភិបាលក៏បន្តលើកលែងពន្ធ ៣ ខែទៀតសម្រាប់សណ្ឋាគារ ផ្ទះសំណាក់ ភោជនីយដ្ឋាន និងភា្នក់ងារទេសចរណ៍ដែលបានចុះបញ្ជី។ ការលើកលែងនេះសម្រាប់ទីតាំងអាជីវកម្មទេសចរណ៍នៅកំពត ព្រះសីហនុ កែប ខេត្តសៀមរាប រាជធានីភ្នំពេញ ក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ។
លោក ធួន ស៊ីណាន ប្រធាន PATA Cambodia chapter បានទទួលស្គាល់ការធ្វើអន្តរាគមន៍សកម្មមុនពីរដ្ឋាភិបាលក្នុងការជួយឧស្សាហកម្មទេសចរណ៍ ទោះបីជាវាមិនច្រើនក៏ដោយ។ លោកបញ្ជាក់ថា៖ «យើងពិតជាកោតសរសើរការជួយពីរដ្ឋាភិបាលសម្រាប់ឧស្សាហកម្មរបស់យើង។ ទោះយ៉ាងណា យើងចង់ឲ្យរដ្ឋាភិបាលបង្កើតនូវមូលនិធិពិសេសសម្រាប់វិស័យទេសចរណ៍សម្រាប់ក្រោយជំងឺកូវីដ ១៩ ដោយសារតែអាជីវករភាគច្រើនមិនទទួលបានប្រាក់ចំណូលទាល់តែសោះ ដូច្នេះយើងចង់ឲ្យរដ្ឋាភិបាលពិចារណាលើសំណើរបស់យើង នៅពេលដែលវីរុសកូរ៉ូណាត្រូវទប់ស្កាត់បាន»។
កាលពីខែឧសភា រាជរដ្ឋាភិបាលបានប្រកាសផ្ដល់កម្ចីពី ៥០០ លានដុល្លារ ដល់ ៦០០ លានដុល្លារ មានអត្រាការប្រាក់ទាបសម្រាប់សហគ្រាសធុនតូច និងមធ្យម (SMEs)។ ក្នុងចំណោមនោះលោក ស៊ីណាន ឲ្យដឹងថា រដ្ឋាភិបាលគួរតែកំណត់ផែនការដូចគ្នាដែលផ្ដល់សម្រាប់វិស័យទេសចរណ៍តែប៉ុណ្ណោះ។
យោងតាមសេចក្ដីប្រកាសកាលពីថ្ងៃពុធ រដ្ឋាភិបាលក៏ពន្យារពេលពន្ធសម្រាប់ផែនការការការពារសង្គម លើកលែងពន្ធប៉ាតង់ និងពន្ធលើអគារ និងពន្យារពេលការធ្វើសវនកម្មរបស់អគ្គនាយកដ្ឋានពន្ធដារលើទីភ្នាក់ងារទេសចរណ៍ និងប្រតិបត្តិករនៅក្នុងវិស័យទេសចរណ៍។ ពន្ធអប្បបរមា សម្រាប់ក្រុមហ៊ុនទេសចរណ៍ដែលបានចុះបញ្ជីនៅកម្ពុជានឹងត្រូវពន្យាររយៈពេល ៣ ខែផងដែរ។
ធនាគារពិភពលោកកាលពីថ្ងៃចន្ទបានកែតម្រូវការព្យាករកំណើន សេដ្ឋកិច្ចប្រទេសកម្ពុជាសម្រាប់ឆ្នាំ ២០២០ នេះមកនៅត្រឹមដក ២ ភាគរយ ដោយបានកែតម្រូវពីចន្លោះដក ១ ភាគរយ និងដក ២,៩ ភាគរយ កាលពីខែឧសភាកន្លងមក ដោយសារតែវិស័យជំរុញកំណើនសំខាន់ៗដូចជាសំណង់ ទេសចរណ៍ និងការនាំចេញទំនិញបន្តរងផលប៉ះពាល់យ៉ាងខ្លាំងដោយសារតែការរីករាលដាលជំងឺកូវីដ១៩៕LA