.jpg)
លោក ម៉ានូ រ៉ាចាន់ (រូបស្តាំ) អគ្គនាយកនៃធនាគារឯកទេស វីង។
គិតមកដល់ថ្ងៃទី ១៦ ខែតុលា នេះមានប្រជាជនកម្ពុជារាប់រយគ្រួសារបានទទួលថវិកាសង្គ្រោះបន្ទាន់ បន្ទាប់ពីធនាគារឯកទេសវីង (ខេមបូឌា) លីមីតធីត បានបើកបណ្តាញសេវាហិរញ្ញវត្ថុរបស់ខ្លួនឱ្យអង្គការ អុកស្វាមកម្ពុជា និងដៃគូផ្តល់ជំនួយបន្ទាន់ដល់កម្មករដែលរងគ្រោះដោយវិបត្តិសេដ្ឋកិច្ចនៃជំងឺរាតត្បាតកូវីដ១៩។
នៅក្នុងខែកញ្ញា អង្គការអុកស្វាមកម្ពុជាបានសហការជាមួយធនាគារឯកទេសវីង ដើម្បីផ្ទេរសាច់ប្រាក់ទៅឱ្យកម្មករងាយរងគ្រោះ និងសមាជិកសហគមន៍ផ្សេងដទៃទៀតប្រមាណ ៣ ០០០ នាក់ដោយរួមបញ្ចូលទាំងថ្នាក់ដឹកនាំមូលដ្ឋាន និងតំណាងកម្មករផងដែរ។ អង្គការអុកស្វាមកម្ពុជាក៏បានចែកជូននូវសម្ភារការពារ និងបង្ការមេរោគកូវីដ១៩ ដល់សមាជិកចំនួន ១ ០០០ នាក់នៅក្នុងបណ្តាញអង្គការដៃគូរបស់ខ្លួនផងដែរ។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានមានប្រសាសន៍ថា គំនិតផ្តួចផ្តើមរបស់ធនាគារឯកទេសវីងជាមួយ អង្គការអុកស្វាមកម្ពុជាគឺជាផ្នែក ១ នៃកិច្ចខិតខំប្រឹងប្រែងរបស់វីងដើម្បីជួយដល់គ្រួសារខ្មែរឱ្យអាចដោះស្រាយជីវភាពបានក្នុងគ្រាលំបាកនេះ។
លោក ម៉ានូ បានមានប្រសាសន៍បន្ថែមថា៖ «ក្នុងនាមជាពលរដ្ឋសាជីវកម្មដែលមានការទទួលខុសត្រូវ វាចាំបាច់ដែលយើងត្រូវខិតខំប្រឹងប្រែងឱ្យអស់ពីលទ្ធភាពដើម្បីផ្តល់ការគាំទ្រដល់ប្រជាជនរបស់យើង។ ធនាគារឯកទេសវីងត្រៀមខ្លួនរួចជាស្រេច និងមានឆន្ទៈចូលរួមជាមួយដៃគូ និងសហគមន៍ដើម្បីការពារប្រជាជនកម្ពុជាឱ្យឆ្លងកាត់គ្រាលំបាកទាំងនេះបាន»។
ដោយពិចារណាលើស្ថានភាពនៃជំងឺកូវីដ១៩ ដែលមិនធ្លាប់មានពីមុនមក ធនាគារឯកទេស វីង បាន រៀបចំឱ្យមានគំនិតផ្តួចផ្តើមផ្សេងៗដោយផ្តោតលើការជួយដល់អ្នកដែលបាត់បង់ប្រភពប្រាក់ចំណូល។ នេះរួមបញ្ចូលទាំងការរៃអង្គាសប្រាក់ដើម្បីគាំទ្រដល់អ្នករត់រ៉ឺម៉ក និងមគ្គុទេសក៍ទេសចរណ៍ ក៏ដូចជាមន្ទីរពេទ្យកុមារអង្គរដែលផ្តល់ការព្យាបាលដល់កុមារដោយឥតគិតថ្លៃ។ កាលពីខែមីនាកន្លងទៅ ធនាគារឯកទេសវីង បានបើកឱ្យមានការផ្ទេរប្រាក់ពីគណនេយ្យវីងទៅគណនេយ្យវីងដោយឥតគិតថ្លៃដល់អតិថិជនរបស់ខ្លួនទាំងអស់នៅក្នុងប្រទេសកម្ពុជាដែលអនុញ្ញាតឱ្យពួកគេប្រើកម្មវិធីស្មាតហ្វូនវីងដើម្បីផ្ញើប្រាក់ទៅមនុស្សជាទីស្រឡាញ់ដោយមិនចាំបាច់ធ្វើដំណើរចេញពីផ្ទះ។
លោកស្រី លឹម សូលីន នាយិកាអង្គការអុកស្វាមប្រចាំកម្ពុជាបានមានប្រសាសន៍ថា៖ «ស្របពេលដែលមានការឆ្លើយតបពីសំណាក់រាជរដ្ឋាភិបាលកម្ពុជា វិស័យឯកជន និងបណ្តាអ្នកដែលបានចូលរួមទាំងឡាយដែលបានជួយគាំទ្រកម្មករដែលងាយរងគ្រោះក្នុងអំឡុងពេលដ៏លំបាកនេះ អុកស្វាម និងដៃគូពាក់ព័ន្ធមានជំនឿថា ការផ្តល់ការជួយគាំទ្រដល់តំណាងកម្មករក៏មានសារៈសំខាន់ផងដែរ។ ព្រឹត្តិការណ៍នេះបានបង្ហាញពីសាមគ្គីភាពរបស់យើងទាំងអស់គ្នាដើម្បីជំរុញឱ្យមានកិច្ចគាំពារសង្គមមួយប្រកបដោយបរិយាប័ន្នសម្រាប់កម្មករដែលងាយរងគ្រោះជាពិសេសស្ត្រី និងកុមារ និងដើម្បីចូលរួមជួយកាត់បន្ថយភាពងាយរងគ្រោះរបស់ពួកគាត់ និងបង្កើនភាពធន់ អំឡុងពេលមានវិបត្តិនាពេលបច្ចុប្បន្ន និងអនាគត»។
អង្គការអុកស្វាមបានគាំទ្រប្រជាជនកម្ពុជាចាប់តាំងពីឆ្នាំ ១៩៧៩ ដោយផ្តោតលើការអភិវឌ្ឍ សមភាពយេនឌ័រ និងការគ្រប់គ្រងធនធានធម្មជាតិ។
ដោយមើលឃើញពីផលប៉ះពាល់នៃជំងឺកូវីដ ១៩ ធនាគារឯកទេស វីង កំពុងតែពង្រីកសេវាកម្មហិរញ្ញវត្ថុរបស់ខ្លួនដល់ដៃគូជាច្រើនដែលកំពុងជួយប្រជាជនទូទៅ។ ក្រៅពីអង្គការអុកស្វាមកម្ពុជា វីងក៏បានធ្វើការជាមួយទីភ្នាក់ងាររដ្ឋាភិបាល និងអង្គការមិនមែនរដ្ឋាភិបាលជាច្រើនផងដែរ។
គិតចាប់តាំងពីខែឧសភាមក ធនាគារឯកទេស វីង បានពង្រីកការគាំទ្រដល់ក្រសួងការងារ និងបណ្តុះបណ្តាលវិជ្ជាជីវៈក្នុងការផ្តល់ការគាំទ្រផ្នែកហិរញ្ញវត្ថុដល់កម្មករដែលត្រូវបានព្យួរការងារពីវិស័យកាត់ដេរសម្លៀកបំពាក់ និងវិស័យទេសចរណ៍។ ហើយចាប់ពីខែមិថុនាមក ក្រសួងសង្គមកិច្ច អតីតយុទ្ធជន និងយុវនីតិសម្បទាក៏បានប្រើប្រាស់សេវាកម្មហិរញ្ញវត្ថុ ធនាគារឯកទេស វីងដើម្បីចែកប្រាក់ឧបត្ថម្ភប្រចាំខែដល់ប្រជាជនដែលងាយរងគ្រោះ ឬរស់នៅក្នុងភាពក្រីក្រផងដែរ៕
