.jpg)
អតិថិជនកំពុងផ្ទេរប្រាក់នៅភ្នាក់ងាររបស់ធនាគារវីងស្ថិតនៅតាមបណ្តោយផ្លូវ ២៩៤ ក្នុងរាជធានីភ្នំពេញ។ ផា លីណា
ភ្នំពេញៈ ធនាគារឯកទេស វីង ដែលជាក្រុមហ៊ុនផ្ដល់សេវាធនាគារចល័ត នាពេលថ្មីៗនេះបានដាក់ឲ្យដំណើរការសេវាប្រាក់បញ្ញើអន្តរជាតិពីប្រទេសម៉ាឡេស៊ី ដោយកំណត់ទិសដៅជនជាតិកម្ពុជាដែលធ្វើការងារ និងស្នាក់នៅទីនោះ បន្ទាប់ពីសម្រេចបានកិច្ចព្រមព្រៀងភាពជាដៃគូជាមួយក្រុមហ៊ុន Valyou ដែលជាក្រុមហ៊ុនបច្ចេកវិទ្យាហិរញ្ញវត្ថុប្រទេសម៉ាឡេស៊ី។
ធនាគារ វីងរកប្រាក់ចំណេញបាន ១,៧ លានដុល្លារកាលពីឆ្នាំ ២០១៧ ជាមួយនឹងទ្រព្យសកម្មសរុបចំនួន ២៧,៤ លានដុល្លារ។ នេះបើយោងតាមរបាយការណ៍ត្រួតពិនិត្យប្រចាំឆ្នាំរបស់ធនាគារជាតិនៃកម្ពុជា (NBC)។
យោងតាមសេចក្ដីប្រកាសរបស់ធនាគារវីង ប្រជាជនកម្ពុជាជាង ១៥០ ០០០ នាក់នៅក្នុងប្រទេសម៉ាឡេស៊ីកំពុងធ្វើការងារនៅក្នុងឧស្សាហកម្មផ្សេងៗ ដែលរួមមាន កសិកម្ម សំណង់ កម្មន្តសាល (ផលិតកម្ម) នេសាទ និងសេវាបម្រើការងារតាមផ្ទះ ហើយពួកគេនឹងទទួលអត្ថប្រយោជន៍ពីសេវាហិរញ្ញវត្ថុតាមបច្ចេកវិទ្យាថ្មីដែលផ្ដល់ដោយធនាគារវីង និងក្រុមហ៊ុន Valyou នេះ។
លោក Jojo Malolos អគ្គនាយកធនាគារវីង បានថ្លែងថា៖ «វាជាបេសកកម្មរបស់យើងក្នុងការផ្ដល់មធ្យោបាយរហ័ស សុវត្ថិភាព និងងាយស្រួលសម្រាប់ប្រជាជនកម្ពុជារាប់ពាន់នាក់នៅបរទេសក្នុងការផ្ញើប្រាក់ទៅមនុស្សជាទីស្រឡាញ់របស់ពួកគេនៅក្នុងប្រទេសកម្ពុជា»។
តាមរយៈភាពជាដៃគូនេះអតិថិជនដែលមានបំណងប្រាក់បញ្ញើត្រឡប់ទៅផ្ទះ នៅពេលនេះអាចផ្ញើប្រាក់ដោយផ្ទាល់ដោយប្រើប្រាស់កម្មវិធី Valyou Mobile Wallet ឬពីទីតាំង Valyou ជាង ២ ៥០០ កន្លែងនៅទូទាំងប្រទេសម៉ាឡេស៊ី។ នៅពេលផ្ទេរប្រាក់ ប្រាក់ដែលបានផ្ញើអាចត្រូវបានដកនៅតាមគណនីវីងរបស់អ្នកទទួល ឬអាចដកប្រាក់នៅភ្នាក់ងារវីងជាង ៥ ០០០ កន្លែងនៅក្នុងប្រទេសកម្ពុជា៕ LA
