.jpg)
វីរៈ ប៊ុនថាំ បញ្ចេញរថយន្តចល័តចំនួន ៦៤ គ្រឿង លក់គ្រឿងឧបភោគបរិភោគនៅតំបន់បិទខ្ទប់ ដើម្បីរក្សាតម្លៃទំនិញលើទីផ្សារ។ រូបថត សហការី
ភ្នំពេញ៖ អគ្គនាយកក្រុមហ៊ុន វីរៈ ប៊ុនថាំ អេចប្រេស លោក សួរ វីរៈប្រេស ប្រាប់ ភ្នំពេញ ប៉ុស្តិ៍ថា នៅថ្ងៃទី ២៣ មេសានេះ ក្រុមហ៊ុនដែលបានសហការជាមួយសាលារាជធានីភ្នំពេញ បានបញ្ចេញរថយន្តចល័តចំនួន ៦៤ គ្រឿង លក់គ្រឿងឧបភោគបរិភោគ ដែលមានបន្លែ ត្រី សាច់ ដែលមានតម្លៃសមរម្យលក់ជូនប្រជាពលរដ្ឋនៅតំបន់ក្រហម ដើម្បីរក្សាតម្លៃទំនិញលើទីផ្សារ។
ដើម្បីបិទបញ្ចប់ការឆ្លងរាលដាលជំងឺកូវីដ ១៩ ក្នុងព្រឹត្តិការណ៍ ២០ កុម្ភៈ ឱ្យបានឆាប់ រដ្ឋាភិបាលកម្ពុជាបានដាក់ចេញនូវវិធានការរឹតបន្តឹងការធ្វើដំណើរ និងដឹកជញ្ជូនទំនិញឆ្លងពីតំបន់បិទខ្ទប់។
លោក សួរ វីរៈ បានឲ្យដឹងថា រថយន្តនឹងចល័តទៅគោលដៅចំនួន ១៤ ទីតាំង រួមមានផ្សារថ្មី ផ្សារអូរប្ញស្សី Century Plaza TK ផ្សារត្រពាំងក្រឡឹង ផ្សារស្ទឹងមានជ័យថ្មី ផ្សារកាណាឌីយ៉ា ផ្លួវឌួងងៀប មុខបុរីសូនី កាំកូស៊ីធីផ្លូវភ្លោះ មុខផ្សារដើមគរ ផ្សារអូឡាំពិច ផ្សារទួលទំពូង និងផ្សារចាស់។
លោកថ្លែងថា៖ «យើងមិនទាន់បានកំណត់ពេល យើងដឹកជញ្ជូនក្នុងអំឡុងពេលដែលមានការបិទខ្ទប់ អ៊ីចឹងនៅពេលរាជរដ្ឋាភិបាលយើងបើកចំហវិញ គឺយើងក៏បិទវិញដែរ។ ពាក់ព័ន្ធនឹងតម្លៃលក់ក្នុងតម្លៃគាត់លក់នៅផ្សារជាធម្មតា ហើយអាចនឹងតម្លៃថោកជាងផងដែរ»។
ដើម្បីរក្សាតម្លៃទំនិញនៅលើទីផ្សារ ក្រសួងពាណិជ្ជកម្មតាមរយៈក្រុមហ៊ុន ហ្គ្រីន ត្រេដ ក៏បានបញ្ចេញរថយន្ត និងស្តង់ទំនិញមួយចំនួនលក់ទំនិញចាំបាច់មួយចំនួនជូនប្រជាពលរដ្ឋនៅតំបន់ក្រហមផងដែរ។
ក្នុងរយៈពេល ៨ ថ្ងៃ គិតចាប់ពីថ្ងៃទី ១៥ ដល់ ថ្ងៃទី ២២ ខែ មេសា ឆ្នាំ ២០២១ នេះ រថយន្ដចល័តរបស់ក្រសួងពាណិជ្ជកម្ម លក់អង្ករបានសរុបចំនួន ៨២៨ បាវ មីជាតិចំនួន ៣ ៨៥៨ កេស ទឹកត្រីចំនួន ៨៩៧ យួរ ទឹកស៊ីអ៊ីវចំនួន ៦៣៣ យួរ ត្រីខ ចំនួន ១ ១០២ យួរ ទឹកសុទ្ធចំនួន ១០២ យួរ បន្លែ ១១៥ គីឡូក្រាម និងសាច់ក្រក ១៣ គីឡូក្រាម៕
