The Phnom Penh Post Search

Search form




Logo of Phnom Penh Post newspaper Phnom Penh Post - វៀតណាម​បន្ត​កូតា​ថ្នាំ​ជក់​ជា​ថ្មី​ដល់​កម្ពុជា

វៀតណាម​បន្ត​កូតា​ថ្នាំ​ជក់​ជា​ថ្មី​ដល់​កម្ពុជា

Content image - Phnom Penh Post
កសិករ​ដាំ​ថ្នាំ​ជក់​នៅ ខេត្ត​កំពង់ចាម កំពុង​ពិនិត្យ​ស្លឹក​ថ្នាំ​ក្នុង​ចម្ការ។ ភ្នំពេញ ប៉ុស្តិ៍

វៀតណាម​បន្ត​កូតា​ថ្នាំ​ជក់​ជា​ថ្មី​ដល់​កម្ពុជា

ភ្នំពេញៈ វៀតណាម​បន្ត​កូតា​ថ្នាំ​ជក់​រួច​ពន្ធ ៣០០០ តោន​សម្រាប់​កម្ពុជា​​នៅ​ឆ្នាំ​នេះ​ដើម្បី​ឆ្លើយតប​តម្រូវ​ការ​ទីផ្សារ។ ការ​ប្រកាស​បន្ត​កូតា​ជា​ថ្មី​​ត្រូវ​បាន​​ធ្វើ​ឡើង​កាល​ពីខែ​មីនា​ដោយ​​ក្រសួង​ពាណិជ្ជ​កម្ម។

ខណៈ​​កូតា​ត្រូវ​បាន​បន្ត​ជា​ថ្មី កសិករ​​បាន​លើក​ឡើង​ពី​ការ​បារម្ភ​អំពី​តម្លៃ​ថ្នាំជក់​ដែល​ធ្លាក់​ចុះ​​ដល់​កម្រិត​ទាប​បំផុត​កាល​ពី​រយៈ​ពីរ​បី​ឆ្នាំ​ចុង​ក្រោយ​នេះ​។​

លោក​ ឆាយ​ វី​ ប្រធាន​សមាគម​កសិករ​ថ្នាំជក់ (TFA) បាន​ប្រាប់​ភ្នំពេញ ប៉ុស្ដិ៍ ថា តម្លៃ​ថ្នាំ​ជក់​​​នៅ​ឆ្នាំ​នេះ​ធ្លាក់ចុះ​ខ្លាំង​ធៀប​នឹង​ឆ្នាំ ២០១៤ សម្រាប់​កសិករ​ដែល​មិន​ត្រូវ​បាន​គេ​ផ្ដល់​កិច្ច​ព្រម​ព្រៀង​ធ្វើ​ការ​ដាំដុះ​ជាមួយ​ក្រុមហ៊ុន British American Tobacco (BAT) ដែល​ជា​ក្រុមហ៊ុន​​ទិញ​ធំ​ជាង​​គេ​ក្នុង​ប្រទេស​នេះ។

លោក​ថ្លែង​ថា៖ «ថ្នាំ​ជក់​លក់​ទៅ​ឲ្យ BAT អាច​មាន​តម្លៃ ៧០០០ រៀល ក្នុង​មួយ​គីឡូ​ក្រាម​។​ តម្លៃ​នេះ​នៅតែ​ល្អ​ច្រើន​ដូចគ្នា​នឹង​ឆ្នាំ​មុន។​ ប៉ុន្តែ​សម្រាប់​ថ្នាំ​ដែល​នៅ​សល់​ពី​កិច្ចព្រម​ព្រៀង​របស់ BAT វាអាច​ត្រូវ​បាន​គេលក់​​ក្នុង​តម្លៃ​ប្រហែល ២៥០០ រៀល ក្នុង​មួយ​គីឡូក្រាម​ ដែល​ធ្លាក់​ចុះ​ពី ៦០០០ រៀល ក្នុង​មួយ​គីឡូ​ក្រាម​ពីឆ្នាំ​មុន»។

តាម​​លោក វី​ BAT ​ទិញ​ថ្នាំ​ជក់​គុណ​ភាព​កម្រិត​ទី ១ ប៉ុណ្ណោះ​ ខណៈ​ថ្នាំជក់​កម្រិត​ទី ២ និង​កម្រិត ៣ ​ត្រូវ​បាន​គេ​លក់​​ក្នុង​ស្រុក និង​លក់​ឲ្យ​អ្នក​ទិញ​ជនជាតិ​វៀតណាម។

លោក​ថ្លែង​ថា​ ការ​ធ្លាក់​ចុះ​តម្លៃ​ថ្នាំ​ជក់​គឺ​ដោយ​សារ​តម្រូវ​ការ​​ក្នុង​ស្រុក និង​តម្រូវ​ការ​ពី​អ្នក​ទិញ​របស់​ប្រទេស​វៀតណាម​កាន់​តែ​ទាប ហើយ​ជម្រើស​ទីផ្សារ​នៅ​មាន​​កម្រិត​​សម្រាប់​កសិករ។

លោក​បន្ថែម​ថា៖ «មិន​មាន​ទី​ផ្សារ​ផ្សេង​ទៀត​នោះ​ទេ​សម្រាប់​ថ្នាំ​​ជក់​កម្រិត​ទី ២ ក្រៅពី​អ្នក​ទិញ​ជា​ឈ្មួញ​​វៀតណាម​។ វា​ពិបាក​សម្រាប់​កសិករ​នៅ​ពេល​មាន​កន្លែង​មួយ​​កំណត់​ជម្រើស​ថ្នាំ​ជក់​របស់​យើង​នោះ»។

លោក​ សុខ សុភ័ក្ត​ អគ្គនាយក​នៃ​អគ្គ​នាយក​ដ្ឋាន​ពាណិជ្ជកម្ម​អន្តរជាតិ​នៃ​ក្រសួង​ពាណិជ្ជកម្ម​ថ្លែង​ថា​ ទោះ​បី​វៀតណាម ផ្ដល់​កូតា​ថ្នាំ​ជក់​ដល់​កម្ពុជា​ក៏​ដោយ ក៏​ការ​បញ្ជា​ទិញ និង​តម្លៃ​​មិន​ទាន់​កំណត់​​ទេ។

លោកបន្តថា៖ «វៀតណាម​​មិន​មែន​ទិញ​តែ​ថ្នាំជក់​ពី​កម្ពុជា​ប៉ុណ្ណោះ​ទេ។ ពួកគេ​​ក៏​បាន​ទិញ​ពី​ចិន និង​ឥណ្ឌា​ផង​ដែរ»។

លោកថា កសិករ​​គួរ​តែ​​ផ្តោត​លើ​គុណភាព​ដើម្បី​ចាប់​យក​ទី​ផ្សារ​​មាន​តម្លៃ​​កាន់​តែ​ខ្ពស់។

វៀតណាម​បាន​យល់​ព្រម​លុប​ចោល​ពន្ធ​នាំ​ចូល​ថ្នាំ​ជក់​លើ​បរិមាណ​ជាក់​លាក់​​ពី​​កម្ពុជា​​ចាប់​តាំង​ពី​ឆ្នាំ ២០០៧។

តួលេខ​ពី​មន្ទីរ​កសិកម្ម​ខេត្ត​​ដែល​ដាំថ្នាំជក់​បង្ហាញ​ថា ការ​ដាំ​ដុះ​ថ្នាំជក់​​នៅ​ក្នុង​ប្រទេស​កម្ពុជា​​លើ​ផ្ទៃដី​ប្រហែល ១១០០០ ហិកតា។ ឧស្សាហកម្ម​នេះ​​ផលិត​ថ្នាំជក់​បាន​ប្រហែល ២,៥ តោន​ក្នុង​មួយ​ហិកតា៕PB

អត្ថបទគួរចាប់អារម្មណ៍