ក្រុងវៀងចន្ទន៍ៈ ប្រទេសឡាវបានក្លាយជាទិសដៅវិនិយោគបរទេសកំពូល សម្រាប់វៀតណាមដោយសារសាមគ្គីភាពពិសេស និងកិច្ចសហប្រតិបត្តិការទូលំទូលាយរវាងប្រទេសទាំង ២។
ក្រុមហ៊ុនវៀតណាមបានវិនិយោគជិត ១៥០ លានដុល្លារក្នុងគម្រោងវិនិយោគចំនួន ២៨ ក្នុងប្រទេស និងដែនដីចំនួន ១៦ ចាប់ពីខែមករាដល់ខែមីនាឆ្នាំនេះ។ នេះបើយោងតាមសេចក្តីរាយការណ៍ព័ត៌មានមួយរបស់វៀតណាម។
ក្រសួងរៀបចំផែនការវៀតណាម និងទីភ្នាក់ងារវិនិយោគបរទេសត្រូវបានដកស្រង់សម្តីដោយសារព័ត៌មាន Vietnam ខណៈឲ្យដឹងថាក្នុងចំណោមប្រទេសទាំងនោះ ប្រទេសឡាវបានទាក់ទាញការវិនិយោគរបស់វៀតណាមច្រើនជាងគេស្មើ ៥៣,៥ ភាគរយ។ បន្ទាប់មកកម្ពុជា (១៧,៣ ភាគរយ) គុយបា (១៣,៣ ភាគរយ) និងអូស្ត្រាលី (៨ ភាគរយ)។
លោក Manothong Vong-say អគ្គនាយកនៃក្រសួងរៀបចំផែនការរបស់ឡាវ និងនាយកដ្ឋានជំរុញការវិនិយោគបានប្រាប់សារព័ត៌មាន Vientiane Times កាលពីថ្ងៃចន្ទថា ការវិនិយោគពីប្រទេសវៀតណាមនៅឡាវបានធ្វើពិពិធកម្មចូលទៅក្នុងវិស័យជាច្រើនផ្សេងទៀតនាពេលថ្មីៗនេះ។
លោក Manothong បានបន្តឲ្យដឹងទៀតថា៖ «សហគ្រិនវៀតណាមជាច្រើន បច្ចុប្បន្នកំពុងវិនិយោគក្នុងវិស័យសេវាកម្មរួមមាន សណ្ឋាគារ និងធនាគារជាដើម»។
វៀតណាម គឺជាវិនិយោគិនបរទេសធំជាងគេទី ៣ នៅឡាវ បន្ទាប់ពីចិន និងថៃ។
ក្រុមសេដ្ឋវិទូបានឲ្យដឹងថា ការមានទីតាំងនៅជិតគ្នារបស់ប្រទេសឡាវ គឺជាមូលហេតុមួយក្នុងចំណោមមូលហេតុចម្បង ដែលវិនិយោគិនវៀតណាមមានបំណងប្រកបអាជីវកម្មនៅទីនោះ។
ការវិនិយោគរបស់វៀតណាមបានចូលរួមចំណែកដល់កំណើនសេដ្ឋកិច្ច និងការបង្កើតការងារច្រើននៅឡាវ៕ BP