.jpg)
បន្លែដាំដុះក្នុងខេត្តអាន យ៉ាងភាគខាងត្បូងវៀតណាមតាំងលក់ក្នុងផ្សារទំនើប។ រូបភាព VNS
ទីក្រុងហាណូយៈ ក្រសួងកសិកម្ម និងអភិវឌ្ឍន៍ជនបទវៀតណាមកំពុងធ្វើការងារលើកស្ទួយការចែកចាយផលិតផលចេញពីកសិដ្ឋាន ចំពេលនៃការរីករាលដាលជំងឺកូវីដ១៩រលកទី ៤ ក្នុងប្រទេសវៀតណាម។
នាយកដ្ឋានកែច្នៃកសិកម្មនៃក្រសួងនេះ និង អាជ្ញាធរអភិវឌ្ឍន៍ទីផ្សារបាននិយាយថា ការចែកចាយផលិតផលកសិកម្ម នៅតែមានស្ថិរភាពក្នុងពេលថ្មីៗនេះ ចំពេលកើតមានរលកទី ៤ នៃវីរុសក្នុងប្រទេស។
យោងតាមគណៈគ្រប់គ្រងតំបន់សេដ្ឋកិច្ចព្រំដែន Dong Dang ក្នុងខេត្ត Lang Son មានការកកស្ទះការធ្វើចរាចរណ៍តួកុងតឺន័រ ដឹកជញ្ជូនផលិតផលកសិកម្មទៅកាន់ប្រទេសចិន នៅច្រកព្រំដែន Huu Nghi បន្ទាប់ពីថ្ងៃឈប់សម្រាកក្នុងទិវារួបរួមកាលពីថ្ងៃទី ៣០ មេសា និង ទិវាពលកម្មអន្តរជាតិ ១ ឧសភា។ ទោះយ៉ាងណា ការកកស្ទះត្រូវបានដោះស្រាយ។
លោក Phung Duc Tien អនុរដ្ឋមន្ត្រីនៃក្រសួងកសិកម្ម និង អភិវឌ្ឍន៍ជនបទ បាននិយាយថា ក្រសួងបានអំពាវនាវឲ្យមានវិធានការបង្ការវីរុស ដើម្បីរឹតបន្តឹង ជាពិសេសនៅរោងចក្រកែច្នៃផលិតកសិកម្ម ដើម្បីទប់ស្កាត់ការរំខានណាមួយដល់ច្រវាក់ផ្គត់ផ្គង់។
លោក Tien បានអះអាងថា ការរីករាលដាលកូវីដ១៩ កំពុងបើកឱកាសយ៉ាងសំខាន់ដល់ប្រទេសវៀតណាម ដើម្បីពង្រីកការនាំចេញផលិតផលកសិកម្ម ដោយសារតែការខ្វះខាតយ៉ាងខ្លាំងនៃការផ្គត់ផ្គង់ក្នុងទីផ្សារសកលលោក ព្រមទាំងការរំខានកើតឡើងចំពោះច្រវ៉ាក់ផ្គត់ផ្គង់សកល។
លោក Tien បាននិយាយថា វាមានសារៈសំខាន់សម្រាប់វៀតណាម ដើម្បីទប់ស្កាត់វីរុស លើកកម្ពស់សុវត្ថិភាពរស់នៅក្នុងផលិតកម្មកសិកម្ម ពង្រីកផលិតកម្ម ដើម្បីបង្កើនទិន្នផល និង ផលិតភាពព្រមជាមួយរក្សានូវច្រវាក់ផ្គត់ផ្គង់ឲ្យស្ថិតស្ថេរ។
សម្រាប់ផលិតផលដែលទីផ្សារពិភពលោកមានតម្រូវការខ្ពស់ ដូចជា បង្គា ក្រសួងនេះបានស្នើឲ្យបង្កើនផលិតកម្ម ប៉ុន្តែក្នុងពេលជាមួយគ្នា គុណភាពត្រូវតែធានា ដើម្បីចាប់យកកាលានុវត្តភាពពង្រីកការនាំចេញ។
លោកនិយាយថា ដោយមានក្រុមហ៊ុន ១៣ ៥០០ សហករណ៍ ១៧ ០០០ កសិដ្ឋាន ៣៤ ៤០០ និង គ្រួសារកសិករ ១៣,៨ លាន វិស័យកសិកម្មសម្រេចបានលទ្ធផលគួរកត់សម្គាល់ក្នុងរយៈពេល ៤ ខែកន្លងទៅនេះ។ ការនាំចេញកើនឡើង ២៤,២ ភាគរយ ដែលមានតម្លៃ ៣២,០៧ ពាន់លានដុល្លារ ដោយវិស័យនេះមានអតិរេកពាណិជ្ជកម្មរហូតដល់ ២,២ ពាន់លានដុល្លារក្នុងរយៈពេលដូចគ្នា៕ VNS-ANN/RR
