.jpg)
សកម្មភាពអ្នកចុះឈ្មោះចូលរួមវេទិកាធុរកិច្ចអន្តរឥណ្ឌូ-ប៉ាស៊ីហ្វិក។ ហេង ជីវ័ន
ភ្នំពេញ: ក្រុមហ៊ុនឈានមុខគេចំនួន ២០ របស់ប្រទេសកម្ពុជា នឹងចូលរួមនៅក្នុងវេទិកាធុរកិច្ចឥណ្ឌូ-ប៉ាស៊ីហ្វិក (IPBF ) នៅថ្ងៃនេះ ដើម្បីចាប់យកឱកាសពាណិជ្ជកម្ម និងការវិនិយោគពីវិស័យឯកជននៅក្នុងតំបន់ ជាពិសេសស្ថាប័ន និងក្រុមហ៊ុនធំៗរបស់អាមេរិក។
វិទិកានេះរៀបចំឡើងចាប់ពីថ្ងៃទី ២៨ និង ២៩ ខែតុលា នៅទីក្រុងហាណូយ ប្រទេសវៀតណាមគឺជាព្រឹត្តិការណ៍សាធារណៈ និងឯកជនដ៏សំខាន់នេះត្រូវបានគាំទ្រដោយរដ្ឋាភិបាលអាមេរិក និងវៀតណាម។
លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានឱ្យដឹងថា ពិធីបដិសណ្ឋារកិច្ចនៃគណៈប្រតិភូធុរកិច្ចសម្រាប់ IPBF នៅភ្នំពេញកាលពីថ្ងៃចន្ទថា ឆ្នាំនេះគឺជាលើកទី៣ នៃការរៀបចំព្រឹត្តិការណ៍ដែលមានតំណាងរដ្ឋាភិបាល និងវិស័យឯកជនច្រើនជាងរាប់ពាន់នាក់ចូលរួម។ វានឹងផ្ដល់ឱកាសសម្រាប់ក្រុមហ៊ុនកម្ពុជាក្នុងការភ្ជាប់ទំនាក់ទំនងជាមួយក្រុមហ៊ុន និងមន្ដ្រីៗរបស់រដ្ឋាភិបាលអាមេរិកដោយផ្ទាល់។
លោកថ្លែងថា៖ «ឆ្នាំនេះយើងប្រារព្ធខួបលើកទី ៧០ នៃទំនាក់ទំនងការទូតរវាងប្រទេសយើងទាំង ២។ ដោយសារតែភាពជាដៃគូដែលមានស្រាប់ ប្រទេសកម្ពុជា តែងតែទទួលបានអត្ថប្រយោជន៍ពីផលិតផល និងសេវាកម្មរបស់អាមេរិក។ ភាពជាដៃគូមិនកំណត់តែចំពោះវិស័យឯកជននោះទេ យើងនឹងនាំយកដំណោះស្រាយទាំងមូលទៅឥណ្ឌូ-ប៉ាស៊ីហ្វិកអំពីភាពជាដៃគូសាធារណៈ និងឯកជន»។
លោកថ្លែងថា៖ «ដូច្នេះអ្នកចូលរួមក្នុងព្រឹត្តិការណ៍នេះ គឺជាការតំណាងវត្តមានរបស់ព្រះរាជាណាចក្រកម្ពុជា។ តាមការអង្កេតរបស់ខ្ញុំ សេដ្ឋកិច្ច និងវិស័យធុរកិច្ចរបស់កម្ពុជាមានការកើនឡើងកាន់តែខ្លាំង ហើយពិតជាត្រៀមខ្លួនរួចរាល់ក្នុងការរីកចម្រើនយ៉ាងរហ័ស»។ លោកបន្តថា៖ «ខ្ញុំសង្ឃឹមថា អ្នកនឹងប្រើប្រាស់ឱកាសនេះ ដើម្បីបង្ហាញឱ្យក្រុមហ៊ុនជុំវិញតំបន់ និងមន្ដ្រីរដ្ឋាភិបាលមកពីអាមេរិក និងទូទាំងតំបន់ឥណ្ឌូប៉ាស៊ីហ្វិក ដឹងថា អ្វីកំពុងកើតឡើងនៅកម្ពុជា»។
លោក សុង សារ៉ន ប្រធាន Amru Rice (Cambodia) បានប្រាប់ភ្នំពេញប៉ុស្តិ៍កាលពីថ្ងៃអង្គារថា លោកបានចូលរួមក្នុងព្រឹត្តិការណ៍ទី២ នេះនៅទីក្រុងបាងកកជាកន្លែងដែលលោកបានជួបមេដឹកនាំធុរកិច្ចរាប់ពាន់នាក់ និងមន្ដ្រីជាន់ខ្ពស់អាមេរិកជាច្រើនរូប។
លោកថ្លែងថា៖ «យើងមានឱកាសក្នុងការជួបជុំ និងនិយាយដោយផ្ទាល់ជាមួយមន្ដ្រីជាន់ខ្ពស់មកពីអាមេរិក និងដៃគូធុរកិច្ចនៅឥណ្ឌូ-ប៉ាស៊ីហ្វិក ខណៈដែលយើងបានចែករំលែកអំពីប្រវត្តិធុរកិច្ចរបស់យើង និងឱកាសវិនិយោគដែលយើងអាចធ្វើជាដៃគូ ឬទទួលយកកម្ចីបាន»។
លោកបានបន្ថែមទៀតថា៖ «Amru Rice គឺជាក្រុមហ៊ុនរោងម៉ាស៊ីនកិនស្រូវ ទទួលបានកម្ចីពីធនាគារ EXIM របស់អាមេរិក ដើម្បីវិនិយោគលើការកែលម្អប្រព័ន្ធស្ដុកអង្ករកាន់តែទំនើបថែមទៀត»។
អាមេរិកគឺជាទីផ្សារឈានមុខគេសម្រាប់ការនាំចេញរបស់ប្រទេសកម្ពុជា ដែលមានតម្លៃ $៥,៤ ពាន់លានកាលពីឆ្នាំមុន កើនឡើងពី ៣ ពាន់លានដុល្លារកាលពីឆ្នាំ ២០១៥។ ប្រទេសកម្ពុជា បាននាំចេញទំនិញមានតម្លៃ ២,៧៥ ពាន់លានដុល្លារ ទៅទីផ្សារអាមេរិកនៅឆមាសទី១ ឆ្នាំនេះ កើនឡើង ២៣ ភាគរយ ធៀបនឹង ២,២៤ ពាន់លានដុល្លារ នៅក្នុងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យបានពីស្ថានទូតអាមេរិកប្រចាំកម្ពុជា៕ LA
