ភ្នំពេញៈ ផ្សារហ៊ុនកម្ពុជា (CSX) បានបង្ហាញពីសកម្មភាពជួញដូរកាន់តែសកម្មចាប់តាំងពីផ្សារនេះត្រូវបានបង្កើតឡើងកាលពីឆ្នាំ ២០១២ ខណៈមានក្រុមហ៊ុនកាន់តែច្រើនបង្ហាញពីចំណាប់អារម្មណ៍ក្នុងការចុះបញ្ជី។
ការជួញដូរនៅក្នុងត្រីមាសទី ៣ ឆ្នាំ ២០១៩ បានបង្ហាញពីកំណើនដោយមូលធនូបនីយកម្មទីផ្សារបានកើនឡើងជាង ៤០ ភាគរយ បើធៀបនឹងត្រីមាសទី២ ដែលនេះគឺជាតួលេខខ្ពស់បំផុតចាប់តាំងផ្សារហ៊ុនបើកដំណើរការកាលពីឆ្នាំ ២០១២។ នេះបើតាមទិន្នន័យពីផ្សារមូលបត្រកម្ពុជា។
ទិន្នន័យដែលភ្នំពេញប៉ុស្តិ៍ទទួលបានពីក្រុមហ៊ុនផ្សារមូលបត្រកម្ពុជាកាលពីថ្ងៃម្សិលមិញបង្ហាញថានៅក្នុងត្រីមាសទី ៣ ឆ្នាំ ២០១៩ មូលធនូបនីយកម្មទីផ្សារបានកើនដល់ ៨០០ លានដុល្លារកើនឡើងជាង ៤០ ភាគរយពីចំនួន ៥៧០ លានដុល្លារកាលពីត្រីមាសទី ២ ឆ្នាំ ២០១៩។ ចំណែកសន្ទស្សន៍ផ្សារហ៊ុនបានកើនឡើងដល់ ៨៦៩ ពិន្ទុដែលជាតួលេខខ្ពស់បំផុតក្នុងរយៈកាល ៦ ឆ្នាំចុងក្រោយនេះ។
មូលធនូបនីយកម្មទីផ្សារជាតម្លៃក្រុមហ៊ុនចុះបញ្ជីក្នុងទីផ្សារទាំងអស់បូកបញ្ចូលគ្នាគិតតាមតម្លៃទីផ្សារដោយតម្លៃក្រុមហ៊ុននីមួយៗគេយកថ្លៃភាគហ៊ុនគុណចំនួនភាគហ៊ុនចុះបញ្ជី។
ទិន្នន័យបានឲ្យដឹងទៀតថា ចំនួនគណនីថ្មីដែលបើកក្នុងត្រីមាសទី ៣ មានចំនួន ៧២៥ ដោយគិតត្រឹមចុងត្រីមាសទី ៣ គណនីជួញដូរមានចំនួនសរុប ២២ ១៩៦។ ការជួញដូរជាមធ្យមក្នុងត្រីមាសទី ៣ គិតជាទឹកប្រាក់មានតម្លៃប្រមាណ ២៧.១២១ ដុល្លារស្មើនឹង ១២ ៥៣៩ ភាគហ៊ុនក្នុង ១ ថ្ងៃ។ ការជួញដូរដែលមានលក្ខណៈវិនិយោគិនឯកត្តបុគ្គលមានប្រហែល ៩៤ ភាគរយ។
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ CSX បាននិយាយថា សកម្មភាពប្រតិបត្តិការរបស់ផ្សារហ៊ុនកម្ពុជាក្នុងត្រីមាសទី ៣ ឆ្នាំ ២០១៩ មានភាពល្អប្រសើរយ៉ាងខ្លាំងចាប់តាំងពីរយៈពេល ៦ ឆ្នាំ នៃការចាប់ផ្តើមដំណើរការផ្សារហ៊ុន។
លោកស្រីបន្តថា ភាពល្អប្រសើររបស់ផ្សារមូលបត្រកម្ពុជានៅពេលនេះគឺមកពីកត្តាសំខាន់ៗមួយចំនួនដូចជា ការបន្ថែមម៉ោងជួញដូរ កំណើនសេដ្ឋកិច្ចកម្ពុជា និងកំណើនប្រាក់ចំណេញរបស់ក្រុមហ៊ុនចុះបញ្ជី។
លោកស្រីបន្តថា៖ «គោលនយោបាយបែងចែកភាគលាភកាន់តែប្រសើរ ការបង្កើនទំនុកចិត្តរបស់វិនិយោគិនមកលើទីផ្សារ កិច្ចខិតខំប្រឹងប្រែងរបស់ CSX និងភាគីពាក់ព័ន្ធក្នុងការសម្រួលបទប្បញ្ញត្តិនីតិវិធី និងការធ្វើសកម្មភាពផ្សព្វផ្សាយបានកាន់តែទូលំទូលាយទាំងក្នុងស្រុក និងក្រៅស្រុកក៏ជាកត្តាចម្បងក្នុងការជំរុញទីផ្សារដែរ»។
លោកស្រីបន្តថាជាមួយនឹងភាពល្អប្រសើរនេះបានធ្វើឲ្យចំនួនគណនីជួញដូរបច្ចុប្បន្នមានចំនួន ២២ ១៩៦ ដោយកើនឡើង ៣៥ ភាគរយបើធៀបនឹងរយៈពេលដូចគ្នាកាលពីឆ្នាំមុន។
បច្ចុប្បន្នមានក្រុមហ៊ុនជាច្រើនកំពុងរៀបចំខ្លួនចុះបញ្ជីក្នុងផ្សារហ៊ុនដើម្បីទទួលបានអត្ថប្រយោជន៍ពីការកាត់បន្ថយពន្ធ ៥០ ភាគរយលើពន្ធលើប្រាក់ចំណេញ។ នេះបើតាមលោកស្រី សុផានីតា។
អ្នកស្រីថ្លែងថា៖ «ខ្ញុំមានសុទិដ្ឋិនិយមចំពោះទីផ្សារក៏ដូចជាវិស័យនេះទាំងមូល។ ខ្ញុំរំពឹងថា ប្រសិនបើក្រុមហ៊ុនថ្មីដែលត្រៀមចុះបញ្ជីអាចដំណើរការចប់រួចរាល់តាមការគ្រោងទុក ហើយភាគហ៊ុនទាំងអស់នឹងនៅតែបន្តផ្តល់អត្រាចំណេញមួយដ៏ទាក់ទាញនោះនឹងមានការចូលរួមកាន់តែច្រើនបន្ថែមទៀតពីសំណាក់វិនិយោគិន»។
ទិន្នន័យពី CSX បានឲ្យដឹងទៀតថា តម្លៃភាគហ៊ុនរបស់ក្រុមហ៊ុនទាំង ៥ ដែលបានចុះបញ្ជីនៅផ្សារមូលបត្រកម្ពុជាគិតត្រឹមដំណាច់ត្រីមាសទី ៣ ធៀបនឹងរយៈពេលដូចគ្នាឆ្នាំ ២០១៨ គឺតម្លៃភាគហ៊ុនរបស់ PAS កើនឡើង ២៧០ ភាគរយ ពី ៦ ៤០០ រៀល មក ២៣ ៦៥០ រៀល, PPAP កើនឡើងជិត ១០០ ភាគរយ ពី ៦ ៤០០ រៀល មក ១២ ៧៨០ រៀល, PWSA កើនឡើង ៩៣ ភាគរយ ពី ៣ ១៨០ រៀល មក ៦ ១៦០ រៀល, GTI កើនឡើង ៤៤ ភាគរយ ពី ៣ ០៥០ រៀល មក ៤ ៤០០ រៀល និងតម្លៃរបស់ PPSP បានធ្លាក់ចុះ ២ ភាគរយ ពី ២ ៨០០ រៀល មក ២ ៧៤០ រៀលគិតត្រឹមត្រីមាសទី ៣ ឆ្នាំ ២០១៩។
លោក អ៊ីវ រ៉ាណ្ណារិទ្ធិ នាយកប្រតិបត្តិក្រុមហ៊ុន RHB Indochina Securities Plc ដែលជាក្រុមហ៊ុនធានាទិញមូលបត្របានប្រាប់ថា កំណើនដ៏ខ្ពស់នៃតម្លៃភាគហ៊ុនរបស់កំពង់ផែស្វយ័តក្រុងព្រះសីហនុ និងកំពង់ផែក្រុងភ្នំពេញគឺជាធាតុដ៏សំខាន់ក្នុងការធ្វើឲ្យផ្សារមូលបត្រកម្ពុជាមានសម្ទុះខ្លាំងក្នុងត្រីមាសទី ៣។
លោកថ្លែងថា៖ «ដោយសារទីផ្សាររបស់យើងនៅតូច ដូច្នេះនៅពេលដែលមានការចាប់អារម្មណ៍ច្រើនពីសំណាក់អ្នកវិនិយោគក៏អាចនឹងធ្វើឲ្យមានឥទ្ធិពល ធ្វើឲ្យផ្សារកើនឡើងដែរ។ មានន័យថានៅពេលដែលអ្នកលក់មានចំនួនតិច និងអ្នកចង់ទិញមានច្រើន ក៏វាងាយធ្វើឲ្យទីផ្សារមានការកើនឡើងដែរ»៕ LA