.jpg)
ទំហំជួញដូរភាគហ៊ុនក្នុងផ្សារមូលបត្រកម្ពុជា (CSX) បានបង្ហាញពីកំណើនខ្ពស់ជាលើកដំបូងកាលពីថ្ងៃចន្ទ។ ហេង ជីវ័ន
ភ្នំពេញៈ ទំហំជួញដូរភាគហ៊ុនក្នុងផ្សារមូលបត្រកម្ពុជា (CSX) បានបង្ហាញពីកំណើនខ្ពស់ជាលើកដំបូងកាលពីថ្ងៃចន្ទ គិតចាប់តាំងពីផ្សារនេះបានបើកដំណើរការកាលពីឆ្នាំ ២០១២ ដែលត្រូវបានជំរុញដោយការជួញដូរភាគហ៊ុនរបស់កំពង់ផែក្រុងព្រះសីហនុ។ នេះបើយោងតាមសេចក្តីប្រកាសព័ត៌មានរបស់ CSX។
ក្នុងចំណោមក្រុមហ៊ុនចុះបញ្ជីចំនួន ៥ នៅក្នុងផ្សារហ៊ុនកម្ពុជា ការជួញដូរភាគហ៊ុនរបស់កំពង់ផែស្វយ័តក្រុងព្រះសីហនុមានរហូតដល់ ៩៩ ភាគរយ នៃទំហំភាគហ៊ុន ២ ១៥០ ៥៣៥ ភាគហ៊ុនកាលពីថ្ងៃចន្ទ។ ក្នុងចំនួនភាគហ៊ុនដែលត្រូវបានជួញដូរនេះមានតម្លៃជាង ៤,៤៣ លានដុល្លារ។
ទោះបីជាយ៉ាងនេះក្តី ទំហំភាគហ៊ុន ដែលបានបិទការជួញដូរនៅលើផ្សារហ៊ុនកាលពីថ្ងៃម្សិលមិញបានធ្លាក់ចុះមកត្រឹម ១៤ ៦០៤ ហ៊ុនប៉ុណ្ណោះ។
ក្រុមហ៊ុនផ្សារមូលបត្រកម្ពុជា បានឲ្យដឹងថា កត្តាដែលជំរុញឲ្យមានការកើនឡើងនៅក្នុងការជួញដូរភាគហ៊ុននេះដោយសារតែការប្រើប្រាស់នីតិវិធីជួញដូរតាមការចរចា (Negotiated Trading Method) នៅក្នុងផ្សារហ៊ុនកម្ពុជា។ NTM ត្រូវបានដាក់ឲ្យដំណើរការកាលពីខែមករា ឆ្នាំ ២០១៨ បន្ថែមលើនីតិវិធី ដែលមានស្រាប់ គឺការជួញដូរតាមការដេញថ្លៃ (Auction Trading Method)។
វិធីសាស្ត្រជួញដូរតាមការចរចា បានអនុញ្ញាតឲ្យវិនិយោគិនអាចទិញ ឬលក់ភាគហ៊ុន ឬមូលបត្របំណុលក្នុងទំហំធំជាមួយដៃគូរបស់ខ្លួននូវថ្លៃដែលបានចរចាគ្នារួច ដោយគ្រាន់តែធ្វើការដាក់បញ្ជា និងផ្គូផ្គងជាមួយគ្នានៅក្នុងប្រព័ន្ធជួញដូរក្នុងទីផ្សារប៉ុណ្ណោះ ខណៈវិធីសាស្ត្រជួញដូរតាមការដេញថ្លៃ គឺវិនិយោគិនត្រូវដាក់ការបញ្ជាទិញ និងលក់ភាគហ៊ុននៅក្នុងប្រព័ន្ធជួញដូររបស់ផ្សារហ៊ុន ដើម្បីផ្គូផ្គងផ្អែកតាមវិធានជួញដូររបស់ទីផ្សារ និងគោលការណ៍អាទិភាពនៃការដេញថ្លៃ គឺថ្លៃ និងពេលវេលា។
លោកស្រី គឹម សុផានីតា ប្រធានស្តីទីនៃនាយកដ្ឋានប្រតិបត្តិការទីផ្សារបានឲ្យដឹងថា លទ្ធផលល្អនៃអាជីវកម្ម និងទំនោរនៃការកើនឡើងតម្លៃភាគហ៊ុននាពេលថ្មីៗនេះ បានធ្វើឲ្យភាគហ៊ុនរបស់ PAS ទទួលបានការចាប់អារម្មណ៍កាន់តែច្រើនពីវិនិយោគិន។ លោកស្រីថ្លែងថា៖ «ការជួញដូរដែលមានទំហំច្រើនកាលពីថ្ងៃចន្ទ គឺដោយសារមានក្រុមហ៊ុនបរទេស ១ បានចរចាទិញយកភាគហ៊ុនពីអ្នកកាន់កាប់ភាគហ៊ុនច្រើនរបស់ PAS»។
ដោយសារកំពង់ផែស្វយ័តក្រុងព្រះសីហនុ (PAS) មានប្រតិបត្តិការល្អ និងមានប្រាក់ចំណូលខ្ពស់នោះ បានធ្វើឲ្យមានវិនិយោគិនជាច្រើនចាប់អារម្មណ៍ក្នុងការទិញយកភាគហ៊ុនរបស់ PAS។
លោកស្រី សុផានីតា និយាយថា៖ «ក្នុងនាមជាផ្សារហ៊ុន យើងមានក្តីរំភើបជាមួយនឹងកំណើននៃការជួញដូរ ពិសេសប្រតិបត្តិការទំហំធំក្នុងទីផ្សារ ព្រោះមានន័យថា យើងអាចផ្តល់សាច់ប្រាក់ងាយស្រួលបន្ថែមសម្រាប់វិនិយោគិន»។
ពេលបិទទ្វារកាលពីថ្ងៃសុក្រទំហំនៃការជួញដូរមានចំនួន ៧ ៦៧១ ភាគហ៊ុន។ ចាប់ពីដើមឆ្នាំ ២០១៨ រហូត ដល់ថ្ងៃទី ២០ ខែធ្នូ ចំនួននៃការជួញដូរជាមធ្យមប្រចាំថ្ងៃ មាន ៦ ៤៦៨ ភាគហ៊ុន។ នេះបើយោងតាម លោកស្រី សុផានីតា។
លោកស្រី ឆាយ លីហួរ ប្រធានភ្នាក់ងារ ក្រុមហ៊ុនមូលបត្រ អេសប៊ីអាយ រ៉ូយ៉ាល់ ស៊ីឃ្យូរីធី ដែលជាក្រុមហ៊ុនឈ្មួញជើងសារក្នុងប្រតិបត្តិការទិញ លក់ភាគហ៊ុនរបស់ PAS បាននិយាយថា ចាប់តាំងពីដើមត្រីមាសទី ៤ ឆ្នាំ ២០១៨ មកមានអតិថិជនជាច្រើនបានមកចុះឈ្មោះបើកគណនីជួញដូរនៅក្នុងក្រុមហ៊ុន អេសប៊ីអាយ រ៉ូយ៉ាល់ ស៊ីឃ្យូរីធី។
កំណើននៃការបើកគណនីនាពេលនេះដោយសារបច្ចុប្បន្ននៅផ្សារហ៊ុនកម្ពុជា មានក្រុមហ៊ុនចុះបញ្ជីកាន់តែច្រើន ខណៈនៅដើមឆ្នាំ ២០១៩ ខាងមុខអាចនឹងមានក្រុមហ៊ុនថ្មីចំនួន ២ បន្ថែមទៀត។
ជាមួយនឹងអតិថិជនជាង ១ ០០០ នាក់ ដែលបានបើកគណនេយ្យជួញដូរនៅ អេសប៊ីអាយ រ៉ូយ៉ាល់ ស៊ីឃ្យូរីធី លោកស្រី លីហួរ បាននិយាយថា៖ «កំណើនក្រុមហ៊ុនចុះបញ្ជី នឹងធ្វើឲ្យផ្សារហ៊ុនកម្ពុជាកាន់តែមានភាពមមាញឹកខ្លាំងឡើងបន្ថែមទៀតនាពេលអនាគត បើទោះជាពេលនេះនៅមានសកម្មភាពតិច បើធៀបនឹងប្រទេសជិតខាងក៏ដោយ»៕ LA
