ក្រុងប្រ៊ុចសែលៈ ការចាកចេញរបស់អង់គ្លេសពីសហភាពអឺរ៉ុប (Brexit) និងក្តីបារម្ភពីសង្គ្រាមពាណិជ្ជកម្មបានបង្កឲ្យកំណើនសកម្មភាពផលិតកម្មក្នុងតំបន់អឺរ៉ូធ្លាក់ចុះដល់កម្រិតទាបបំផុតរបស់ខ្លួនក្នុងរយៈពេលជាច្រើនឆ្នាំកាលពីខែកញ្ញា។ នេះបើយោងតាមការអង្កេតដែលមានការឃ្លាំមើលយ៉ាងយកចិត្តទុកដាក់មួយកាលពីថ្ងៃចន្ទ។
បញ្ហាកាន់តែស៊ីជម្រៅក្នុងវិស័យផលិតកម្មបានបង្កឲ្យវិស័យនេះធ្លាក់ចុះ ដោយទិន្នផលផលិតកម្មធ្លាក់ចុះក្នុងអត្រាលឿនបំផុតគិតចាប់ពីឆ្នាំ ២០១២ មកហើយក៏មានដំណឹងអាក្រក់ផងដែរក្នុងវិស័យសេវាកម្មដែលកំណើនបានថមថយ បន្ទាប់ពីកើនឡើងនាពេលកន្លងមក។ នេះបើយោងតាមទិន្នន័យដែលចេញផ្សាយដោយក្រុមហ៊ុន IHS Markit។
សន្ទស្សន៍អ្នកគ្រប់គ្រងបញ្ជាទិញ (PMI) របស់ក្រុមហ៊ុន IHS Markit ដែលត្រូវបានគេមើលឃើញថា ជាសូចនាករសំខាន់មួយនៃទំនុកចិត្តអាជីវកម្មបានធ្លាក់ចុះដល់កម្រិត ៥០,៤ ក្នុងខែកញ្ញាពីកម្រិត ៥១,៩ កាលពីខែសីហា ដែលជាតួលេខទាបបំផុតគិតចាប់ពីខែមិថុនា ឆ្នាំ ២០១៣ មក។
តួលេខដែលមានកម្រិតខ្ពស់ជាង ៥០ បង្ហាញពីកំណើន ខណៈដែលទាបជាង ៥០ បង្ហាញពីការធ្លាក់ចុះ។
លោក Chris Williamson ប្រធានសេដ្ឋវិទូរបស់ក្រុមហ៊ុន IHS Markit ព្រមានថា ទិន្នន័យដែលធ្លាក់ចុះចុងក្រោយបំផុតនេះបង្ហាញថា សេដ្ឋកិច្ចកំពុង «ស្ថិតនៅចំណុចនៃការធ្លាក់ចូលក្នុងការធ្លាក់ចុះ»។
លោក Williamson បានមានប្រសាសន៍ថា៖ «សេដ្ឋកិច្ចរបស់តំបន់អឺរ៉ូកំពុងស្ថិតនៅជិតភាពទ្រឹងដោយសារការធ្លាក់ចុះវិស័យផលិតកម្មកាន់តែខ្លាំងបង្ហាញសញ្ញាថែមទៀតនៃការរីករាលដាលដល់វិស័យសេវាកម្ម»៕ KC