The Phnom Penh Post Search

Search form




Logo of Phnom Penh Post newspaper Phnom Penh Post - សក្តានុពល​អង្ករ​ក្រអូប​កម្ពុជា​កំពុង​ទាក់ទាញ​វិនិយោគិន​ថៃ

សក្តានុពល​អង្ករ​ក្រអូប​កម្ពុជា​កំពុង​ទាក់ទាញ​វិនិយោគិន​ថៃ

សក្តានុពល​អង្ករ​ក្រអូប​កម្ពុជា​កំពុង​ទាក់ទាញ​វិនិយោគិន​ថៃ

20140327_12
កម្មករ​កំពុង​រៀបចំ​ទុក​ដាក់​ស្រូវ​នៅ​រោង​ម៉ាស៊ីន​កិន​ស្រូវ​មួយ​នៅ​ស្រុក​អង្គ​ស្នួល​ខេត្ត កណ្តាល ផា លីណា

ភ្នំពេញៈ សក្តានុពល​អង្ករ​ក្រអូប កម្ពុជា កំពុង​ទាក់​ទាញ​វិនិយោគិន ថៃ ឲ្យ​មក​បើក​រោង​ម៉ាស៊ីន​កែច្នៃ​អង្ករ​នៅ​កម្ពុជា​ដើម្បី​នាំ​ចេញ​ទៅ​ទីផ្សារ​អន្តរជាតិ។

គុណភាព​អង្ករ​ក្រអូប កម្ពុជា កាន់​តែ​ត្រូវ​បាន​គេ​ទទួល​ស្គាល់​នៅ​លើ​ទីផ្សារ​អន្តរជាតិ​បន្ទាប់​ពី​ទទួល​បាន​ពាន​រង្វាន់​ជា​អង្ករ​ឆ្ងាញ់​ជាង​គេ​លើ​ពិភពលោក​ពីរ​ឆ្នាំ​ផ្ទួនៗ​គ្នា។

យោង​តាម​កាសែត បាងកក ប៉ុស្តិ៍ រោង​ម៉ាស៊ីន​កិន​ស្រូវ​ជា​ច្រើន​នៅ​ភាគ​កណ្តាល និង​ភាគ​ឦសាន ប្រទេស​ថៃ កំពុង​ត្រៀម​ដំ​ឡើង​ម៉ាស៊ីន​កិន​ស្រូវ​នៅ កម្ពុជា ដោយ​មើល​ឃើញ​ពី​សក្តានុពល​នៃ​ផលិតកម្ម​ស្រូវ​ក្រអូប កម្ពុជា ដែល​ទិន្នផល​កំពុង​កើន​ឡើង​ហើយ​ថ្លៃ​ផលិត​មាន​តម្លៃ​ទាប។

សេចក្តី​រាយការណ៍​បន្ត​ថា បទពិសោធ​នៅ​មាន​កម្រិត​ខាង​ផ្នែក​ទីផ្សារ​និង​ការ​នាំ​អង្ករ​ចេញ​របស់​ប្រតិបត្តិករ​នៅ កម្ពុជា និង​កង្វះ​ម៉ាស៊ីន​កិន​ស្រូវ​ជឿន​លឿន​អនុញ្ញាត​ឲ្យ​វិនិយោគិន ថៃ ពង្រីក​ការ​វិនិយោគ​របស់​ពួក​គេ ហើយ​ក៏​នឹង​ជួយ​ជំរុញ​គោល​នយោបាយ​នាំ​ចេញ​អង្ករ​ឲ្យ​បាន​មួយ​លាន​តោន​នៅ ឆ្នាំ​២០១៥ របស់ កម្ពុជា ផង​ដែរ។

អ្នក​ជំនាញ​និង​អ្នក​រក​ស៊ី​ក្នុង​ស្រុក​ស្វាគមន៍​វត្តមាន​វិនិយោគិន ថៃ ក្នុង​ឧស្សាហកម្ម​នេះ​ជាមួយ​នឹង​ការ​រំពឹង​ថា ឧស្សាហកម្ម​នេះ​នឹង​ឈាន​ឡើង​មួយ​កម្រិត​ទៀត។ ទោះ​បី​យ៉ាង​នេះ​គេ​បាន​បង្ហាញ​ពី​ការ​ព្រួយ​បារម្ភ​ថា រោង​ម៉ាស៊ីន​កិន​ស្រូវ​តូចៗ​នៅ​ក្នុង​ស្រុក​អាច​ជួប​នឹង​ការ​ប្រកួត​ប្រជែង​ខ្លាំង។

លោក លឹម ប៊ុនហេង នាយក​ក្រុមហ៊ុន​នាំ​ចេញ​អង្ករ ឡូរ៉ង់ និយាយ​ថា ក្រុមហ៊ុន​ក្នុង​ស្រុក​ដែល​ឈរ​ជួរ​មុខ​ក្នុង​ការ​នាំ​ចេញ​អង្ករ​មាន​សមត្ថភាព​គ្រប់​គ្រាន់​ក្នុង​ការ​ប្រកួត​ប្រជែង​ជាមួយ​វិនិយោគិន ថៃ។ ទោះ​ជា​យ៉ាង​ណា លោក​ថា នៅ​មាន​រោង​ម៉ាស៊ីន​កិន​ស្រូវ​តូចៗ​ដែល​នៅ​ដំណើរការ​ជា​លក្ខណៈ​ជា​ប្រពៃណី​នៅ​ឡើយ ជា​ហេតុ​ធ្វើ​ឲ្យ​ការ​ផលិត​មាន​តម្លៃ​ខ្ពស់​ដែល​ពិបាក​ក្នុង​ការ​ប្រកួត​ប្រជែង។

លោក​ថ្លែង​ថា៖ «ការ​ដាក់​ទុន​នេះ​នឹង​ជួយ​រដ្ឋ​ឲ្យ​រក​ចំណូល​បាន​រឹត​តែ​ច្រើន។ សម្រាប់​ផ្នែក​ឯកជន​បើ​អ្នក​ទន់​ខ្សោយ​អាច​ត្រូវ​ព្រួយ​បារម្ភ​តែ​អ្នក​រក​ស៊ី​ធំ មិន​មែន​ជា​បញ្ហា​ចោទ​នោះ​ទេ ព្រោះ​កម្រិត​ស្តង់ដារ​សម្រាប់​ការ​នាំ​ចេញ​អាច​ធ្វើ​បាន​ដូច [ថៃ] ដែរ»។

លោក វ៉ាន់ ដេវីដ ក៏​បាន​និយាយ​ដែរ​ថា ការ​ចូល​មក​ដល់​របស់​រោង​ម៉ាស៊ីន​កិន​ស្រូវ​របស់ ថៃ នឹង​ជួយ​កាត់​បន្ថយ​ការ​ហូរ​ចេញ​ស្រូវ​ទៅ​ប្រទេស​ជិត​ខាង​ហើយ​ក៏​នឹង​ផ្តល់​ការងារ​ក្នុង​ស្រុក​ទន្ទឹម​នឹង​នោះ​ក៏​ធ្វើ​ឲ្យ​សេដ្ឋកិច្ច កម្ពុជា កាន់​តែ​រីក​ចម្រើន​ផង​ដែរ។

លោក​បន្ត​ថា៖ «ថៃ គេ​មក​កិន​ស្រូវ​នៅ​ស្រុក​យើង ហើយ​គេ​នាំ​ចេញ​ពី​ស្រុក​យើង​ទៅ។ កម្ពុជា នឹង​ទទួល​បាន​ចំណូល​តម្លៃ​បន្ថែម។ ការ​ប្រកួត​ប្រជែង​ចៀស​មិន​ផុត​ទេ។ តែ​បើ​គេ​មក​ដាក់​ទុន​នៅ​ស្រុក​យើង​គឺ គេ​ជួយ​វិស័យ​អង្ករ​របស់​យើង​ទៅ​វិញ​ទេ»។

ពាក់ព័ន្ធ​នឹង​បញ្ហា​នេះ​លោក​ស្រី ចន្ធី អ្នក​វិភាគ​សេដ្ឋកិច្ច​ឯករាជ្យ​ឲ្យ​ដឹង​ថា ឧស្សាហកម្ម​អង្ករ​កម្ពុជា​នៅ​តែ​មាន​ចន្លោះ​សម្រាប់​ការ​អភិវឌ្ឍ​បន្ថែម។

លោក​បន្ត​ថា៖ «ថៃ គេ​នឹង​មក​ជាមួយ​បច្ចេកវិជ្ជា​របស់​គេ។ វា​ជា​រឿង​ល្អ​ព្រោះ​យើង​អាច​រៀន​សូត្រ​ពី​គេ​បាន។ កសិករ​ជា​អ្នក​ទទួល​បាន​ប្រយោជន៍ ព្រោះ​កាល​ណា​មាន​ការ​ប្រកួត​ប្រជែង​នោះ​កសិករ​នឹង​ទទួល​បាន​តម្លៃ​ស្រូវ​ល្អ​ដែរ»។

លោក​បាន​បន្ថែម​ថា ការ​ដាក់​ទុន​របស់ ថៃ នឹង​រឹត​តែ​ជួយ​សេដ្ឋកិច្ច​ឲ្យ​រីក​ចម្រើន តាម​រយៈ​ការ​បង្កើត​ការងារ និង​ការ​រុន​ច្រាន​អង្ករ​កម្ពុជា​ឲ្យ​រឹត​តែ​មាន​ឈ្មោះ​លើ​ទីផ្សារ​អន្តរជាតិ៕

អត្ថបទគួរចាប់អារម្មណ៍