.jpg)
បុគ្គលិករបស់គ្រឹះស្ថានមីក្រូហិរញ្ញវត្ថុទទួលប្រាក់សងត្រឡប់ពីអតិថិជន។ ហេង ជីវ័ន
ភ្នំពេញៈ ក្រុមអង្គការសង្គមស៊ីវិលជាង ១០០ បានស្នើសុំជាថ្មីឱ្យរដ្ឋាភិបាលដាក់ចេញវិធានការណែនាំដល់គ្រឹះស្ថានហិរញ្ញវត្ថុនៅកម្ពុជាឱ្យផ្អាកការបង់ប្រាក់កម្ចី និងការប្រាក់យ៉ាងតិច ៣ ខែដល់អ្នកខ្ចីក្នុងអំឡុងពេលរីករាលដាលជំងឺកូវីដ ១៩។
សេចក្តីថ្លែងការណ៍រួមរបស់អង្គការសង្គមស៊ីវិលចំនួន ១០៣ ចេញផ្សាយកាលពីថ្ងៃទី ៦ មេសា ឱ្យដឹងថា ការដាក់ចេញវិធានការនេះនឹងផ្ដល់លទ្ធភាពឱ្យអ្នកខ្ចីប្រាក់នូវឱកាសស្នាក់នៅផ្ទះ និងរក្សាសុវត្ថិភាពក្នុងអំឡុងពេលរីករាលដាលជំងឺកូវីដ ១៩ ដែលពួកគេមិនគួរត្រូវភ័យខ្លាចក្នុងការបាត់បង់ដីធ្លី ឬផ្ទះសំបែង ប្រសិនបើពួកគេគ្មានលទ្ធភាពបង់ប្រាក់។
អង្គការសង្គមស៊ីវិលទាំងនោះមានដូចជា អង្គការសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា, អង្គការសម្ព័ន្ធខ្មែរជំរឿន និងការពារសិទ្ធិមនុស្ស និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្សជាដើម។
សេចក្តីថ្លែងការណ៍បានបញ្ជាក់ថា៖ «យើងខ្ញុំស្នើសុំយ៉ាងទទូចឱ្យរាជរដ្ឋាភិបាលជួយប្រជាពលរដ្ឋរាប់លាននាក់ដោយដាក់ចេញវិធានការណែនាំឱ្យវិស័យហិរញ្ញវត្ថុដែលរកប្រាក់ចំណេញ ដើម្បីជួយទទួលបន្ទុកសេដ្ឋកិច្ចខ្លះរបស់អ្នកខ្ចីប្រាក់»។
សេចក្តីថ្លែងការណ៍ឱ្យដឹងទៀតថា ការរៀបចំឥណទានឡើងវិញនៅក្នុងរយៈពេលជាង ១ ឆ្នាំកន្លងមកមិនបានពេញលេញសម្រាប់កម្ចីឥណទានខ្នាតតូចប្រមាណ ១០ ភាគរយ ដែលត្រូវបានរាយការណ៍ដោយវិស័យមីក្រូហិរញ្ញវត្ថុគឺមិនគ្រប់គ្រាន់ឡើយ។
សេចក្តីថ្លែងការណ៍បន្តថា៖ «យើងខ្ញុំសូមស្នើសុំជាថ្មីម្ដងទៀតសូមឱ្យផ្អាកការបង់សងកម្ចីទាំងអស់ រួមទាំងប្រាក់ដើម និងការប្រាក់ ក៏ដូចជា ការប្រាក់បង្គរ (ការប្រាក់ដែលត្រូវបានកត់ត្រាទុក និងត្រូវទូទាត់នៅពេលក្រោយ) សម្រាប់រយៈពេលយ៉ាងតិច ៣ ខែ»។
ឆ្លើយតបនឹងសេចក្តីថ្លែងការណ៍នេះលោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជា (CMA) ប្រាប់ ភ្នំពេញ ប៉ុស្តិ៍ថា ការស្នើសុំរបស់អង្គការសង្គមស៊ីវិលនេះមិនមែនជាវិធានការដោះស្រាយមានប្រសិទ្ធភាពនោះទេ ហើយវាក៏មិនអាចធ្វើទៅរួចបានទេ។
លោកថ្លែងថា៖ «យើងមើលឃើញ ផលប៉ះពាល់នៃជំងឺកូវីដ ១៩ វាមានទំហំធំធេងដែលបង្កផលប៉ះពាល់ដល់ការប្រកបរបររកស៊ីរបស់ប្រជាជនមួយចំនួន ហើយយើងក៏ខិតខំណាស់នាពេលកន្លងមក ដើម្បីជួយសម្រាលបន្ទុកអតិថិជនដែលរងផលប៉ះពាល់ ប៉ុន្តែយើងមានលទ្ធភាពរបស់យើង ដោយសារយើងជាវិស័យឯកជនក៏រងផលប៉ះពាល់ដោយជំងឺកូវីដ ១៩ ដែរ»។
លោកបន្តថា៖ «យើងមានយន្តការផ្សេងៗទៀតសម្រាប់សម្រួលដល់អតិថិជនដើម្បីធានាថា ដំណោះស្រាយដែលយើងបានដាក់ជូនអតិថិជនត្រឹមត្រូវតាមលក្ខខណ្ឌជាក់ស្តែងរបស់អតិថិជននីមួយៗ។ យើងមិនអាចប្រើដំណោះស្រាយតែ ១ សម្រាប់មនុស្ស ២ លាននាក់បានទេ អ៊ីចឹងការផ្អាកបង់ស្វ័យប្រវត្តិរយៈពេល ៣ ខែវាមិនមែនជាដំណោះស្រាយមានប្រសិទ្ធភាពសម្រាប់វិស័យហិរញ្ញវត្ថុ ក៏ដូចជាអតិថិជិនផងដែរ»។
យោងតាមលោក តុងងី មកដល់ពេលនេះចំនួននៃការរៀបចំឥណទានឡើងវិញនៅគ្រឹះស្ថានហិរញ្ញវត្ថុនៅកម្ពុជាកើនជិត ៣០ ម៉ឺននាក់ ដែលស្មើនឹងតម្លៃជាង ១,៤ ពាន់លានដុល្លារ។
ធនាគារជាតិនៃកម្ពុជា (NBC) កាលពីខែមីនា ឆ្នាំ ២០២០ បានចេញសារាចរណ៍មួយដល់គ្រឹះស្ថានហិរញ្ញវត្ថុទាំងអស់ឱ្យរៀបចំឥណទានឡើងវិញក្នុងវិស័យអាទិភាព ៤ គឺទេសចរណ៍ កាត់ដេរ សំណង់ ដឹកជញ្ជូន និងឡូជីស្ទិកដែល NBC ចាត់ទុកថា ជាវិស័យទទួលរងផលប៉ះពាល់ខ្លាំងបំផុតពីការរីករាលដាលកូវីដ ១៩៕ LA
វីដេអូ៖
