.jpg)
ទិដ្ឋភាពដ៏ស្រស់ស្អាតនៃសណ្ឋាគារ Royal Sands នៅកោះរ៉ុង ។ រូបថត ហ្វេសប៊ុក
ភ្នំពេញៈ សណ្ឋាគារដ៏ប្រណីត Royal Sands នៅលើកោះរ៉ុងរបស់លោក គិត ម៉េង បានបើកដំណើរការជាផ្លូវការកាលពីថ្ងៃម្សិលមិញ ដែលគេរំពឹងថានឹងទាក់ទាញភ្ញៀវទេសចរកាន់តែច្រើន។
លោកនាយករដ្ឋមន្ដ្រី ហ៊ុន សែន បានធ្វើជាអធិបតីក្នុងការបើកសម្ពោធដាក់ឲ្យប្រើប្រាស់សណ្ឋាគារនេះដែលត្រូវបានបើកដំណើរការចាប់តាំងពីខែធ្នូ។
សណ្ឋាគារនេះមានលក្ខណៈពិសេសតាមលក្ខណៈ ខុនដូចំនួន ៦៧ យូនីត និងមានតម្លៃជាង ៣០០ ដុល្លារក្នុងមួយយប់។
នេះគឺជាគម្រោងរួមរវាងក្រុមហ៊ុនពហុផលិតផលកម្ពុជា Royal Group របស់មហាសេដ្ឋី គិត ម៉េង ដែលគ្រប់គ្រងសណ្ឋាគារ កាំបូឌីយ៉ាណា នៅទីក្រុងភ្នំពេញ និងក្រុមវិនិយោគិនមានមូលដ្ឋាននៅប្រទេសថៃជាច្រើន។
វិនិយោគិនស្វ៊ីសនៅប្រទេសថៃ និងលោក Luzi Matzig ជាភាគទុនិកដ៏សំខាន់ដែលប្រតិបត្តិការជាប្រធានក្រុមហ៊ុនរៀបចំទិសដៅ Asian Trails បានប្រាប់គេហទំព័រព័ត៌មាន TTR Weekly ថាលោក និងក្រុមវិនិយោគិននៅប្រទេសថៃផ្សេងទៀតគ្រប់គ្រងភាគហ៊ុនភាគច្រើន ៦០ ភាគរយក្នុងគម្រោងនេះដោយក្រុមហ៊ុន Royal Group គ្រប់គ្រងភាគហ៊ុននៅសល់ ៤០ ភាគរយ។
លោកបន្ថែមថាគម្រោងទាំងមូលមានតមៃ្ល ៣០ លានដុល្លារជាមួយនឹងការរំពឹងទទួលបានប្រាក់ចំណេញលើការវិនិយោគនេះក្នុងរយៈពេលប្រហែល ៩ ឆ្នាំ។ លោកបានថ្លែងថា៖ «ខ្ញុំអាចគិតយ៉ាងល្អថាក្នុងរយៈពេល ១០ ឆ្នាំចាប់ពីពេលនេះកោះរ៉ុងនឹងមានការអភិវឌ្ឍ ដើម្បីក្លាយជាទិសដៅឆ្នេរដ៏សំខាន់មួយ ជាមួយនឹងយីហោសណ្ឋាគារអន្តរជាតិជាច្រើនដែលភាគច្រើនជាសណ្ឋាគារថ្នាក់ផ្កាយ ៤ និងផ្កាយ ៥ រួមនឹងកំពង់ផែ និងលទ្ធភាពព្រលានយន្តហោះផ្ទាល់របស់ខ្លួននៅកណ្ដាលកោះនេះ»។
លោកបន្ថែមថាដើម្បីចៀសវាងការចំណាយខ្ពស់ទាក់ទងនឹងចង្វាក់គ្រប់គ្រងសណ្ឋាគារធំៗម្ចាស់សណ្ឋាគារមានមូលដ្ឋាននៅប្រទេសថៃ និងលោក Peter Kaelli ភាគទុនិកគម្រោង ១០ ភាគរយនឹងទទួលខុសត្រូវលើការគ្រប់គ្រងរមណីយដ្ឋាននេះ។
ដើម្បីចូលទៅដល់ Royal Sands បច្ចុប្បន្នគេអាចធ្វើដំណើរតាមកាណូតពីកំពង់ផែក្រុងព្រះសីហនុ និងដោយឧទ្ធម្ភាគចក្រមានតម្លៃ ៧០០ ដុល្លារចេញពីព្រលានយន្តហោះក្រុងព្រះសីហនុ។
ផែនការសម្រាប់គម្រោងនេះត្រូវបានប្រកាសកាលពីចុងឆ្នាំ ២០១៥ ដែលនៅពេលនោះលោក ឃិន រ៉េមី ប្រធានក្រុមហ៊ុន Royal Group បានប្រាប់ភ្នំពេញប៉ុស្ដិ៍ថារមណីយដ្ឋានរបៀបវីឡានេះនឹងត្រូវបានបញ្ចប់ក្នុងឆ្នាំនេះមានតម្លៃ ៤០ លានដុល្លារ និងមាន ១៤៨ បន្ទប់។
ការិយាធិបតេយ្យនៅតែមានដោយសារតែ «គោលនយោបាយរដ្ឋបាលយឺត និងការច្រឡំលើអ្វីដែលត្រូវបានអនុម័ត» ដែលបានបន្ថយល្បឿនការអភិវឌ្ឍរបស់គម្រោងនេះ។ នេះបើយោងតាមលោក ឈុន ប៊ុនថា អនុប្រធានរមណីយដ្ឋាននេះ។ រមណីយដ្ឋាននេះបានបើកដំណើរការកាលពីថ្ងៃទី ២៣ ខែធ្នូ ឆ្នាំ ២០១៧ ដែលយឺតជាងផែនការមួយឆ្នាំ។
ក្រុមហ៊ុន Royal Group បានទទួលការជួល ៩៩ ឆ្នាំពីរដ្ឋាភិបាលដើម្បីអភិវឌ្ឍកោះរ៉ុងកាលពីឆ្នាំ ២០០៨ ហើយទោះបីជាក្រុមហ៊ុននេះបានបង្ហាញផែនការជាច្រើនសម្រាប់ការអភិវឌ្ឍលើកោះនេះកាលពីមុនក៏ដោយ ដែលរួមមានព្រលានយន្តហោះ សណ្ឋាគារ ទីលានវាយកូនគោលដោយជិះសេះ និងវាលលេងកូនគោល តែមិនមានគម្រោងផ្សេងទៀតទទួលបានផ្លែផ្កាទេនៅពេលនេះជាមួយនឹងផែនការពីមុនមួយចំនួនដែលធ្វើឲ្យក្រុមហ៊ុននេះមានជម្លោះជាមួយអាជ្ញាធរមូលដ្ឋាន និងប្រជាជនលើកោះនេះ៕ LA
