សៀមរាបៈ ក្រុមហ៊ុនសណ្ឋាគារដ៏ធំមួយរបស់វៀតណាម TTC Group បានប្រកាសដំណើរការសាខាក្រៅប្រទេសរបស់ខ្លួនដំបូងគេនៅកម្ពុជានៅសៀមរាប ស្របពេលដែលចំនួនភ្ញៀវទេសចរវៀតណាមមកកម្ពុជាបានកើនឡើងជាបន្តបន្ទាប់ជារៀងរាល់ឆ្នាំ។
TTC Group បានដំណើរការសណ្ឋាគារបុត្រសម្ព័ន្ធនៅកម្ពុជាដោយប្រើឈ្មោះថា TTC Hotel Premium-Angkor ដែលជាសណ្ឋាគារលំដាប់ផ្កាយ ៤ ដែលមាន ៨៤ បន្ទប់។ សណ្ឋាគារនេះត្រូវបានកែលម្អ និងរចនាឡើងវិញពីសណ្ឋាគារដែលមានស្រាប់ Golf Angkor Hotel។
កញ្ញា វៀត សុខនី អ្នកគ្រប់គ្រងផ្នែកលក់នៅសណ្ឋាគារ TTC Hotel Premium- Angkor បន្តពី Golf Angkor បានឲ្យដឹងថា សណ្ឋាគារថ្មីដែលប្រតិបត្តិការដោយម្ចាស់ជនជាតិវៀតណាម និងមានក្រុមហ៊ុនមេនៅប្រទេសវៀតណាមនឹងផ្ដល់អត្ថប្រយោជន៍សម្រាប់អាជីវកម្ម ខណៈភ្ញៀវទេសចរវៀតណាមនៅកម្ពុជាមានការកើនឡើងប្រចាំឆ្នាំ។
ខណៈសណ្ឋាគារដែលប្រតិបត្តិការស្ថិតក្រោមសណ្ឋាគារ Golf Angkor មានភ្ញៀវជនជាតិចិនភាគច្រើន កញ្ញា វៀត សុខនី ថ្លែងថា សណ្ឋាគារថ្មីនេះផ្ដល់ការស្នាក់នៅដល់ភ្ញៀវទេសចរវៀតណាមច្រើនជាងពីមុន។ កញ្ញាបន្តថា៖ «ទីផ្សារសម្រាប់ប្រជាជនវៀតណាមមានសក្ដានុពល ហើយយើងសង្ឃឹមថានឹងកំណត់ទិសដៅពួកគេ និងភ្ញៀវទេសចរអន្តរជាតិផ្សេងទៀតផងដែរ»។
កញ្ញាបន្តថា៖ «យើងនឹងភ្ជាប់ជាមួយក្រុមហ៊ុនមេនៅក្នុងប្រទេសវៀតណាមដើម្បីសហការជាមួយគ្នាទៅវិញទៅមកក្នុងការបញ្ជូនភ្ញៀវរបស់យើង»។
កញ្ញា វៀត សុខនី មិនអាចបញ្ចេញទុនវិនិយោគរបស់សណ្ឋាគារនេះទេ។ តាមតួលេខបានពីក្រសួងទេសចរណ៍ កម្ពុជាទទួលភ្ញៀវទេសចរអន្តរជាតិសរុប ៥,៦ លាននាក់កាលពីឆ្នាំមុន។ ក្នុងចំណោមចំនួននោះភ្ញៀវទេសចរវៀតណាមមាន ៨៣៥ ៣៣៥ នាក់ ជាប់ចំណាត់ថ្នាក់ទី ២ បន្ទាប់ពីចិនមានចំនួន ១,២ លាននាក់។
យោងតាមតួលេខរបស់វិទ្យាស្ថានទេសចរណ៍អង្គរចំនួនភ្ញៀវទេសចរមកទស្សនាប្រាសាទអង្គរវត្តបានកើនឡើងដល់ជិត ២,៥ លាននាក់កាលពីឆ្នាំ ២០១៧ កើនឡើង ១២ ភាគរយធៀបនឹងឆ្នាំ ២០១៦។
លោក ហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជាបានឲ្យដឹងកាលពីម្សិលមិញថាការមានប្រតិបត្តិករកាន់តែច្រើន ដើម្បីផ្ដល់សេវាបដិសណ្ឋារកិច្ចនៅកម្ពុជានឹងរួមចំណែកដល់ការបង្កើនចំនួនភ្ញៀវទេសចរនៅកម្ពុជា។ ទោះបីយ៉ាងនេះក្តីលោក ហូ វណ្ឌី បានស្នើឲ្យអាជ្ញាធរវៀតណាមត្រូវផ្ដល់ការជួយសម្រួល និងកាត់បន្ថយរបាំងវិនិយោគ ដើម្បីអនុញ្ញាតឲ្យក្រុមវិនិយោគិនកម្ពុជាក្នុងការស្វែងរកឱកាសអាជីវកម្មនៅវៀតណាមផងដែរ។
លោកបានថ្លែងថា៖ «យើងស្វាគមន៍ក្រុមវិនិយោគិនទាំងអស់មកពីទិសដៅផ្សេងៗ តែយើងក៏ស្នើមានការអនុវត្តស្មើគ្នាផងដែរ»។ លោកបន្តថា៖ «ក្រុមវិនិយោគិនកម្ពុជាកាន់តែច្រើនកំពុងស្វែងរកការពង្រីកអាជីវកម្មរបស់ពួកគេនៅបរទេសដូចជា វៀតណាម ដូច្នេះការធានាការប្រកួតប្រជែងដោយស្មើភាពគឺចាំបាច់»៕LA