.jpg)
ទិដ្ឋភាពអាងហែលទឹក នៅក្នុង Sokha Angkor Resort ខេត្តសៀមរាប។ សហការី
ភ្នំពេញៈ សណ្ឋាគារចំនួន ៣៥ គិតត្រឹមថ្ងៃ ពុធម្សិលមិញ បានដាក់ពាក្យស្នើសុំវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានលើកទី៧ សម្រាប់ឆ្នាំ ២០២០-២០២២ ដើម្បីប្រកួតប្រជែងជាមួយប្រទេសជាសមាជិកអាស៊ានទំាង ១០ ដែលគ្រោងនឹងប្រកាសនៅវេទិកាទេសចរណ៍អាស៊ាន ឆ្នាំ ២០២០ នៅប៊្រុយណេ។
លោក គឹម សេរីរដ្ឋ ប្រធាននាយកដ្ឋានសេវាកម្ម ស្នាក់នៅ ទេសចរណ៍ និងម្ហូបអាហារ បានប្រាប់ភ្នំពេញប៉ុស្តិ៍ម្សិលមិញថា គិតត្រឹមថ្ងៃទី ២៦ មិថុនានេះ ម្ចាស់អាជីវកម្មសណ្ឋាគារចំនួន ៣៥ នៅខេត្តសៀមរាប រាជធានីភ្នំពេញ និងខេត្តកំពត បានដាក់ពាក្យស្នើសុំវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានសម្រាប់ឆ្នាំនេះ។
បើតាមសេចក្តីប្រកាសព័ត៌មានក្រសួងទេសចរណ៍បញ្ជាក់ថា ការពិនិត្យស្នើសុំនឹងបញ្ចប់នៅថ្ងៃទី ២៨ មិថុនា បន្ទាប់មកក្រសួងនឹងចុះពិនិត្យទីតំាងសណ្ឋាគារចាប់ពីថ្ងៃទី ១៥ កក្កដា ដល់ថ្ងៃទី ២៨ កញ្ញា ឆ្នំា ២០១៩។
ព្រឹត្តិការណ៍វាយតម្លៃវិញ្ញាបនបត្រ និងស្លាកសញ្ញាស្តង់ដាសណ្ឋាគារបៃតងអាស៊ានធ្វើឡើងរៀងរាល់ ២ ឆ្នាំម្តង់។
លោក សេរីរដ្ឋ បញ្ជាក់ថា សម្រាប់កម្ពុជាគ្រោងបញ្ជូនឈ្មោះសណ្ឋាគារចន្លោះពី ៧ ទៅ ១០ ដូចរាល់ឆ្នាំ។ លោកថ្លែងថា៖ «ប្រសិនបើកម្ពុជាឈ្នះពានរង្វាន់នេះ នឹងជួយលើកមុខមាត់ប្រទេស កម្ពុជា បន្ថែមទៀតតាមវិស័យសណ្ឋាគារនេះ»។
លោក សេរីរដ្ឋ បន្តថាគណៈកម្មការវាយតម្លៃស្តង់ដាសណ្ឋាគារគឺផ្តោតលើ ១១ ចំណុច រួមមានទីតំាងសុវត្ថិភាពសណ្ឋាគារ សេវាកម្ម ការយកចិត្តទុកដាក់លើបុគ្គលិក ការចូលរួមកិច្ចការជួយសង្គមរបស់សណ្ឋាគារ ការអភិរក្សវប្បធម៌ ការប្រើប្រាស់ផលិតផលក្នុងស្រុក និងការចូលរួមការពារបរិស្ថានតាមរយៈសន្សំសំចៃទឹកភ្លើង ព្រមទំាងការទុកដាក់កាកសំណល់រឹង និងរាវ៕LA
