.jpg)
ទិដ្ឋភាពកម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅទីក្រុងភ្នំពេញនាពេលកន្លងមក។ រូបថត ភ្នំពេញ ប៉ុស្តិ៍
ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃអង្គារបានឲ្យដឹងថា សន្ដិភាព និងស្ថិរភាពនយោបាយបានធ្វើជាមូលដ្ឋានគ្រឹះដ៏រឹងមាំនៃដំណើរការអភិវឌ្ឍន៍សេដ្ឋកិច្ចកម្ពុជាឲ្យសម្រេចបានកំណើនខ្ពស់ប្រមាណ ៧,១ ភាគរយក្នុងបរិការណ៍អតិផរណាទាប អត្រាប្តូរប្រាក់មានស្ថិរភាព និងទុនបម្រុងអន្តរជាតិបន្តកើនឡើង។
នៅក្នុងពិធីរំឭកខួបលើកទី ៤១ នៃថ្ងៃរំដោះ ៧ មករា (៧មករា ឆ្នាំ ១៩៧៩ ៧មករា ឆ្នាំ ២០២០) កាលពីថ្ងៃម្សិលមិញលោកនាយករដ្ឋមន្ដ្រីដែលជាប្រធានគណបក្សប្រជាជនកម្ពុជាដែលកំពុងកាន់អំណាចផងដែរ បានថ្លែងទៅកាន់សមាជិករបស់គណបក្សរាប់ពាន់នាក់នៅសាលសន្និសីទកោះពេជ្រថា កំណើននេះត្រូវបានគាំទ្រដោយកំណើនល្អប្រសើរនៃវិស័យសេវាកម្ម និងកំណើនខ្ពស់នៃវិស័យឧស្សាហកម្ម ថ្វីបើវិស័យកសិកម្មនៅបន្តមានកំណើនទាបក្ដី។
ស្ថិរភាពនយោបាយបានផ្ដល់ទំនុកចិត្តដល់វិនិយោគិនទាំងក្នុងប្រទេស និងក្រៅប្រទេសក្នុងការបណ្ដាក់ទុននៅកម្ពុជា ជាពិសេសលើវិស័យសំណង់ និងកម្មន្តសាល។ ព្រមជាមួយនេះការប្រើប្រាស់ក្នុងស្រុក និងពាណិជ្ជកម្មអន្តរជាតិមានសម្ទុះកើនឡើងគួរឲ្យកត់សម្គាល់។
លោកថ្លែងថា៖ «លើមូលដ្ឋានសមិទ្ធកម្មនៃវិស័យសេដ្ឋកិច្ច និងការបែងចែកផ្លែផ្កានៃកំណើនដោយសមធម៌ក្នុងក្របខណ្ឌសង្គមទាំងមូល ធ្វើឲ្យជីវភាពរបស់ប្រជាជនកាន់តែមានភាពប្រសើរឡើងដែលឆ្លុះបញ្ចាំងតាមរយៈការកើនឡើងនៃផលិតផលក្នុងស្រុកសរុបជាមធ្យមសម្រាប់មនុស្សម្នាក់ពី ១ ៥៤៨ ដុល្លារក្នុង ១ ឆ្នាំកាលពីឆ្នាំ ២០១៨ ដល់ប្រមាណ ១ ៦៧៩ ដុល្លារក្នុងឆ្នាំ ២០១៩។ អត្រាភាពក្រីក្រត្រូវបានកាត់បន្ថយមកក្រោម ១០ ភាគរយនាបច្ចុប្បន្ន។
ម្យ៉ាងទៀតកម្ពុជារក្សាបានសន្ដិសុខការងារដោយអត្រាគ្មានការងារមានប្រមាណ ០,៣ ភាគរយប៉ុណ្ណោះ។ លោកបន្ថែមថា រដ្ឋាភិបាលបានយកចិត្តទុកដាក់ខ្ពស់ដល់ការលើកស្ទួយជីវភាពប្រជាកសិករ ពិសេសតាមរយៈការជំរុញផលិតកម្ម ការខិតខំរក្សាស្ថិរភាពថ្លៃកសិផល និងការពង្រីកទីផ្សារកសិផល។
កំណើនសេដ្ឋកិច្ចរបស់ប្រទេសកម្ពុជាបានកើនឡើងដល់ ៧,១ ភាគរយកាលពីឆ្នាំមុន ជាមួយនឹងអត្រាអតិផរណាប្រមាណ ១,៩ ភាគរយ។ ឆ្នាំនេះកំណើនសេដ្ឋកិច្ចនឹងមានកំណើន ៧ ភាគរយជាមួយនឹងអត្រាអតិផរណាប្រហែល ២,៣ ភាគរយ។ នេះបើតាមរបាយការណ៍ម៉ាក្រូសេដ្ឋកិច្ច និងការរីកចម្រើនធនាគារឆ្នាំ ២០១៩ និងចក្ខុវិស័យឆ្នាំ ២០២០ របស់ធនាគារជាតិនៃកម្ពុជា (NBC) ដែលបានចេញផ្សាយកាលពីសប្ដាហ៍មុន។
លោក កាំង ម៉ូនីកា អគ្គនាយករងសមាគមក្រុមហ៊ុនរោងចក្រកាត់ដេរនៅកម្ពុជា (GMAC) ដែលតំណាងឲ្យជាង ៥០០ រោងចក្រកាត់ដេរបានប្រាប់ភ្នំពេញប៉ុស្ដិ៍កាលពីម្សិលមិញថា កម្ពុជាជាប្រទេសជើងឯកមួយទាក់ទងនឹងការកាត់បន្ថយភាពក្រីក្រ។ តទៅមុខវិស័យឯកជនចង់ឃើញសន្ដិភាព ស្ថិរភាពសង្គម និងនយោបាយជាបន្តស្រប នឹងការកែទម្រង់ជាក់ស្ដែង ឆ្លើយតបនឹងបរិយាកាសប្រកួតប្រជែងពិភពលោក យើងអាចនិយាយដោយជឿជាក់ថា ប្រវត្តិសាស្ដ្រនឹងវិនិច្ឆ័យរដ្ឋាភិបាលបច្ចុប្បន្នដោយត្រឹមត្រូវ»។ លោកថ្លែងថា៖ «ពិតហើយនៅមានការងារជាច្រើនត្រូវធ្វើ ដើម្បីឆ្លើយតបនឹងបរិយាកាសពិភពលោកដែលផ្លាស់ប្តូរយ៉ាងរហ័សនៅពេលបច្ចុប្បន្ន ហើយរដ្ឋាភិបាលនឹងត្រូវតែបន្តធ្វើនវានុវត្តន៍»។
លោក Reid Kirchenbauer ស្ថាបនិក ក្រុមហ៊ុន Investmentasia បានសរសេរថា ប្រទេសកម្ពុជាស្ថិតក្នុងចំណោមបណ្ដាប្រទេសអាស៊ាន ៤ ផ្សេងទៀតមានដូចជាវៀតណាម ហ្វីលីពីន និងឥណ្ឌូនេស៊ីដែលជាប្រទេសល្អបំផុត ៤ ក្នុងការវិនិយោគនៅអាស៊ីក្នុងឆ្នាំ ២០២០។ លោកបានសរសេរថា៖ «ការរីកចម្រើនរបស់កម្ពុជាចាប់តាំងពីទសវត្សរ៍ឆ្នាំ ១៩៨០ មិនមានអ្វីគួរឲ្យភ្ញាក់ផ្អើលនោះទេ។ ថ្ងៃនេះពួកគេគឺជាប្រទេសមានសេដ្ឋកិច្ចរីកចម្រើនរហ័សជាងគេរបស់អាស៊ី និងជាទីផ្សារជួរមុខ»។
NBC បានឲ្យដឹងថា ប្រទេសកម្ពុជាបានទាក់ទាញការវិនិយោគផ្ទាល់បរទេស(FDI) មានតម្លៃជាង ៣,៥៨ ពាន់លានដុល្លារកាលពីឆ្នាំ ២០១៩ កើនឡើងជិត ១២ ភាគរយកាលពីឆ្នាំ ២០១៨។ ក្នុងចំណោមសរុបនេះវិស័យហិរញ្ញវត្ថុមានតម្លៃ ២,៣៨ ពាន់លានដុល្លារ ខណៈវិស័យមិនមែនហិរញ្ញវត្ថុទទួលបាន ១,២០ ពាន់លានដុល្លារ៕ LA
