The Phnom Penh Post Search

Search form

Logo of Phnom Penh Post newspaper Phnom Penh Post - សន្ទុះ​នៃ​ការ​នាំ​ចេញ​អង្ករ​របស់​កម្ពុជា​នៅ​តែ​មាន​កម្រិត​ទាប




សន្ទុះ​នៃ​ការ​នាំ​ចេញ​អង្ករ​របស់​កម្ពុជា​នៅ​តែ​មាន​កម្រិត​ទាប

កម្មករ​កំពុង​លី​អង្ករ​នៅ​រោង​ម៉ាស៊ីន​កែច្នៃ​អង្ករ​របស់​ក្រុម​ហ៊ុន ខ្មែរ​ហ្វូត នា​ពេល​កន្លង​មក។
កម្មករ​កំពុង​លី​អង្ករ​នៅ​រោង​ម៉ាស៊ីន​កែច្នៃ​អង្ករ​របស់​ក្រុម​ហ៊ុន ខ្មែរ​ហ្វូត នា​ពេល​កន្លង​មក។ ហេង ជីវ័ន

សន្ទុះ​នៃ​ការ​នាំ​ចេញ​អង្ករ​របស់​កម្ពុជា​នៅ​តែ​មាន​កម្រិត​ទាប

ភ្នំពេញៈ ការ​នាំ​ចេញ​អង្ករ​របស់​កម្ពុជា​នៅ​ក្នុង​រយៈ​ពេល ៩​ខែ ដំបូង​បាន​កើន​ឡើង​បន្តិច​បើ​ធៀប​នឹង​រយៈ​ពេល​ដូច​គ្នា​កាល​ពីឆ្នាំ​មុន។ នេះ​បើ​យោង​តាម​របាយ​ការណ៍​បឋម​ដែល ភ្នំពេញ ប៉ុស្ដិ៍ បាន​ទទួល​បាន​កាល​ពី​ចុង​សប្តាហ៍​មុន។

តំណាង​ឧស្សាហ​កម្ម​បាន​លើក​ឡើង​ថា កំណើន​នេះ​គឺ​ស្ថិត​ក្រោម​ការ​ព្យាករ ប៉ុន្តែ​ថា​វា​ជា​សញ្ញា​ដ៏​ល្អ​មួយ​សម្រាប់​វិស័យ​នេះ។

របាយ​ការណ៍​បង្ហាញ​ថា ចាប់​ពី ខែ​មករា ដល់ ខែ​កញ្ញា កម្ពុជា​បាន​នាំ​ចេញ​អង្ករ​ប្រហែល ២៦៩ ៣៧០ តោន​ដែល​កើន​ឡើង ១,២ ភាគ​រយ ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។ ក្នុង​ចំនួន​នេះ អង្ករ​ក្រអូប​សរុប​កើន​ឡើង ៤៦ ភាគ​រយ​ខណៈ​ដែល​អង្ករ​ស​កើន​ឡើង ៤៧ ភាគរយ ហើយ​អង្ករ​ចំហុយ​គ្រាប់​វែង​កើន​ឡើង ៦,២ ភាគ​រយ​នៃ​ការ​នាំ​ចេញ។

លោក សុខ ពុទ្ធីវុធ ប្រធាន​សហព័ន្ធ ស្រូវ-អង្ករ កម្ពុជា បាន​ថ្លែង​ថា តួលេខ​នេះ​គឺ​គ្រាន់​តែ​ជា​ការ​កើន​ឡើង​បន្តិច​ចំពោះ​ទិស​ដៅ​កំណត់​ដោយ​សារ​តែ​ស្តុក​ទុក​លើស​របស់​អង្ករ​ថៃ​ត្រូវ​បាន​ចាក់​បញ្ចូល​ទៅ​ក្នុង​ទីផ្សារ​ពិភពលោក។

លោក​លើក​ឡើង​ថា៖ «យើង​រំពឹង​ថា មាន​ចំនួន​កាន់​តែ​ល្អ​ប្រសើរ​ពី​ដើម​ឆ្នាំ​នេះ ប៉ុន្តែ​យើង​ប្រឈម​នឹង​ការ​ស្តុក​ទុក​អង្ករ​លើស​កម្រិត​នៅ​ក្នុង​ទីផ្សារ​ពិភពលោក ដូច្នេះ​ខ្ញុំ​រំពឹង​ថា នឹង​មើល​ឃើញ​ការ​កើន​ឡើង​ដូច​ឆ្នាំ​មុន»។

ខណៈ​ដែល​តួលេខ​នាំ​ចេញ​រួម​បង្ហាញ​ថា មាន​ការ​កើន​ឡើង​បន្តិច​ចំនួន​នៃ​ការ​នាំ​ចេញ​នៅ​ក្នុង ខែ​កញ្ញា តែ​មួយ​បាន​កើន​ឡើង ២០ ភាគរយ។

លោក គឹម សាវុធ ប្រធាន​ក្រុម​ហ៊ុន ខ្មែរ​ហ្វូត ដែល​ជា​ក្រុម​ហ៊ុន​នាំ​ចេញ​អង្ករ​ធំ​មួយ​របស់​ប្រទេស​កម្ពុជា បាន​យល់​ឃើញ​ថា តម្រូវ​ការ​កំពុង​កើន​ឡើង​ពី​ប្រទេស​ចិន និង ប្រទេស​ម៉ាឡេស៊ី ជំរុញ​ឲ្យ​តួលេខ​នាំ​ចេញ​កើន​ឡើង​កាល​ពី​ខែ​កញ្ញា។

លោក​បន្ត​ថា៖ «ការ​បញ្ជា​ទិញ​ពី​បណ្ដា​ប្រទេស​អឺរ៉ុប​នៅ​តែ​មាន​ស្ថិរភាព ខណៈ​ដែល​បណ្ដា​ប្រទេស​ទាំង​ពីរ​នេះ [ចិន ម៉ាឡេស៊ី] បាន​បង្កើន​ការ​បញ្ជា​ទិញ​របស់​ខ្លួន»។ លោក​បន្ថែម​ថា ការ​បញ្ជា​ទិញ​កាន់​តែ​តិច​របស់​បណ្ដា​ប្រទេស​ទាំង​ពីរ​នេះ​កាល​ពី​ដើម​ឆ្នាំ​បាន​ជំរុញ​ឲ្យ​មាន​តម្រូវ​ការ​នៅ​ពេល​នេះ។

លោក សាវុធ រំពឹង​ថា តួលេខ​នាំ​ចេញ​នឹង​កើន​ឡើង​ខ្ពស់​ជាង​កាល​ពី​ឆ្នាំ​មុន ប៉ុន្តែ​លោក​ថ្លែង​ថា វា​នឹង​អាស្រ័យ​លើ​ការ​បញ្ជា​ទិញ​របស់ ប្រទេស​ចិន ដោយ​លោក​បាន​លើក​ឡើង​ពី​កិច្ច​ព្រម​ព្រៀង​ដ៏​សំខាន់​ដើម្បី​នាំ​ចូល​អង្ករ ១០០ ០០០ តោន​ពី ប្រទេស​កម្ពុជា ជាមួយ​នឹង​ក្រុម​ហ៊ុន China National Cereals, Oils and Foodstuffs Corporation (COFCO) ដែល​គ្រប់​គ្រង​ដោយ​រដ្ឋាភិបាល​ចិន​កាល​ពី​ខែ​មុន។

ប្រទេស​បារាំង នៅ​តែ​ជា​ប្រទេស​ដែល​នាំ​ចូល​អង្ករ​កម្ពុជា​ឈាន​មុខ​គេ​បន្ទាប់​មក គឺ ប្រទេស​ប៉ូឡូញ ម៉ាឡេស៊ី ហូឡង់ និង​ចិន៕

អត្ថបទគួរចាប់អារម្មណ៍