.jpg)
អ្នកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជាឡើងថ្លែងក្នុងឱកាសសន្និសីទម៉ាក្រូសេដ្ឋកិច្ចប្រចាំឆ្នាំលើកទី ៦ កាលពីឆ្នាំ ២០១៩។ សហការី
ភ្នំពេញៈ ធនាគារជាតិនៃកម្ពុជា (NBC) នឹងរៀបចំសន្និសីទម៉ាក្រូសេដ្ឋកិច្ចលើកទី ៧ ក្រោមប្រធានបទ «ការពិភាក្សាលើម៉ូដែលអភិវឌ្ឍន៍សេដ្ឋកិច្ចកម្ពុជា» ដើម្បីប្រមូលធាតុចូលពីក្រុមអ្នកស្រាវជ្រាវ ក្រុមសេដ្ឋវិទូ និងវិនិយោគិននៅក្នុងឧស្សាហកម្ម សម្រាប់រចនាសម្ព័ន្ធសេដ្ឋកិច្ចនៅក្រោយវិបត្តិកូវីដ ១៩។
សន្និសីទដែលនឹងរៀបចំឡើងនៅក្រុងភ្នំពេញនៅខែធ្នូចុងឆ្នាំនេះ គឺដើម្បីផ្ដល់ពេលវេលាសម្រាប់សាធារណជន និងភាគីពាក់ព័ន្ធសំខាន់ៗក្នុងការចុះឈ្មោះចូលរួមក្នុងព្រឹត្តិការណ៍នេះ។
NBC បានឲ្យដឹងក្នុងសេចក្ដីប្រកាសព័ត៌មានថា ចាប់តាំងពីដើមឆ្នាំ ២០២០ ការរីករាលដាលនៃកូវីដ១៩ បានធ្វើឲ្យសេដ្ឋកិច្ចពិភពលោកទទួលរងផលប៉ះពាល់យ៉ាងខ្លាំង ជាពិសេសនៅក្នុងប្រទេសដែលពឹងផ្អែកលើវិស័យខាងក្រៅ ដោយសារការធ្លាក់ចុះពាណិជ្ជកម្មអន្តរជាតិ និងការវិនិយោគ។ វិបត្តិសុខភាពពិភពលោកដែលកំពុងក្លាយជាវិបត្តិសេដ្ឋកិច្ចនេះបានធ្វើឲ្យមានការផ្លាស់ប្តូរដំណើរការសេដ្ឋកិច្ច ទំនាក់ទំនងរហូតដល់រចនាសម្ព័ន្ធសេដ្ឋកិច្ច នៅក្នុងនិងក្រោយពេលវិបត្តិ។
NBC បន្តថា៖ «ចំពោះកម្ពុជា ដោយសារសេដ្ឋកិច្ចមានភាពបើកចំហ និងពឹងផ្អែកខ្លាំងលើវិស័យខាងក្រៅ រួមមានការនាំចេញផលិតផលវាយនភណ្ឌ ទេសចរណ៍ សំណង់ និងការវិនិយោគ កំណើនសេដ្ឋកិច្ចនៅឆ្នាំ ២០២០ នេះក៏ប្រឈមនឹងការថមថយ ដូចបណ្ដាប្រទេសនានាលើពិភពលោកដែរ។ ដើម្បីសម្របខ្លួនទៅនឹងបរិបទថ្មីនៃសេដ្ឋកិច្ចពិភពលោក តើកម្ពុជាគួរអនុវត្តម៉ូដែលសេដ្ឋកិច្ចបែបណាដែលអាចមានភាពធន់ខ្លាំងនឹងវិបត្តិ និងសម្រេចបានដោយជោគជ័យនូវគោលដៅដែលបានគ្រោងទុក?»។
NBC បន្តថាស្ថិតក្នុងបរិការណ៍នេះ ធនាគារជាតិជ្រើសរើសយកប្រធានបទស្រាវជ្រាវគោល «ការពិភាក្សាលើម៉ូដែលអភិវឌ្ឍន៍សេដ្ឋកិច្ចកម្ពុជាសម្រាប់សន្និសីទម៉ាក្រូសេដ្ឋកិច្ចប្រចាំឆ្នាំលើកទី ៧ ដែលគ្រោងនឹងប្រព្រឹត្តទៅនៅខែធ្នូ ឆ្នាំ ២០២០»។
គោលបំណងសន្និសីទនេះគឺដើម្បីលើកកម្ពស់ការស្រាវជ្រាវស្ដីពីប្រធានបទខាងលើ និងផ្តល់ជាវេទិកាពិភាក្សាជុំវិញម៉ូដែលអភិវឌ្ឍន៍សេដ្ឋកិច្ចប្រកបដោយចីរភាពដែលអាចក្លាយជាធាតុចូលក្នុងការរៀបចំគោលនយោបាយសេដ្ឋកិច្ច ដើម្បីឈានទៅសម្រេចបាននូវចក្ខុវិស័យអនាគតរបស់កម្ពុជា។
កាលពីថ្ងៃទី ២៩ ខែឧសភា ធនាគារពិភពលោក (WB) បានទម្លាក់ការព្យាកររបស់ខ្លួនសម្រាប់កំណើនសេដ្ឋកិច្ចកម្ពុជាថា នឹងធ្លាក់ចុះចន្លោះពី -១ ទៅ -២,៩ ភាគរយ នៅឆ្នាំ ២០២០ នេះដោយសារការរីករាលដាលនៃជំងឺកូវីដ១៩ កំពុងប៉ះពាល់ដល់វិស័យសំខាន់ៗដែលជាវិស័យជំរុញកំណើនសេដ្ឋកិច្ចដូចជា ទេសចរណ៍ ការនាំចេញផលិតផល និងសំណង់ដែលបញ្ចូលគ្នាមានចំនួនជាង ៧០ ភាគរយនៃកំណើនសេដ្ឋកិច្ចរបស់ប្រទេស និងជិត ៤០ ភាគរយនៃការងារទទួលបានប្រាក់ខែ។
WB បង្ហាញថា ភាពក្រីក្រក្នុងឆ្នាំ ២០២០ អាចកើនឡើងក្នុងចំណោមគ្រួសារដែលជាប់ពាក់ព័ន្ធក្នុងវិស័យសំខាន់ៗទាំងនេះ ចន្លោះពី ៣ ទៅ ១១ ពិន្ទុភាគរយខ្ពស់ជាងកម្រិតមូលដ្ឋាន ឬពេលមិនមានជំងឺកូវីដ ១៩។
លោកស្រី Inguna Dobraja នាយកប្រចាំប្រទេសកម្ពុជារបស់ WB បានឲ្យដឹងថា ការរីករាលដាលជំងឺកូវីដ១៩ បានប៉ះពាល់យ៉ាងខ្លាំងលើសេដ្ឋកិច្ចរបស់កម្ពុជានៅឆ្នាំនេះ។
លោកស្រីថ្លែងថា៖ «វិបត្តិពិភពលោកដែលជំរុញដោយការរីករាលដាលជំងឺកូវីដ ១៩ បានប៉ះពាល់យ៉ាងខ្លាំងលើសេដ្ឋកិច្ចប្រទេសកម្ពុជា»។ លោកស្រីបន្តថា៖ «ធនាគារពិភពលោកបានប្ដេជ្ញាចិត្តថានឹងជួយប្រទេសកម្ពុជាដោះស្រាយវិបត្តិជំងឺកូវីដ ១៩ ប្រកបដោយប្រសិទ្ធភាព និងពង្រឹងសេដ្ឋកិច្ចឲ្យមានការស្ទុះងើបឡើងវិញ និងរឹងមាំនៅពេលអនាគត»៕ LA
