កម្មវិធីសប្តាហ៍ម្ហូបអាហារអាមេរិក (US Food Week) បានត្រឡប់សាជាថ្មីមកកាន់ទីក្រុងភ្នំពេញ ស្របពេលដែលផលិតផលម្ហូបអាហារអាមេរិកកាន់តែមានប្រជាប្រិយភាពក្នុងចំណោមប្រជាជនកម្ពុជាដែលមានជីវភាពធូរធារ។
កម្មវិធីដែលមានរយៈពេល ១០ ថ្ងៃនេះនឹងមានបង្ហាញនូវសាច់គោអាមេរិក ដំឡូងបារាំង ទំពាំងបាយជូរក្រៀមកាលីហ្វ័រនីញ៉ា និងសណ្តែកស្ងួត សណ្តែកបាយ សណ្តែក Chickpeas ព្រមទាំងស្រាមកពីសហរដ្ឋអាមេរិកផងដែរ។
បណ្តាប្រជាជនកម្ពុជា និងក្រុមភ្ញៀវទេសចរបានបង្ហាញចំណាប់អារម្មណ៍យ៉ាងខ្លាំងចំពោះម្ហូបអាហារអាមេរិក។ តម្លៃនៃការនាំចូលផលិតផលចំណីអាហារផ្អែកតាមការចង់បានរបស់អតិថិជនមកកាន់ប្រទេសកម្ពុជាបានកើនឡើងស្ទើរតែ ១ ទ្វេជា ២ ពោលគឺពី ១០,៣ លានដុល្លារអាមេរិកនៅក្នុងឆ្នាំ ២០១៣ មក ១៩,៦ លានដុល្លារអាមេរិកនៅក្នុងឆ្នាំ ២០១៧។
កម្មវិធីសប្តាហ៍ម្ហូបអាហារអាមេរិកនេះនឹងមានរួមបញ្ចូលនូវសកម្មភាពជាច្រើននៅក្នុងវិស័យចំណីអាហារ។ កត្តានេះបង្ហាញពីទំនាក់ទំនងយ៉ាងជិតស្និទ្ធរវាងសហរដ្ឋអាមេរិក និងវិស័យចំណីអាហារនៅប្រទេសកម្ពុជា។
ក្នុងសុន្ទរកថាស្វាគមន៍នៅពេលបើកកម្មវិធីកាលពីថ្ងៃសុក្រសប្តាហ៍មុនលោក Gerald H. Smith ជាអនុព័ន្ធកសិកម្មជាន់ខ្ពស់នៃស្ថានអគ្គកុងស៊ុលអាមេរិក នៅទីក្រុងហូជីមិញបានថ្លែងថា៖ «ប្រទេសកម្ពុជាកំពុងតែក្លាយជាទីផ្សាររីកដុះដាលសម្រាប់ម្ហូបអាហារអាមេរិក។ ក្នុងរយៈពេល ៥ ឆ្នាំចុងក្រោយនេះផលិតផលចំណីអាហារ និងកសិផល (ត្រូវបាននាំចូល) ច្រើនជាងមុនទ្វេដង ហើយទីផ្សារកំពុងតែមានការរីកចម្រើនជាខ្លាំង»។
លោកបានបន្តទៀតថាបណ្តាផលិតផលដែលមានការពេញនិយមខ្លាំងគឺសាច់គោអាមេរិក និងដំឡូងបារាំងក្លាស្សេកក ក៏ប៉ុន្តែការលក់គ្រាប់ធញ្ញជាតិ និងទំពាំងបាយជូរក្រៀមកាលីហ្វ័រនីញ៉ាក៏មានការកើនឡើងផងដែរ។
ចាប់តាំងពីថ្ងៃទី ១ ដល់ថ្ងៃទី ១២ ខែធ្នូ បណ្តាក្រុមហ៊ុន និងអាជីវករនាំចូល ចុងភៅ និងភោជនីយដ្ឋាននឹងធ្វើការជាមួយនឹងគ្នាយ៉ាងជិតស្និទ្ធទៅលើព្រឹត្តិការណ៍យ៉ាងច្រើនជាបន្តបន្ទាប់ក្នុងកម្មវិធី ដើម្បីលើកកម្ពស់ផលិតផលចំណីអាហារអាមេរិក។
ថ្លែងនៅក្នុងកម្មវិធីអនុរដ្ឋលេខាធិការក្រសួងពាណិជ្ជកម្មលោក ពេជ ឬទ្ធី បាននិយាយថា សេដ្ឋកិច្ចកម្ពុជាទទួលបានការរីកលូតលាស់ដ៏ល្អប្រពៃជាមួយនឹងកំណើនសេដ្ឋកិច្ចជាមធ្យម ៧ ភាគរយហើយនេះគឺជាឱកាសមួយសម្រាប់ក្រុមហ៊ុនអាមេរិកនានាឲ្យមកធ្វើការវិនិយោគនៅប្រទេសកម្ពុជា។
លោក ពេជ ឬទ្ធី និយាយថា៖ «កម្ពុជាកំពុងតែទទួលបានកំណើនដ៏ល្អ ព្រមទាំងមានភ្ញៀវទេសចរមកលេងជាច្រើន។ ក្រុមប្រឹក្សាសណ្តែកអាមេរិក (US Dry Bean Council) និងផលិតផល (ផលិតករ) ដទៃទៀតគួរតែពិចារណាមកធ្វើការវិនិយោគនៅប្រទេសកម្ពុជា។ យើងគឺជាសមាជិករបស់អាស៊ាន និង WTO (អង្គការពាណិជ្ជកម្មពិភពលោក) ហើយមានប្រជាជនជាអ្នកប្រើប្រាស់ និងទទួលទានប្រមាណ ៦៥០ លាននាក់ក្នុងតំបន់អាស៊ាន ដូច្នេះទីផ្សារអ្នកប្រើប្រាស់ និងទទួលទានពិតជាមានទំហំធំណាស់»។
កម្មវិធីបានចាប់ផ្តើមកាលពីសប្តាហ៍មុនជាមួយនឹងសិក្ខាសាលាបណ្តុះបណ្តាលសម្រាប់មេចុងភៅចំនួន ២ ដែលត្រូវបានរៀបចំឡើងដោយវិទ្យាស្ថានម្ហូបអាហារកម្ពុជា។ សិក្ខាសាលាបណ្តុះបណ្តាលទាំងនេះត្រូវបាននាំមកដោយសហព័ន្ធអ្នកជំនាញផ្នែកសាច់អាមេរិក និងវិទ្យាស្ថានម្ហូបអាហារអាមេរិកក្នុងនាមជាសេវាកម្មឧស្សាហកម្មមួយសម្រាប់ក្រុមហ៊ុនក្រុមប្រឹក្សាសណ្តែកអាមេរិក។ សិក្ខាសាលាបណ្តុះបណ្តាលនីមួយៗមានវត្តមានបណ្តាមេចុងភៅប្រមាណពី ២០ ទៅ ២៥ នាក់ ។
នៅក្នុងឱកាសបើកកម្មវិធី ម្ហូបអាហារ និងស្រាអាមេរិកនានាត្រូវបានបង្ហាញទៅដល់ក្រុមអ្នកចូលរួមដោយក្រុមហ៊ុននាំចូលចំណីអាហារអាមេរិកដែលមានមូលដ្ឋាននៅកម្ពុជា និងដៃគូឧស្សាហកម្មនៅអាមេរិកផ្សេងៗទៀត។ ក្រៅពីនេះភោជនីយដ្ឋានឈានមុខគេចំនួន ១៦ នៅក្រុងភ្នំពេញនឹងធ្វើការផ្សព្វផ្សាយពីម៉ឺនុយរបស់ខ្លួនចាប់តាំងពីថ្ងៃទី ១ ដល់ថ្ងៃទី ៩។
នៅថ្ងៃសៅរ៍ និងថ្ងៃអាទិត្យ (ថ្ងៃទី ១ និងទី ២ ខែធ្នូ) ចៅក្រមវិនិច្ឆ័យមកពីអាមេរិកមួយក្រុមនឹងទៅភ្លក្សរសជាតិម្ហូបនៅភោជនីយដ្ឋាននីមួយៗ ហើយវាយតម្លៃទៅលើភោជនីយដ្ឋានទាំងនោះទៅលើម៉ឺនុយក៏ដូចជាបរិយាកាសរបស់ពួកគេដែលត្រូវបានរៀបចំឡើងសម្រាប់កម្មវិធី សប្តាហ៍ម្ហូបអាហារអាមេរិកនេះ។
ការប្រកួតប្រជែងចុងភៅវ័យក្មេងមួយក៏នឹងត្រូវបានប្រារព្ធឡើងនៅថ្ងៃទី ៤ ខែធ្នូ នៅវិទ្យាស្ថានម្ហូបអាហារកម្ពុជានៅអំឡុងកម្មវិធីផងដែរ។ បណ្តាមេចុងភៅវ័យក្មេងមកពីភោជនីយដ្ឋាន និងសណ្ឋាគារនានានៅទូទាំងក្រុងភ្នំពេញត្រូវបានអញ្ជើញឲ្យមកចូលរួម និងបង្ហាញពីជំនាញបច្ចេកទេសរបស់ពួកគាត់ក្នុងការអភិវឌ្ឍ និងរៀបចំចម្អិនម្ហូបដែលផ្សំឡើងពីគ្រឿងផ្សំមកពីអាមេរិក។ លោក ហែម ស៊ីមានី ជាជំនួយការអ្នកគ្រប់គ្រងនៃក្រុមហ៊ុន Lee''s Foodservices Ltd ដែលជាក្រុមហ៊ុននាំចេញ និងនាំចូលចំណីអាហារឈានមុខគេមួយបានថ្លែងថា តម្រូវការផលិតផលចំណីអាហារអាមេរិកកើនឡើងជារៀងរាល់ឆ្នាំ។
លោក ស៊ីមានី និយាយថា៖ «កម្រិតជីវភាពប្រជាជនកម្ពុជាកំពុងតែមានការរីកចម្រើន ហើយបណ្តាអតិថិជនដែលមានជីវភាពធូរធារ ចូលចិត្តម្ហូបអាហារអាមេរិកណាស់។ នេះគឺជាតម្រូវការច្រើនជាងមុនមួយ ដោយសារតែគុណភាព និងរសជាតិ»។
ការិយាល័យកិច្ចការកសិកម្ម អាមេរិកនៅប្រទេសវៀតណាម ស្ថានទូតអាមេរិកនៅកម្ពុជា និង ភាគីពាក់ព័ន្ធនៅកម្ពុជា និងអាមេរិកដទៃទៀតបានចូលរួមនៅក្នុងព្រឹតិ្តការណ៍ដែលនឹងបញ្ចប់នៅថ្ងៃទី ១២ ខែធ្នូ ខាងមុខនេះ៕