ភ្នំពេញៈ ប្រធានសភាពាណិជ្ជកម្មកម្ពុជា (CCC) បានអំពាវនាវឲ្យមានការវិនិយោគកាន់តែច្រើនពីកូរ៉េខាងត្បូងមកកម្ពុជា ជាកិច្ចខិតខំប្រឹងប្រែងមួយក្នុងការបង្កើតទំនាក់ទំនងអាជីវកម្ម និងពាណិជ្ជកម្មដ៏រឹងមាំ ខណៈប្រទេសទាំង ២ កំពុងស្ថិតក្នុងការចរចាលើកិច្ចព្រមព្រៀងពាណិជ្ជកម្មសេរី (FTA)។
លោក គិត ម៉េង ប្រធាន CCC កាលពីថ្ងៃអង្គារមានកិច្ចប្រជុំមួយជាមួយសមាគមពាណិជ្ជកម្មអន្តរជាតិកូរ៉េ (KITA) និងពាណិជ្ជករនៅក្នុងព្រឹត្តិការណ៍ក្រៅជំនួបប្រជុំមួយនៃកិច្ចប្រជុំកំពូលពិភពលោកឆ្នាំ ២០២០ នៅទីក្រុងសេអ៊ូល សាធារណរដ្ឋកូរ៉េជាកន្លែងដែលលោកនាយករដ្ឋមន្ដ្រី ហ៊ុន សែន បានដឹកនាំក្រុមមន្ដ្រីជាន់ខ្ពស់ និងពាណិជ្ជករកម្ពុជានៅទីនោះ។
លោកបានឲ្យដឹងថា CCC និងសមាគមពាណិជ្ជកម្មវិនិយោគកូរ៉េ (KITA) បានរៀបចំរួមគ្នាប្រកបដោយជោគជ័យនូវវេទិកាពាណិជ្ជកម្មរវាងប្រទេសកម្ពុជា និងប្រទេសកូរ៉េនៅទីក្រុងភ្នំពេញដែលបានដឹកនាំដោយមេដឹកនាំទាំង ២ កាលពីឆ្នាំមុន ខណៈដែលកម្ពុជា និងកូរ៉េបានដំណើរការការសិក្សាលទ្ធភាពលើកិច្ចព្រមព្រៀងពាណិជ្ជកម្មសេរី (FTA) កាលពីថ្ងៃទី ២៥ ខែវិច្ឆិកា ឆ្នាំ ២០១៩ ទីក្រុង Busan ប្រទេសកូរ៉េដែលនឹងជួយបង្កើនពាណិជ្ជកម្ម ការវិនិ-គ និងទេសចរណ៍។
លោកថ្លែងថា៖ «ខ្ញុំចង់ជំរុញ KITA លើកកម្ពស់ការវិនិយោគរបស់ប្រទេសកូរ៉េកាន់តែច្រើននៅកម្ពុជា ឬត្រូវពង្រីកការវិនិយោគមកពីបណ្ដាប្រទេសជិតខាង ដូចជា វៀតណាម មកកម្ពុជា»។ លោកបានបន្ថែមថា បច្ចុប្បន្នក្រុមហ៊ុនកូរ៉េជាង ២៥០ បានចូលរួមយ៉ាងសកម្មនៅក្នុងសកម្មភាពពាណិជ្ជកម្មផ្សេងៗ នៅក្នុងប្រទេសកម្ពុជាដែលផ្ដល់ការងារដល់ប្រជាជនកម្ពុជារាប់ពាន់នាក់។
លោក Jong Weon Ha ប្រធានប្រតិបត្តិការនៅផ្សារមូលបត្រកម្ពុជា (CSX) បានប្រាប់ភ្នំពេញប៉ុស្ដិ៍កាលពីថ្ងៃអង្គារថា ដោយមានទំនាក់ទំនងល្អរវាងមេដឹកនាំទាំងពីររវាងប្រជាជន និងប្រជាជនប្រទេសទាំង ២ មានឱកាសច្រើនដើម្បីធ្វើឲ្យរីកចម្រើនទំនាក់ទំនងពាណិជ្ជកម្ម និងការវិនិយោគ។
លោកបានបញ្ជាក់ថា៖ «ខ្ញុំគិតថា ប្រទេសកម្ពុជា និងកូរ៉េមានទំនាក់ទំនងដ៏រឹងមាំជាមួយគ្នាទៅវិញទៅមក។ ប្រទេសកម្ពុជាគួរតែចាប់យកអត្ថប្រយោជន៍នេះដើម្បីលើកកម្ពស់ការវិនិយោគផ្ទាល់បរទេសមកពីប្រទេសកូរ៉េ ដោយសារតែមានក្រុមវិនិយោគិនកូរ៉េជាច្រើនសម្លឹងមើលឱកាសវិនិយោគនៅក្នុងប្រទេសក្រៅ។ ហើយខ្ញុំជឿជាក់ថា FTA នឹងជាឧបករណ៍ដ៏ល្អមួយ ដើម្បីលើកកម្ពស់គំនិតផ្តួចផ្ដើមនេះ»។ លោកបន្ថែមថា វិស័យដែលចាប់អារម្មណ៍បំផុតនៅកម្ពុជា ចំពោះវិនិយោគិនកូរ៉េគឺវិស័យហិរញ្ញវត្ថុ កសិកម្ម និងឧស្សាហកម្មសេវា (ភោជនីយដ្ឋាន)។
នៅក្នុងកិច្ចប្រជុំពាណិជ្ជកម្មរវាងប្រទេសកម្ពុជា និងកូរ៉េដែលត្រូវបានរៀបចំនៅទីក្រុងភ្នំពេញកាលពីខែមីនាឆ្នាំមុន មេដឹកនាំទាំងពីរគឺលោកនាយករដ្ឋមន្ដ្រី ហ៊ុន សែន និងលោកប្រធានាធិបតីកូរ៉េ មូន ជេអ៊ីន បានសន្យាថា នឹងធ្វើការសហការគ្នាដើម្បីបង្កើនពាណិជ្ជកម្ម និងការវិនិយោគរវាងប្រទេសទាំង ២។
លោក មូន បានឲ្យដឹងថាកម្ពុជាជាកន្លែងដែលគួរឲ្យទាក់ទាញសម្រាប់ការវិនិយោគផ្ទាល់បរទេស ដោយសារតែប្រទេសនេះជាទីផ្សារមួយក្នុងចំណោមទីផ្សារសំខាន់ៗបំផុតជាច្រើនសម្រាប់គម្រោងហេដ្ឋារចនាសម្ព័ន្ធនៅអាស៊ីក្នុងរយៈពេល ១០ ឆ្នាំក្រោយ ខណៈក្រុមហ៊ុនកូរ៉េកំពុងបង្កើនការវិនិយោគ និងពាណិជ្ជកម្មរបស់ពួកគេនៅទីនេះ។
លោកនាយករដ្ឋមន្ដ្រី ហ៊ុន សែន នៅក្នុងវេទិកានេះក៏បានធានាដល់ក្រុមវិនិយោគិន និងពាណិជ្ជករកូរ៉េថា ប្រទេសកម្ពុជាមានបរិយាកាសវិនិយោគ និងពាណិជ្ជកម្មល្អខ្លាំងណាស់ ដោយសារតែសន្ដិភាព សន្ដិសុខ និងស្ថិរភាពនយោបាយ និងស្ថិរភាពម៉ាក្រូសេដ្ឋកិច្ចល្អប្រសើរ គណនេយ្យភាព ប្រសិទ្ធភាព និងតម្លាភាព។
ទិន្នន័យបានពីក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា ប្រទេសកូរ៉េខាងត្បូងស្ថិតក្នុងចំណោម FDI ឈានមុខគេបំផុតនៅក្នុងប្រទេសកម្ពុជា។ ចាប់តាំងពីឆ្នាំ ១៩៩៤ ដល់ឆ្នាំ ២០១៨ រដ្ឋាភិបាលកម្ពុជាបានអនុម័តគម្រោងវិនិយោគប្រហែល ២១២ មកពីប្រទេសកូរ៉េខាងត្បូង និងរួមបញ្ចូលគ្នាមានតម្លៃ ៤,៥៦ ពាន់លានដុល្លារ និងពាណិជ្ជកម្មទ្វេភាគីសរុបមានជាង ១ ពាន់លានដុល្លារកាលពីឆ្នាំ ២០១៩។
ចាប់តាំងពីឆ្នាំ ១៩៩៦ ដល់ឆ្នាំ ២០១៨ រដ្ឋាភិបាលកូរ៉េបានវិនិយោគប្រហែល ៦៣២ លានដុល្លារលើកិច្ចសហប្រតិបត្តិការអភិវឌ្ឍន៍នៅក្នុងប្រទេសកម្ពុជា ជាមួយនឹងការចំណាយប្រហែល ៣០០ លានដុល្លារ តាមរយៈជំនួយឥតសំណង។ ចាប់តាំងពីឆ្នាំ ២០១៩ ដល់ឆ្នាំ ២០២៣ ប្រទេស កូរ៉េខាងត្បូង គ្រោងនឹងផ្ដល់ប្រាក់បន្ថែម ២០០ លានដុល្លារផ្សេងទៀត ជាកម្ចីសម្បទានដល់ប្រទេស កម្ពុជា ជាការរួមចំណែកសម្រាប់ការអភិវឌ្ឍប្រទេសនេះ៕LA