ភ្នំពេញៈ សភាពាណិជ្ជកម្មអន្តរជាតិ ៩ បានអំពាវនាវដល់រដ្ឋាភិបាលឱ្យពន្យារពេលវេលាកំណត់សម្រាប់ការប្រកាសពន្ធលើប្រាក់ចំណូលប្រចាំឆ្នាំដែលបច្ចុប្បន្ននេះកំណត់ពេលត្រឹម ថ្ងៃទី ៣១ ខែមីនា ឆ្នាំ ២០២១ សម្រាប់ឆ្នាំសារពើពន្ធ ២០២០ ដោយលើកឡើងពីការរីករាលដាលជំងឺកូវីដ ១៩ ដែលបានបង្កផលប៉ះពាល់ខ្លាំងលើក្រុមហ៊ុនរបស់ពួកគេ។
យោងតាមលិខិតរួម ១ ដែល ភ្នំពេញ ប៉ុស្ដិ៍ ទទួលបានកាលពីថ្ងៃសុក្រផ្ញើជូនលោក គង់ វិបុល អគ្គនាយកនៃអគ្គនាយកដ្ឋានពន្ធដារ (GDT) សភាពាណិជ្ជកម្មអន្តរជាតិទាំង ៩ គឺសភាពាណិជ្ជកម្មអន្តរជាតិកម្ពុជា (IBC) សភាពាណិជ្ជកម្មអាមេរិកនៅកម្ពុជា (AmCham) សភាពាណិជ្ជកម្មអូស្ដ្រាលីនៅកម្ពុជា (AUSCHAM) សភាពាណិជ្ជកម្មចក្រភពអង់គ្លេសនៅកម្ពុជា (Britcham) សភាពាណិជ្ជកម្មអឺរ៉ុបនៅកម្ពុជា (EuroCham) សភាពាណិជ្ជកម្មឥណ្ឌានៅកម្ពុជា សមាគមពាណិជ្ជកម្មជប៉ុននៅកម្ពុជា (JBAC) សភាពាណិជ្ជកម្មម៉ាឡេស៊ីនៅកម្ពុជា (MBCC) និងសភាពាណិជ្ជកម្មហ្វីលីពីននៅកម្ពុជា (PhilCham)។
លិខិតនេះបានឱ្យដឹងថា៖ «សភាពាណិជ្ជកម្មអន្តរជាតិដែលមានចុះហត្ថលេខានៅខាងក្រោមនេះសូមថ្លែងអំណរគុណយ៉ាងជ្រាលជ្រៅចំពោះកិច្ចសហប្រតិបត្តិការរបស់អ្នកជាមួយវិស័យពាណិជ្ជកម្មអន្តរជាតិ និងសូមស្នើឱ្យឯកឧត្តមពិចារណាថា អគ្គនាយកដ្ឋានពន្ធដារពន្យារពេលការកំណត់ពេលវេលាសម្រាប់ការដាក់ជូនពន្ធប្រចាំឆ្នាំលើប្រាក់ចំណូល ដែលបច្ចុប្បន្នកំណត់ត្រឹមថ្ងៃទី ៣១ ខែ មីនា ឆ្នាំ ២០២១ សម្រាប់ឆ្នាំសារពើពន្ធ ២០២០»។
លិខិតនេះបានឱ្យដឹងថា រដ្ឋាភិបាលកម្ពុជាជាថ្មីម្ដងទៀតបានឆ្លើយតបភ្លាមៗ ដោយមានការតាមដានយ៉ាងរហ័សដោយមានផ្ដល់អនុសាសន៍ឱ្យស្នាក់នៅផ្ទះសម្រាប់កម្មកររហូតដល់ ៩០ ភាគរយ និងបានពង្រឹងការពាក់ម៉ាស់ គម្លាតសង្គម និងការកម្រិតការធ្វើដំណើរជាដើម។
លិខិតបន្តថា៖ «ជាមួយនឹងកម្លាំងពលកម្ម ៩០ ភាគរយ ស្នាក់នៅផ្ទះនេះបង្ហាញពីបញ្ហាប្រឈមវិសាមញ្ញចំពោះអ្នកជាប់ពន្ធដើម្បីបំពេញអាករលើប្រាក់ចំណូលតាមការកំណត់ពេលវេលា និងដើម្បីចូលរួមក្នុងកិច្ចប្រជុំផ្ទាល់ ដោយសារតែកាលៈទេសៈហួសពីការគ្រប់គ្រងរបស់អ្នកជាប់ពន្ធ»។
រដ្ឋាភិបាលកម្ពុជាមានកំណត់ត្រាឈានមុខគេនៃការគ្រប់គ្រងការទប់ស្កាត់ការរីករាលដាលជំងឺកូវីដ ១៩ ជាប្រទេសមួយល្អបំផុតលើពិភពលោក ដែលសហគមន៍ពាណិជ្ជកម្មសូមថ្លែងអំណរគុណ និងកោតសរសើរយ៉ាងខ្លាំង។
លិខិតនេះបានបន្តថា៖ «ការរីករាលដាលក្នុងសហគមន៍ ២០ កុម្ភៈ» បានបណ្ដាលឱ្យមានការកើនឡើងការឆ្លងវីរុសនេះទូទាំងប្រទេស និងបង្កឱ្យមានការបារម្ភយ៉ាងខ្លាំងនៅក្នុងចំណោមកម្លាំងពលកម្មទាក់ទងនឹងហានិភ័យការឆ្លង»។
លោក Anthony Galliano ប្រធាន AmCham បានប្រាប់ភ្នំពេញប៉ុស្ដិ៍ថា ចាប់តាំងពីរដ្ឋាភិបាលបានផ្ដល់អនុសាសន៍ឱ្យស្នាក់នៅផ្ទះដោយសារតែ «ឧប្បតិ្តហេតុ ២០ កុម្ភៈ» នៅពេលថ្មីៗ ដែលបានមើលឃើញការកើនឡើងការឆ្លងចំនួនច្រើន។ ជាលទ្ធផលផ្នត់គំនិតរបស់ប្រជាជនបានផ្លាស់ប្តូរយ៉ាងខ្លាំង ជាទូទៅគោលបំណងសំខាន់ជាងគេគឺការប្រុងប្រយ័ត្នកាន់តែច្រើន និងការរក្សាសុវត្ថិភាព។ ផលិតភាពកម្លាំងពលកម្មបានធ្លាក់ចុះ ហើយក្រុមហ៊ុនកំពុងប្រតិបត្តិការក្នុងសមត្ថភាពមួយផ្នែកប៉ុណ្ណោះ។
លោកថ្លែងថា៖ «សភាពាណិជ្ជកម្មទាំងនេះកំពុងស្នើសុំឱ្យមានការពន្យារពេលសម្រាប់ការដាក់ជូនការប្រកាសពន្ធលើប្រាក់ចំណូលប្រចាំឆ្នាំ កំណត់ពេលវេលានៅថ្ងៃទី ៣១ ខែមីនាដោយសារតែកត្តាទាំងនេះ ខណៈដែលក្រុមហ៊ុនជាច្រើន បច្ចុប្បន្នកំពុងស្ថិតក្រោមការគ្រប់គ្រងដោយភាពតានតឹងលើកម្លាំងពលកម្មរបស់ពួកគេពីចម្ងាយ ហើយធនធានមិនមានភាពខ្លាំងពេញលេញនោះទេ»។
យោងតាមលោក Anthony ពន្ធលើប្រាក់ចំណូលនៅក្នុងការដាក់ជូនដែលមាន ២០ ទំព័រ ដើម្បីគណនាពន្ធប្រាក់ចំណេញប្រចាំឆ្នាំ ដែលជាទូទៅ ២០ ភាគរយ និងដើម្បីបង់ពន្ធបែបនោះ។ ការដាក់ស្នើនេះ រួមមានតារាងតុល្យភាព ប្រាក់ចំណេញ និងការខាតបង់លើមូលដ្ឋានគណនេយ្យ ប្រាក់ចំណេញ និងការខាតបង់លើមូលដ្ឋានពន្ធ ឯកសារចំណូល ឯកសារការចំណាយលើការបង់រំលស់ជាមួយនឹងបញ្ជីទ្រព្យសកម្ម និងឯកសារសម្រាប់ប្រតិបត្តិការភាគីពាក់ព័ន្ធ។ ក្រុមហ៊ុនត្រូវតម្រូវឱ្យបង់ពន្ធលើប្រាក់ចំណេញប្រចាំឆ្នាំដល់រាជរដ្ឋាភិបាលដែលជាប្រភពមួយនៃប្រាក់ចំណូលពន្ធ និងទម្រង់ផ្ទាល់ខ្លួនគឺជាឯកសារដ៏សំខាន់ក្នុងការធ្វើសវនកម្ម។
លោក Tan KheeMeng អនុប្រធានសភាពាណិជ្ជកម្មម៉ាឡេស៊ីនៅកម្ពុជា (MBCC) ប្រាប់ ភ្នំពេញ ប៉ុស្ដិ៍ថា ព្រឹត្តិការណ៍ ២០ កុម្ភៈបានបណ្ដាលឱ្យការងារជាច្រើនមានភាពយឺតយ៉ាវ ដោយសារតែការកម្រិតលើការបិទគណនេយ្យចុងឆ្នាំ និងការអនុវត្តការធ្វើសវនកម្មហិរញ្ញវត្ថុត្រឹមត្រូវដោយក្រុមហ៊ុនសវនកម្មខាងក្រៅ។
លោកថ្លែងថា៖ «GDT គួរពិចារណា និងផ្ដល់ឱកាសដកដង្ហើមខ្លះ ដល់អ្នកជាប់ពន្ធ និងគណនេយ្យ និងអ្នកជំនាញពន្ធដែលនឹងជួយកាត់បន្ថយលទ្ធភាពការរីករាលដាលជំងឺកូវីដ-១៩ ក្នុងអំឡុងពេលដ៏លំបាកនេះ»។
យោងតាមលិខិតរួមនេះសភាពាណិជ្ជកម្មអន្តរជាតិក៏បានស្នើសុំទៅ GDT ឱ្យមានការពន្យារពេលបណ្ដោះអាសន្នក្នុងកិច្ចប្រជុំផ្ទាល់ ជាពិសេសសម្រាប់ការទៅជួបអ្នកជាប់ពន្ធថ្មីដោយផ្ទាល់សម្រាប់ការចុះបញ្ជីពន្ធ និងសម្រាប់អ្នកជាប់ពន្ធបច្ចុប្បន្នកំពុងធ្វើសវនកម្ម។
ពួកគេអាចធ្វើការផ្លាស់ប្តូរព័ត៌មានរវាងអ្នកជាប់ពន្ធ ឬតំណាងរបស់ពួកគេ និងអគ្គនាយកដ្ឋានពន្ធដារតាមរយៈកម្មវិធីផ្ញើសារ Telegram ឬ WhatsApp ហើយបើអាចធ្វើបានរៀបចំកិច្ចប្រជុំសវនកម្មសំខាន់ៗតាមរយៈកម្មវិធីទំនាក់ទំនងពាណិជ្ជកម្ម ដូចជាកម្មវិធី Zoom ឬ Microsoft Teams៕ LA