ក្រុងឡុងដ៍ៈ បន្ទាប់ពីពិភាក្សាដេញដោលដ៏ជូរចត់អស់រយៈពេលជាច្រើនឆ្នាំរួចមកនៅទីបំផុតសមាជិកសភារបស់ចក្រភពអង់គ្លេសកាលពីថ្ងៃពុធបានអនុម័តលក្ខខណ្ឌនៃការចាកចេញជាប្រវត្តិសាស្ត្ររបស់ប្រទេសរបស់ពួកគេពីសហភាពអឺរ៉ុប (Brexit)។
សមាជិកសភានៅសភាជាន់ទាបបានគាំទ្ររួចហើយដល់ច្បាប់ស្តីពីកិច្ចព្រមព្រៀងចាកចេញពីសហភាពអឺរ៉ុបដែលផ្តល់សច្ចាប័នដល់កិច្ចព្រមព្រៀងដែលលោកនាយករដ្ឋមន្ត្រី Boris Johnson សម្រេចបានជាមួយទីក្រុងប្រ៊ុចសែលនៅឆ្នាំមុន។
ប៉ុន្តែសភាជាន់ខ្ពស់បានធ្វើការផ្លាស់ប្តូរតិចតួចនៅសប្តាហ៍នេះ រួមទាំងសិទ្ធិរបស់ពលរដ្ឋសហភាពអឺរ៉ុប និងជនភៀសខ្លួនកុមារបន្ទាប់ពីចាកចេញពីសហភាពអឺរ៉ុប។
ក្នុងការបោះឆ្នោតជាស៊េរីនៅថ្ងៃពុធ សភាជាន់ទាបជាទីដែលគណបក្សអភិរក្សនិយមរបស់លោក Johnson មានសំឡេងភាគច្រើនបានច្រានចោលការធ្វើវិសោធនកម្មទាំង ៥ និងបានបញ្ជូនច្បាប់នេះត្រឡប់ទៅសភាជាន់ខ្ពស់វិញ ដែលនៅពេលនោះបានយល់ព្រមទាំងស្ទាក់ស្ទើរក្នុងការដកចេញវិសោធនកម្មទាំងនេះ។
ឧបសគ្គតែមួយគត់ដែលនៅសល់ដើម្បីធ្វើឲ្យការផ្តល់សច្ចាប័នមានភាពផ្លូវការគឺការអនុម័តដោយព្រះមហាក្សត្រិយានី Elizabeth II ដែលត្រួសត្រាយផ្លូវសម្រាប់ចក្រភពអង់គ្លេសចាកចេញពីសហភាពអឺរ៉ុបនៅថ្ងៃទី ៣១ ខែមករា។
សភាអឺរ៉ុបនៅតែត្រូវគាំទ្រកិច្ចព្រមព្រៀងនេះក្នុងការបោះឆ្នោតមួយនៅសប្តាហ៍ក្រោយ ប៉ុន្តែការអនុម័តរបស់សភាអង់គ្លេសនៅទីក្រុងឡុងដ៍ គឺជាព្រឹត្តិការណ៍ប្រវត្តិសាស្ត្រមួយ ខណៈប្រទេសនេះខិតកាន់តែឆ្ពោះទៅរកការក្លាយជាប្រទេសទី ១ ដែលចាកចេញពីសហភាពអឺរ៉ុប៕ KC