ភ្នំពេញៈ សមាគមក្រុមហ៊ុនផលិតវាយនភណ្ឌ និងសម្លៀកបំពាក់នៅអាស៊ីចំនួន ៩ រួមទាំងសមាគមរោងចក្រកាត់ដេរនៅកម្ពុជា (GMAC) បានអំពាវនាវឱ្យមានការអនុវត្តការបញ្ជាទិញកាន់តែប្រសើរក្នុងឧស្សាហកម្មវាយនភណ្ឌ និងសម្លៀកបំពាក់ដែលកំពុងទទួលរងផលប៉ះពាល់យ៉ាងខ្លាំងដោយការរីករាលដាលជំងឺកូវីដ ១៩ លើផលិតកម្ម និងចង្វាក់ផ្គត់ផ្គង់។
សមាគម ៩ ដែលតំណាង STAR Network ជាបណ្ដាញអន្តរអាស៊ីលើកដំបូងនៃសមាគមក្រុមហ៊ុនក្នុងឧស្សាហកម្មវាយនភណ្ឌ និងសម្លៀកបំពាក់បានជួបជុំគ្នាកាលពីថ្ងៃអង្គារទី ១២ ខែ មករា ឆ្នាំ ២០២១ ដើម្បីចាប់ផ្ដើមគំនិតផ្តួចផ្ដើមថ្មីមួយ។ នេះបើតាមសេចក្ដីប្រកាសព័ត៌មានចេញផ្សាយកាលពីថ្ងៃទី ១៨ ខែមករា។
ទិដ្ឋភាពជាពិសេសអំពីគំនិតផ្តួចផ្ដើមនេះនឹងលើកជាសំណួរជុំវិញការអនុវត្តការបញ្ជាទិញ ដូចជាលក្ខខណ្ឌទូទាត់ និងការដឹកជញ្ជូន តាមទស្សនៈរបស់ក្រុមហ៊ុនផលិត និងសមាគមដែលតំណាងឱ្យពួកគេដែលធ្វើឱ្យវាក្លាយជាគំនិតផ្តួចផ្ដើមពីក្រោមទៅលើពិតប្រាកដ។ ស្ថាប័នជាសមាជិកទាំង ៩ រួមមាន GMAC, BGMEA, BKMEA, CNTAC, PTMA, PHMA, TMA, MGMA និង VITAS។
លោក Miran Ali អ្នកនាំពាក្យ STAR Network បានបញ្ជាក់ថា៖ «យើងចង់រួមគ្នាជាសមាគម និងក្រុមហ៊ុនផលិតនៅអាស៊ី ដើម្បីឯកភាពគ្នាលើតួនាទីទូទៅទាក់ទងលក្ខខណ្ឌទូទាត់ និងការដឹកជញ្ជូន ដើម្បីយើងមានសំឡេងកាន់តែខ្លាំងក្នុងការពិភាក្សាលក្ខណៈបុគ្គល និងសមូហភាពជាមួយយីហោ និងអ្នកបញ្ជាទិញដោយកែលម្អការអនុវត្តការទិញ»។
លោកលើកឡើងថា៖ «តួនាទីរួមនេះនឹងមានឥទ្ធិពល» ដែលប៉ាន់ប្រមាណថា Network នេះតំណាងឱ្យជាង ៦០ ភាគរយ នៃការនាំចេញសម្លៀកបំពាក់លើពិភពលោកទាំងអស់។
លោក ខេន លូ អគ្គលេខាធិការ GMAC បានពន្យល់ថា លក្ខខណ្ឌទូទាត់នៅក្នុងឧស្សាហកម្មកាត់ដេរខុសគ្នាខ្លាំងពីឧស្សាហកម្មផ្សេងទៀត។ លក្ខខណ្ឌឥណទានរយៈពេលវែងដែលមិនគួរឱ្យជឿ ជាបញ្ហាមួយ និងលក្ខខណ្ឌនានាជាមួយនឹងភាពលម្អៀងមិនល្អក្នុងការគាំទ្ររបស់អ្នកទិញ គឺជាបញ្ហាមួយផ្សេងទៀតដែលបង្កបញ្ហាទាំងលំហូរសាច់ប្រាក់ និងហានិភ័យហិរញ្ញវត្ថុលើក្រុមហ៊ុនផលិត។
លោកបន្តថា ដោយគាំទ្រដោយលិខិតធានាឥណទាន (LC) ឬកិច្ចសន្យាលក់ លក្ខខណ្ឌឥណទានដែលក្រុមហ៊ុនផលិតត្រូវតែផ្ដល់ ឬត្រូវបានបង្ខំឱ្យផ្ដល់ដល់អ្នកបញ្ជាទិញមានរយៈពេលពី ៣០ ទៅ ១៥០ ថ្ងៃបន្ទាប់ពីដឹកជញ្ជូន។
លោកបន្តថា យោងតាមការស្ទង់មតិពេលថ្មីៗនេះដោយ GMAC ក្នុងចំណោមសមាជិករបស់ខ្លួន អ្នកឆ្លើយសំណួរ ៤០ ភាគរយបានឱ្យដឹងថា អ្នកបញ្ជាទិញកំពុងស្នើឱ្យមានលក្ខខណ្ឌឥណទានរយៈពេលកាន់តែវែង ក្នុងអំឡុងពេលវិបត្តិកូវីដ ១៩។ ដោយមានចំនួនស្មើគ្នាដែរ អ្នកឆ្លើយសំណួរជាង ៤០ ភាគរយ ឱ្យដឹងថា អ្នកបញ្ជាទិញរបស់ពួកគេក៏ផ្ដល់តម្លៃកាន់តែទាបដើម្បីរក្សាបានការបញ្ជាទិញ។
លោកថ្លែងថា៖ «យើងទទួលស្គាល់ថា ភាគីនីមួយៗមានការពិបាកផ្ទាល់ខ្លួន ប៉ុន្តែអ្នកបញ្ជាទិញ ពិតណាស់ស្ថិតក្នុងស្ថានភាពហិរញ្ញវត្ថុកាន់តែប្រសើរ មិនដូចក្រុមហ៊ុនផលិតដែលហិរញ្ញវត្ថុខ្សោយបំផុត និងត្រូវដោះស្រាយដោយផ្ទាល់ជាមួយនឹងប្រាក់ឈ្នួលរបស់កម្មករពួកគេ។ មិនអាចមានការពន្យារពេលការទូទាត់ប្រាក់ឈ្នួលក្រុមកម្មករនោះទេ បើមិនអ៊ីចឹងទេ រោងចក្រនឹងមានការធ្វើកូដកម្មដែលនាំឱ្យខូចខាតមិនខាន»។
លោក អាត់ ធន់ ប្រធានសហភាពការងារកម្ពុជា (CLC) ឱ្យដឹងថា ការអនុវត្តការទូទាត់ប្រាក់កាន់តែប្រសើរអាចជួយធ្វើឱ្យប្រសើរឡើងនូវស្ថានភាពនៃឧស្សាហកម្មដែលត្រូវបានប៉ះពាល់ដោយកូវីដ ១៩។
លោកថ្លែងថា៖ «ខ្ញុំយល់ស្របនឹងការអំពាវនាវរបស់សមាគមឱ្យអនុវត្តនការទូទាត់ប្រាក់ឱ្យបានល្អជាមួយអ្នកបញ្ជាទិញ ឬម្ចាស់ប្រ៊េនដ៍ ព្រោះពួកគេជាអ្នកផ្គត់ផ្គង់នៅទីនេះក៏ត្រូវការប្រាក់សម្រាប់កម្មករដែរ។ ទោះយ៉ាងណាខ្ញុំក៏លើកទឹកចិត្តអ្នកផ្គត់ផ្គង់គួរតែមានដើមទុនបង្វិលនៅពេលដែលមានការទូទាត់យឺតពីអ្នកទិញ»។
STAR Network បានចង្អុលបង្ហាញថា សមាគមទាំង ៩ នឹងធ្វើការងារជាក្រុមការងារចំនួន ៥ ដែលកំណត់។
យោងតាមលោក ខេន លូ រយៈពេល ១០ ខែ ឆ្នាំ ២០២០ ការនាំចេញសម្លៀកបំពាក់ ស្បែកជើង និងផលិតផលធ្វើដំណើររបស់កម្ពុជាធ្លាក់ចុះ ១០ ភាគរយ ធៀបរយៈពេលដូចគ្នាកាលពីឆ្នាំ ២០១៩៕LA