.jpg)
ស្វាយ គឺជាផ្លែឈើកម្ពុជាទី ១ ដែលត្រូវបានអនុញ្ញាតឲ្យនាំទៅប្រទេសកូរ៉េខាងត្បូងជាផ្លូវការ។ សហការី
ភ្នំពេញៈ សមាគមធុរកិច្ចនៃប្រទេសកម្ពុជាបានសម្តែងនូវសុទិដ្ឋិនិយមចំពោះទីផ្សារកូរ៉េខាងត្បូងនៅក្នុងការស្រូបយកផលិតផលកម្ពុជាកាន់តែច្រើនទៀត ខណៈមន្ត្រីកម្ពុជា និងកូរ៉េខាងត្បូងនឹងចាប់ផ្តើមចរចាកិច្ចព្រមព្រៀងពាណិជ្ជកម្មសេរី (FTA) ជាលើកដំបូងនៅក្នុងខែក្រោយនេះ។
កម្ពុជា និងសាធារណរដ្ឋកូរ៉េបានផ្តួចផ្តើមឲ្យមានការចរចាពាណិជ្ជកម្មសេរីនៅខែវិច្ឆិកាឆ្នាំមុនដោយប្រមុខរដ្ឋាភិបាលនៃប្រទេសទាំង ២ បន្ទាប់មកក្រុមការងារនៃប្រទេសទាំង ២ បានសិក្សារួមគ្នាពីលទ្ធភាពនៃការបង្កើត FTA។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាប្រាប់ភ្នំពេញប៉ុស្តិ៍កាលពីថ្ងៃអង្គារថា ទោះជាប្រទេសកម្ពុជាពុំទាន់មានការនាំចេញអង្ករទៅកាន់ទីផ្សារប្រទេសកូរ៉េ ប៉ុន្តែការចាប់ផ្តើមចរចាកិច្ចព្រមព្រៀងពាណិជ្ជកម្មសេរីនេះនឹងជួយត្រួសត្រាយផ្លូវសម្រាប់ជាទីផ្សារថ្មីរបស់វិស័យស្រូវអង្ករកម្ពុជានៅពេលអនាគត។
លោកថ្លែងថា៖ «ខ្ញុំគិតថា អង្ករយើងនឹងមានទីផ្សារថ្មីទៀត បើសិនភាគីទាំង ២ បើកឲ្យ FTA ឬក៏ភាគីកូរ៉េផ្តល់ត្រឹមជាកូតា ពិសេសសម្រាប់ការនាំអង្កររបស់កម្ពុជាក្នុងបរិមាណ ៣ ទៅ ៥ ម៉ឺនតោនក៏ដោយព្រោះទីផ្សារកូរ៉េធំ បើទោះជាពលរដ្ឋកូរ៉េមិនហូបអង្ករ យើងក៏មានពលករខ្មែរយើងប្រមាណ ៥-៦ ម៉ឺននាក់ នឹងប្រើប្រាស់ផលិតផលរបស់យើង»។
លោក លឹម ហេង អនុប្រធានសភាពាណិជ្ជកម្មកម្ពុជាបាននិយាយថា ការចាប់ផ្តើមចរចាកិច្ចព្រមព្រៀងពាណិជ្ជកម្មសេរីរវាងភាគីទាំង ២ នេះគឺជាការខិតខំប្រឹងប្រែងរបស់រដ្ឋាភិបាលក្នុងការជំរុញកំណើនសេដ្ឋកិច្ចរបស់កម្ពុជា។ លោកបន្តថា៖ «ការចាប់ផ្តើមនេះជាសញ្ញាល្អ បើយើងទទួលបានកិច្ចព្រមព្រៀងពាណិជ្ជកម្មសេរីជាមួយកូរ៉េ យើងនឹងទាក់ទាញវិនិយោគិនកូរ៉េកាន់តែច្រើនមកបង្កើតរោងចក្រនៅកម្ពុជា ផលិតទំនិញសម្រាប់នាំចេញ»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ថា ភាគីទាំង ២ បានបញ្ចប់ការសិក្សារួមគ្នា និងឯកភាពគ្នា ព្រមទាំងបំពេញនីតិវិធីផ្ទៃក្នុងដើម្បីចាប់ផ្ដើមបើកការចរចាកិច្ចព្រមព្រៀងពាណិជ្ជកម្មទ្វេភាគីនៅខែកក្កដាខាងមុខ។ លោកបន្តថា ដោយសារការរីករាលដាលជំងឺកូវីដ១៩ ការចរចានេះនឹងធ្វើឡើងតាមរយៈ Video Conference។
បើតាមការអះអាងរបស់អ្នកនាំពាក្យកម្ពុជាមានសក្តានុពលនាំចេញផលិតផលសម្លៀកបំពាក់ ស្បែកជើង ផលិតផលធ្វើពីស្បែក និងផលិតផលកសិកម្ម ទៅកាន់ទីផ្សារកូរ៉េ ខណៈកូរ៉េនឹងនាំចូលមកកម្ពុជានូវផលិតផលគ្រឿងចក្រ កុំព្យូទ័រ និង បច្ចេកវិទ្យា ជាដើម។ លើសពីនេះ FTA ក៏នឹងជំរុញឲ្យមានការវិនិយោគបន្ថែមនៅទីផ្សារនៃប្រទេសទាំង២។
លោកបានថ្លែងថា៖ «តាមការសិក្សាយើងឃើញថាមានផលប្រយោជន៍ឲ្យគ្នាទៅវិញទៅមក យើងមានសក្តានុពលសេដ្ឋកិច្ចរៀងៗខ្លួន ប្រសិនបើយើងធ្វើកិច្ចព្រមព្រៀងពាណិជ្ជកម្មសេរីជាមួយគ្នា ភាពខ្លាំងនៃប្រទេសនីមួយៗនឹងក្លាយទៅជាកម្លាំងចលករមួយជួយជំរុញកំណើនសេដ្ឋកិច្ចគ្នាទៅវិញទៅមក»។
បើយោងតាមក្រសួងពាណិជ្ជកម្ម បច្ចុប្បន្នមានក្រុមការងាររៀបចំគោលនយោបាយ និងយុទ្ធសាស្ត្រចរចាបង្កើតកិច្ចព្រមព្រៀងពាណិជ្ជកម្មសេរី ចំនួន ៨ ដែលត្រូវបានរៀបចំឡើងដោយទទួលខុសត្រូវលើការសិក្សា និងចរចាឈានទៅបង្កើតកិច្ចព្រមព្រៀងពាណិជ្ជកម្មសេរី។
ប្រទេសចិន គឺជាដៃគូទី ១ ដែលកម្ពុជាកំពុងធ្វើការចរចាកិច្ចព្រមព្រៀងស្តីពីពាណិជ្ជកម្មសេរីជាមួយ ដោយពេលនេះបានបញ្ចប់ការចរចាជុំទី ៣ រួចហើយ ហើយរំពឹងថា កិច្ចព្រមព្រៀងនេះនឹងបញ្ចប់នៅចុងឆ្នាំ ២០២០ នេះ។
ចំណែកក្រុមការងារ ២ ទៀតកំពុងស្ថិតនៅក្នុងដំណាក់កាលពិនិត្យលទ្ធភាពបង្កើតកិច្ចព្រមព្រៀងពាណិជ្ជកម្មកម្ពុជា-សហភាពសេដ្ឋកិច្ចអឺរ៉ាស៊ី (បេឡារុស កាហ្សាក់ស្ថាន អាមេនី រុស្ស៊ី និងកៀហ្ស៊ីស៊ីស្ថាន)។ ដោយឡែកប្រទេសចំនួន ៥ ទៀតរួមមាន ចក្រភពអង់គ្លេស អាមេរិក ជប៉ុន ម៉ុងហ្គោលី និងឥណ្ឌា រហូតមកដល់ពេលនេះនៅមិនទាន់បានចាប់ផ្តើមទេ។
លោកនាយករដ្ឋមន្ដ្រី ហ៊ុន សែន បានថ្លែងនៅក្នុងដំណើរទស្សនកិច្ចទៅប្រទេសកូរ៉េខាងត្បូងកាលពីឆ្នាំមុនថា ពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងសម្រេចបានជាង ១ ពាន់លានដុល្លារកាលពីឆ្នាំ ២០១៩ កើនឡើងជាង ៣៦ ភាគរយធៀបនឹង ៧៥៦ លានដុល្លារកាលពីឆ្នាំ ២០១៨។ កម្ពុជាបាននាំចេញ ៣៣៥ លានដុល្លារទៅកូរ៉េ ខណៈនាំចូលមកវិញ ៦៩៦ លានដុល្លារក្នុងអំឡុងពេលនេះ។
កម្ពុជានាំចេញទៅប្រទេសកូរ៉េខាងត្បូងភាគច្រើនរួមមានសម្លៀកបំពាក់ ស្បែកជើង ផលិតផលទំនិញធ្វើដំណើរ ភេសជ្ជៈ ឧបករណ៍អេឡិចត្រូនិក កៅស៊ូ វេជ្ជសាស្ដ្រ និងផលិតផលកសិកម្ម ខណៈនាំចូលមកវិញនូវរថយន្ត ភេសជ្ជៈ ឧបករណ៍អេឡិចត្រូនិក ឧបករណ៍ប្រើប្រាស់ក្នុងគេហដ្ឋាន វេជ្ជសាស្ដ្រ និងផលិតផលប្លាស្ទិក៕ LA
