.jpg)
ទេសចរបរទេស ដែលមកទស្សនាប្រាសាទអង្គរវត្តនាពេលកន្លងមក។ ហេង ជីវ័ន
ភ្នំពេញៈ សមាគមមគ្គុទេសក៍អង្គរកម្ពុជាបានឲ្យដឹងថា សេវា Zero-Dollar Tour មិនមែនជាមូលហេតុចម្បងដែលធ្វើឲ្យភ្ញៀវទេសចរបរទេសធ្លាក់ចុះនៅក្នុងខេត្តសៀមរាបនោះទេ ខណៈសេវាបែបនេះភាគច្រើនសម្រាប់តែភ្ញៀវទេសចរចិន។
ការអះអាងបែបនេះធ្វើឡើងបន្ទាប់ពី រដ្ឋមន្ត្រីក្រសួងទេសចរណ៍ថ្មីៗនេះព្រមានបិទក្រុមហ៊ុនផ្តល់សេវាកម្ម Zero-Dollar Tour ដោយចាត់ទុកថាសេវានេះ ធ្វើឲ្យប៉ះពាល់វិស័យទេសចរណ៍កម្ពុជា។
លោក ខៀវ ធី ប្រធានសមាគមមគ្គុទេសក៍អង្គរកម្ពុជា បានថ្លែងនៅក្នុងកម្មវិធីសម្ពោធប្រព័ន្ធបញ្ជាក់Guide Direk កាលពីថ្ងៃសុក្រថា បញ្ហាអាកាសធាតុ សណ្ដាប់ធ្នាប់ក្នុងក្រុងសៀមរាប ការដំឡើងថ្លៃសំបុត្រចូលអង្គរ និងនយោបាយថ្នាក់ថ្នមចិនជាមូលហេតុធ្វើឲ្យចំនួនទេសចរបរទេសថយចុះ។
លោកថ្លែងថា៖ «ខ្ញុំគិតថា Zero-Dollar Tour ជាទូទៅគេធ្វើតែចំពោះ ភ្ញៀវទេសចរចិន យើងគិតថា ភ្ញៀវចិនគាត់មកកម្ពុជាមានចំនួនថេរ [ឬកើនឡើង] ប៉ុន្តែភ្ញៀវថយចុះជប៉ុន កូរ៉េ អាមេរិកាំង អឺរ៉ុប ដែលពួកគេអត់ប្រើសេវាZero-Dollar Tour ទេ»។ លោកបន្តទៀតថា៖ «ខ្ញុំយល់ថា China ready ដែលជានយោបាយថ្នាក់ថ្នមភ្ញៀវចិនជាកត្តាមួយនំាឲ្យជនជាតិដទៃទៀតច្រណែន ដូចជាមិនសប្បាយចិត្ត គួរតែថ្នាក់ថ្នមទាំងអស់ជនជាតិណាក៏ដោយ»។
កាលពីថ្មីនេះ លោក ថោង ខុន រដ្ឋមន្ត្រីក្រសួងទេសចរណ៍ ថ្លែងថា Zero-Dollar Tour កំពុងក្លាយជាចំណែកមួយដែលធ្វើឲ្យចំនួនភ្ញៀវទេសចរបរទេស មកទស្សនាខេត្តសៀមរាបធ្លាក់ចុះ។ ក្រុមហ៊ុនដែលលក់កញ្ចប់ប្រភេទ Zero-Dollar Tour ជាអ្នកបំផ្លាញគោលដៅទេសចរណ៍នៅខេត្តសៀមរាប។
ក្នុងឆមាសទី១ ឆ្នាំ ២០១៩ ភ្ញៀវទេសចរបរទេស ដែលទិញសំបុត្រចូលទស្សនារមណីយដ្ឋានអង្គរមានចំនួន ១,២៤ លាននាក់ បានធ្លាក់ចុះជាង ៨ ភាគរយ បើធៀបនឹងរយៈពេលដូចគ្នាពីឆ្នាំ ២០១៨ ខណៈចំណូលពីការលក់សំបុត្រធ្លាក់ចុះប្រហែល ៩ ភាគរយ មកនៅ ៥៥ លានដុល្លារ។
លោក ខៀវ ធី បានឲ្យដឹងថា សេវាមគ្គុទេសក៍បានថយចុះយ៉ាងខ្លាំង បើធៀបទៅនឹងរយៈពេលដូចគ្នាកាលពីឆ្នាំមុន។ លោកថ្លែងថា៖ «និយាយតាមត្រង់់ទីផ្សារមគ្គុទេសក៍ក៏ធ្លាក់ចុះដែរ ដោយសារចំនួនភ្ញៀវទេសចរបរទេសធ្លាក់ចុះ ឆ្នាំនេះចុះមែនទែន»។ លោកបន្តថា មគ្គុទេសក៍ទេសចរមួយចំនួនអត់ការងារធ្វើ ៤-៥ ខែហើយ។
កញ្ញា តាន់ លម្អង អ្នកគ្រប់គ្រងទីផ្សារនៃសណ្ឋាគារលំដាប់ផ្កាយ ៥ Angkor Howard Hotel នៅខេត្តសៀមរាប បានឲ្យដឹងថា ភ្ញៀវទេសចរបរទេសបានធ្លាក់ចុះយ៉ាងគំហុកចាប់តាំងពីក្រោយចូលឆ្នាំចិន។ កញ្ញាបន្តថា កាលឆ្នាំមុនសណ្ឋាគារនេះ ទទួលភ្ញៀវស្នាក់នៅពេញទំាងជាង ២០០ បន្ទប់ តែឆ្នាំនេះ មានភ្ញៀវស្នាក់នៅមិនដល់ ៥០ បន្ទប់ផងក្នុង ១ ថ្ងៃ។
កញ្ញាបន្តថា បើតាមការត្អូញត្អែររបស់ភ្ញៀវថា មូលហេតុមិនចង់មកលេងកម្ពុជា កង្វះជើងហោះហើរត្រង់ មិនដូចប្រទេស វៀតណាម និងថៃ។ កញ្ញាបានបន្តថា៖ «បើតាមភ្ញៀវនិយាយថា ខាងយើងអត់មានជើងហោះហើរត្រង់ដូចវៀតណាម ថៃ មួយទៀតការវាយវីសាតាមព្រំដែនមានការពិបាកដល់ពួកគាត់ច្រើនដោយមានការទាមទារលុយក្រៅ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ក៏ធ្លាប់បានប្រាប់ភ្នំពេញ ប៉ុស្តិ៍ថា Zero-Dollar Tour កើតមាននៅកម្ពុជាជាង ១០ ឆ្នាំ មកហើយ ហើយវាក៏បានជួយទាក់ទាញភ្ញៀវទេសចរបរទេស៕LA
