ភ្នំពេញៈ តំណាងសមាគមផលិតផលសម្លៀកបំពាក់ ស្បែកជើង និងទំនិញធ្វើដំណើរ ព្រមទាំងតំណាងសភាពាណិជ្ជកម្មអឺរ៉ុប (EU) ប្រចាំនៅកម្ពុជាបានស្នើសុំឲ្យគណៈកម្មការអឺរ៉ុប (EC) ផ្អាកក្នុងរយៈពេល ១២ ខែលើការដកការអនុគ្រោះពន្ធអ្វីៗគ្រប់យ៉ាងលើកលែងតែអាវុធ (EBA) ពីកម្ពុជា ព្រោះឧស្សាហកម្មនេះកំពុងទទួលរងផលប៉ះពាល់យ៉ាងខ្លាំងដោយសារការរីករាលដាលជំងឺកូវីដ១៩ ដែលធ្វើឲ្យការផលិត និងតម្រូវការលើពិភពលោកធ្លាក់ចុះ។
យោងតាមសេចក្ដីប្រកាសព័ត៌មានរួមគ្នារវាងសមាគមរោងចក្រកាត់ដេរនៅកម្ពុជា (GMAC) សមាគមស្បែកជើងកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា (Eurocham) បានដាក់លិខិតមួយច្បាប់ទៅ EC កាលពីថ្ងៃទី ២ ខែមិថុនា ដោយលើកហេតុផលថា ការរីករាលដាលជំងឺកូវីដ ១៩ បានប៉ះពាល់យ៉ាងខ្លាំងលើក្រុមហ៊ុនផលិត និងកម្មករសម្លៀកបំពាក់ ស្បែកជើង និងទំនិញធ្វើដំណើរ។
លិខិតនេះបានឲ្យដឹងថា រោងចក្រកាត់ដេរសម្លៀកបំពាក់ ស្បែកជើង និងទំនិញធ្វើដំណើរនៅកម្ពុជា ប្រហែល ២៥០ ត្រូវបានផ្អាកប្រតិបត្តិការស្ទើរទាំងស្រុង ហើយកម្មករជាង ១៣០ ០០០ នាក់ ក្នុងវិស័យនេះភាគច្រើនជាស្ដ្រីបានបាត់បង់ការងារហើយចំនួននេះទំនងជានឹងបន្តកើនឡើងច្រើនបន្ថែមទៀត។
លិខិតនេះបន្តថា នៅក្នុងត្រីមាសទី ១ ឆ្នាំ ២០២០ ចំនួនអ្នកបញ្ជាទិញបានលុបចោលការបញ្ជាទិញ បន្ទាប់ពីការបញ្ជាទិញទាំងនេះត្រូវបានបញ្ចប់ ឬខណៈដែលការបញ្ជាទិញទាំងនេះកំពុងស្ថិតនៅក្នុងដំណើរការផលិត។ គេប៉ាន់ប្រមាណថា ការលក់សម្លៀកបំពាក់ ស្បែកជើង និងទំនិញធ្វើដំណើរនៅត្រីមាសទី ២ ឆ្នាំ ២០២០ ទំនងជានឹងធ្លាក់ចុះពី ៥០ ទៅ ៦០ ភាគរយធៀបនឹងឆ្នាំ ២០១៩។
លិខិតនេះបន្តថា៖ «សមាគមដែលចុះហត្ថលេខាលើលិខិតនេះស្នើសុំឲ្យគណៈកម្មការអឺរ៉ុបឲ្យផ្អាកការដកអត្ថប្រយោជន៍ EBA ក្នុងរយៈពេលយ៉ាងហោចណាស់ ១២ ខែ (រហូតដល់ខែសីហា ឆ្នាំ ២០២១) ដើម្បីអាចឲ្យវិស័យនេះស្ទុះងើបឡើងវិញពីការខូចខាតដោយសារតែការរីករាលដាលជំងឺកូវីដ ១៩»។
លោក វ៉ាន់ ស៊ូអៀង ប្រធាន GMAC បានឲ្យដឹងថា ក្នុងបរិការណ៍នេះការអនុវត្តតាមសេចក្ដីសម្រេចចិត្តរបស់គណៈកម្មការអឺរ៉ុបនៅថ្ងៃទី ១២ ខែសីហាខាងមុខក្នុងការដក EBA ដោយក្នុងនោះនឹងដក ២០ ភាគរយ នៃការនាំចូលសម្លៀកបំពាក់ ៣០ ភាគរយ ពីការនាំចូលស្បែកជើង និងទំនិញធ្វើដំណើរទាំងអស់ដែលនាំចូលពីប្រទេសកម្ពុជានឹងក្លាយជាការវាយប្រហារដ៏ធំដល់ឧស្សាហកម្មសម្លៀកបំពាក់ និងស្បែកជើងកម្ពុជាជុំវិញផលប៉ះពាល់អវិជ្ជមានដ៏ខ្លាំងបំផុតដោយសារជំងឺកូវីដ ១៩ នេះ។
លោក ស៊ូអៀង ថ្លែងថា៖ «ប្រសិនបើការដកនេះនឹងត្រូវបានអនុវត្តការងារនឹងត្រូវបាត់បង់ច្រើន ឬនឹងមិនត្រឡប់មកវិញជារៀងរហូត។ EU មិនត្រូវព្រងើយកន្តើយផលប៉ះពាល់ដ៏ធ្ងន់ធ្ងរនៃស្ថានការណ៍ និងផលប៉ះពាល់ដ៏ធ្ងន់ធ្ងរដោយសារតែការដក EBA ដែលគ្រោងនឹងធ្វើឡើងនៅខែសីហាខាងមុខនេះទេ ខណៈការខូចខាតដោយសារការរីករាលដាលជំងឺដែលមិនធ្លាប់មាន នៅតែកំពុងប៉ះពាល់យ៉ាងខ្លាំងដល់វិស័យជាច្រើនរបស់យើង»។
លោក Arnaud Darch ប្រធាន Eurocham ប្រចាំកម្ពុជាក៏បានឲ្យដឹងថា ទន្ទឹមនឹងនេះវីរុសកូរ៉ូណាកំពុងប៉ះពាល់ដល់សេដ្ឋកិច្ចពិភពលោក ប្រទេសកម្ពុជាគឺពិតណាស់មិនអាចចៀសផុតពីការខូចខាតនេះបានទេ។ លោកថ្លែងថា៖ «ការរីករាលដាលជំងឺកូវីដ ១៩ មានផលប៉ះពាល់យ៉ាងខ្លាំងលើសេដ្ឋកិច្ចទូទាំងពិភពលោក ហើយស្ថានការណ៍នេះគឺមិនខុសពីកម្ពុជាដែលការអភិវឌ្ឍរបស់ប្រទេសនេះពឹងផ្អែកយ៉ាងខ្លាំងលើពាណិជ្ជកម្មជាមួយអឺរ៉ុប»។
EU គឺជាដៃគូពាណិជ្ជកម្មឈានមុខគេរបស់កម្ពុជាដោយមានចំនួន ៤៥ ភាគរយ នៃការនាំចេញរបស់ប្រទេសកម្ពុជាកាលពីឆ្នាំ ២០១៨។ ការនាំចេញទៅទីផ្សារចាយប្រាក់អឺរ៉ូ EU បានកើនឡើង ៤,៩ ពាន់លានអឺរ៉ូកាលពីឆ្នាំ ២០១៨ គឺកើនឡើងជិត ២ ដងពីចំនួន ២,៥ ពាន់លានអឺរ៉ូដែលបានកត់ត្រាកាលពីឆ្នាំ ២០១៣។ ៩៥,៧ ភាគរយ ក្នុងចំណោមការនាំចេញទាំងនោះបានចូលទៅទីផ្សារ EU ក្រោមការអនុគ្រោះពន្ធពាណិជ្ជកម្ម EBA។ ជារួមប្រទេសកម្ពុជាគឺជាអ្នកប្រើប្រាស់ឈានមុខគេទី ២ ដែលទទួលការអនុគ្រោះពន្ធពាណិជ្ជកម្ម EBA បន្ទាប់ពីប្រទេសបង់ក្លាដែស។
លោក Anthony Galliano អគ្គនាយកក្រុមហ៊ុន Cambodia Investment Management បានឲ្យដឹងថា ដោយសារសេដ្ឋកិច្ចពិភពលោករងការខូចខាតយ៉ាងរហ័ស ហើយនៅពេលនេះភាពចលាចលនៅអាមេរិក ធ្វើឲ្យធ្លាក់ចុះជិត ៨៥ ភាគរយ ក្នុងការលក់រាយសម្លៀកបំពាក់កាលពីខែមេសា។ លោកបន្ថែមថា៖ «យើងអាចសង្ឃឹមថា EU នឹងយោគយល់ចំពោះផលប៉ះពាល់ពីការផ្អាកនេះ ដែលនឹងប៉ះពាល់ខ្លាំងដល់ប្រទេសកម្ពុជា និងកម្មករដែលមានប្រាក់ចំណូលទាប»៕LA
វីដេអូ៖