ភ្នំពេញៈ សមាគមអ្នកបច្ចេកវិទ្យាហិរញ្ញវត្ថុកម្ពុជា (CFA) ត្រូវបានដាក់ដំណើរការជាផ្លូវការកាលពីល្ងាចថ្ងៃពុធ ដើម្បីជួយសម្រួលការសហការក្នុងចំណោមភាគីពាក់ព័ន្ធនៅក្នុងប្រព័ន្ធ FinTech នៅកម្ពុជាក្នុងគោលបំណងគាំទ្រដល់ការអភិវឌ្ឍឧស្សាហកម្មនេះ។
Fintech ជាការបញ្ចូលគ្នានៃពាក្យ Financial and Technology គឺជាឧស្សាហកម្មថ្មីដែលប្រើប្រាស់បច្ចេកវិទ្យាក្នុងការកែលម្អសកម្មភាពនៅក្នុងវិស័យហិរញ្ញវត្ថុ។ មានទីតាំងនៅមជ្ឈមណ្ឌលភ្នំពេញ CFA មានប្រតិបត្តិករដូចជា ក្រុមហ៊ុនទូទាត់ឌីជីថល ធនាគារ ប្រតិបត្តិករហិរញ្ញវត្ថុ និងក្រុមហ៊ុនច្នៃបង្កើត Fintech។
លោក Eddie Lee អនុប្រធាន CFA បានថ្លែងថាកម្ពុជាកំពុងអនុវត្តច្រើនរួចហើយលើ Fintech ខណៈធនាគារកណ្ដាលកម្ពុជាបានស្វែងរកការប្រើប្រាស់បច្ចេកវិទ្យា block-chain ដើម្បីតាមដានការជួញដូរអន្តរធនាគារ និងការផ្ដល់កម្ចីនៅប្រទេសកម្ពុជា។
លោក Eddie លើកឡើងថាតំណាងរបស់ CFA បានចុះហត្ថលេខាលើអនុស្សរណៈនៃការយោគយល់គ្នាជាមួយសមាគម Taiwan Fintech Association សមាគម Thailand Fintech Association និងសមាគម Singapore Fintech Association ដើម្បីបង្កើតការតភ្ជាប់ជាមួយសមាគមនៅក្រៅប្រទេសផ្សេងទៀត។ លោកបន្ថែមថាការងារបន្ទាប់នឹងចុះបញ្ជី CFA នៅបណ្ដាញ ASEAN Fintech Network។
លោកស្រី ជា សិរី អគ្គនាយិកា ធនាគារជាតិនៃកម្ពុជាបានថ្លែងនៅក្នុងពិធីដាក់ឲ្យដំណើរការរបស់ CFA ថាការអភិវឌ្ឍ Fintech នៅកម្ពុជាកំពុងបង្កើនល្បឿនគួរឲ្យកត់សម្គាល់ ហើយវាបានជួយប្រជាជនកាន់តែច្រើនក្នុងការប្រើប្រាស់សេវាហិរញ្ញវត្ថុនូវមធ្យោបាយផ្លូវការ។ លោកស្រីបន្ថែមថា Fintech ជួយប្រជាជននៅតំបន់ឆ្ងាយៗឲ្យទទួលបានសេវាធនាគារកាន់តែច្រើន និងជួយពួកគេឲ្យមានឱកាសកាន់តែប្រសើរក្នុងការងើបចេញពីភាពក្រីក្រ។ លោកស្រីលើកឡើងថា៖ «យើងចង់មើលឃើញប្រជាជននៅក្នុងតំបន់ឆ្ងាយៗ ទទួលបានសេវាហិរញ្ញវត្ថុដោយងាយស្រួល តម្លៃទាប ស្មើភាព និងសុវត្ថិភាព»៕LA