ភ្នំពេញៈ ស្របពេលដែលរដ្ឋាភិបាលកំពុងប្រយុទ្ធប្រឆាំងដើម្បីទប់ស្កាត់ការឆ្លងរាតត្បាតកូវីដ ១៩ ដែលកើតចេញពីព្រឹត្តិការណ៍សហគមន៍ ២០ កុម្ភៈ ទៅរកភាពធម្មតាវិញ ស្ទើរតែគ្រប់វិស័យ និងប្រជាជនកំពុងជម្នះបន្តរស់នៅក្នុងអំឡុងពេលដ៏ពិបាកបំផុតនេះ។ សហគមន៍អាជីវកម្មមួយចំនួនកំពុងអំពាវនាវដល់គ្រប់គ្រឹះស្ថានហិរញ្ញវត្ថុឱ្យផ្អាកការបង់ទាំងប្រាក់ដើម និងអត្រាការប្រាក់រយៈពេល ២-៣ ខែ ដើម្បីចូលរួមចំណែកស្រោចស្រង់ស្ថានការណ៍ដ៏អាក្រក់នេះ។
រដ្ឋាភិបាលបានចេញវិធានការអន្តរាគមន៍ជុំទី៨ រួចមកហើយចាប់តាំងពីវីរុសកូរ៉ូណាបានផ្ទុះឡើងកាលពីចុងឆ្នាំ ២០១៩ ដើម្បីជួយដល់វិស័យដែលរងផលប៉ះពាល់ និងរក្សាដំណើរការអាជីវកម្មទៅមុខ។
លោក Anthony Galliano អគ្គនាយកក្រុមហ៊ុន Cambodian Investment Management បានឱ្យដឹងថា «ព្រឹត្តិការណ៍សហគមន៍ ២០ កុម្ភៈ» អាចពិពណ៌នាបានថា ជាការបំផ្លិចបំផ្លាញ ទាំងសេដ្ឋកិច្ច និងសង្គម និងបានបង្កើនហានិភ័យសុខភាពប្រទេសជាតិយ៉ាងខ្លាំង។ វិស័យដែលប៉ះពាល់ធ្ងន់ធ្ងរខ្លាំងជាងគេគឺវិស័យទេសចរណ៍ បដិសណ្ឋារកិច្ច កាត់ដេរ និងសំណង់។
លោកថ្លែងថា៖ «ធនាគារនានានឹងត្រូវប្រឈមនឹងការពិបាក បើពួកគេបន្តការរៀបចំឥណទានឡើងវិញ ជាមួយនឹងការពន្យារពេលបង់ប្រាក់បន្ថែមទៀតសម្រាប់អាជីវកម្មនៅក្នុងស្ថានការណ៍ដ៏អាក្រក់នេះ។ ដំណោះស្រាយល្អបំផុត គឺការចាក់វ៉ាក់សាំងឱ្យបានច្រើនក្នុងល្បឿនរហ័សបំផុតតាមដែលអាចធ្វើទៅបានដែលនឹងនាំឱ្យមានការផ្លាស់ប្តូរដ៏ធំមួយភ្លាមៗ និងត្រួសត្រាយផ្លូវសម្រាប់ការងើបឡើងវិញ»។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជា (CRF) និងជាប្រធាននាយកប្រតិបត្តិក្រុមហ៊ុន Signatures of Asia Co Ltd បានឱ្យដឹងថា ចាប់តាំងពីការផ្ទុះឡើងការរីករាលដាលជំងឺកូវីដ ១៩ បានប៉ះពាល់យ៉ាងខ្លាំងដល់សេដ្ឋកិច្ច ខណៈវិស័យភាគច្រើន និងប្រជាជនកំពុងជម្នះក្នុងការបន្តរស់ ជាពិសេសដោយសារការផ្ទុះឡើងនៅពេលថ្មីៗនៃព្រឹត្តិការណ៍សហគមន៍ ២០ កុម្ភៈ។
លោកថ្លែងថា៖ «ការរីករាលដាលជំងឺកូវីដ ១៩ កំពុងប៉ះពាល់ដល់ស្ទើរគ្រប់វិស័យ។ យើងសូមអំពាវនាវដល់គ្រឹះស្ថានហិរញ្ញវត្ថុ (FIs) ត្រូវពិចារណាមធ្យោបាយដែលអាចបត់បែនបាន ដើម្បីជួយដល់ប្រជាជនរបស់យើង និងអាជីវកម្មក្នុងអំឡុងពេលដ៏ពិបាកនេះ»។
លោកបានបន្តថា ទោះបីជាវិស័យស្រូវអង្ករមិនរងផលប៉ះពាល់ខ្លាំងក៏ដោយ ប៉ុន្តែវិស័យនេះបានទទួលរងប៉ះពាល់ដោយសារតែកង្វះកុងតឺន័រសម្រាប់ការនាំចេញបានទាន់ពេលវេលា ដែលប៉ះពាល់ដល់លំហូរសាច់ប្រាក់ដែលបណ្ដាលឱ្យមានភាពយឺតយ៉ាវក្នុងការទូទាត់ដល់ធនាគារ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) បានផ្ដល់យោបល់ដល់ធនាគារជាតិនៃកម្ពុជា ត្រូវចេញសេចក្ដីប្រកាសដ៏ច្បាស់លាស់មួយ ដើម្បីស្វែងរកមធ្យោបាយសម្រាប់ FIs ក្នុងការផ្អាកការសងប្រាក់ទាំងប្រាក់ដើម និង អត្រាការប្រាក់ក្នុងរយៈពេល ២ ឬ ៣ ខែ តាមរយៈការពន្យារពេលបន្ថែមលើការសងប្រាក់កម្ចី។
លោកលើកឡើងថា៖ «យើងមិនបដិសេធទេថា FIs ទាំងនោះកំពុងរៀបចំឥណទានឡើងវិញជូនអតិថិជននោះទេ ប៉ុន្តែប្រជាជននៅតែត្រូវការបង់អត្រាការប្រាក់ ខណៈ FIs មួយចំនួនផ្សេងទៀតផាកពិន័យសម្រាប់អ្នកដែលបង់ប្រាក់យឺតយ៉ាវ»។
លោកបន្ថែមថា៖ «ខ្ញុំផ្ដល់យោបល់ដល់ធនាគារ និងគ្រឹះស្ថានមីក្រូហិរញ្ញវត្ថុត្រូវតែចែករំលែកការឈឺចាប់នេះនៅពេលនេះ។ ប្រសិនបើ FIs ទាំងនោះអាចពន្យារពេលបាននឹងមានក្ដីសង្ឃឹមកើតមានឡើងសម្រាប់ពួកយើងក្នុងការរស់ឡើងវិញ ហើយវាក៏អាចជួយប្រជាជនរបស់យើងអាចដកដង្ហើមបានផងដែរ។ ពិតហើយ ខ្ញុំដឹងថា ធនាគារជាច្រើនក៏ត្រូវការរកប្រាក់ចំណេញ ប៉ុន្តែធនាគារទាំងនោះត្រូវតែដឹងថា ក្នុងស្ថានការណ៍បច្ចុប្បន្ន សេដ្ឋកិច្ចរបស់យើងបានរងផលប៉ះពាល់យ៉ាងខ្លាំង»។
លោក សាយ សូនី ប្រធានប្រតិបត្តិនៃគ្រឹះស្ថានប្រាសាក់បានប្រាប់ភ្នំពេញប៉ុស្ដិ៍ថា គ្រឹះស្ថានរបស់លោកបន្តអនុវត្តវិធានការទាំងអស់ ដើម្បីគាំទ្រដល់អាជីវកម្មរបស់អតិថិជនតាមរយៈការបន្តផ្ដល់កម្ចីដល់អតិថិជន ដែលត្រូវការជំនួយក្នុងការចាប់ផ្ដើមអាជីវកម្មពួកគេជាថ្មី ព្រមទាំងវិនិយោគជាថ្មីផងដែរ។
លោកបញ្ជាក់៖ «ដោយមើលឃើញបញ្ហាប្រឈមនេះ យើងកំពុងធ្វើការងារយ៉ាងជិតស្និទ្ធជាមួយអតិថិជនរបស់យើងថា តើបន្ទាប់មកត្រូវការប្រាក់បន្ថែមឬអត់ ឬថាតើយើងរៀបចំឥណទានឡើងវិញ ឬពួកគេអាចបង់ផ្ដាច់ និងទទួលយកកម្ចីថ្មីនៅពេលស្ថានការណ៍ត្រឡប់ទៅរកភាពធម្មតាវិញ»។
លោកបន្តថា ប្រាសាក់បានរៀបចំឥណទានឡើងវិញដល់អតិថិជនជាង ៣៤ ០០០ នាក់ដែលមានសាច់ប្រាក់ ៣៤៤ លានដុល្លារ ប្រហែល ១១,៥ ភាគរយនៃផលបត្រឥណទានសរុបគិតត្រឹមខែកុម្ភៈ ឆ្នាំ ២០២១។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានពន្យល់ថា ធនាគារណាមួយប្រតិបត្តិការនៅក្នុងប្រទេសកម្ពុជា ឬលើពិភពលោកមានរចនាសម្ព័ន្ធមូលនិធិរបស់ពួកគេស្រដៀងគ្នា វាមិនមានបញ្ហានោះទេ ប្រសិនបើពួកគេគឺធនាគារក្នុងស្រុក ឬធនាគារបរទេសដូចជា ១៥ ភាគរយបានពីការបង់ប្រាក់ ១៥ ភាគរយបានពីបំណុលរយៈពេលវែង (ពីគ្រឹះស្ថានហិរញ្ញវត្ថុ ឬធនាគារអន្តរជាតិ) និង ៧០ ភាគរយបានមកពីប្រាក់សន្សំក្នុងស្រុក និងប្រាក់បញ្ញើមានកាលកំណត់ថេរ។
លោកបន្តថា៖ «ប្រសិនបើធនាគារត្រូវបានស្នើសុំឱ្យពន្យារពេលបង់ប្រាក់ទាំងប្រាក់ដើម និងប្រាក់ការ តើនរណាទទួលខុសត្រូវសម្រាប់ការសងប្រាក់ការសម្រាប់ប្រាក់សន្សំ និងអ្នកដាក់ប្រាក់សន្សំ (ពួកគេត្រូវការធនាគារបង់ប្រាក់ត្រឡប់ទៅពួកគេវិញ ទាំងប្រាក់ការ និងប្រាក់ដើម នៅពេលពួកគេដល់ពេលវេលាត្រូវបង់) ហើយអ្នកដែលផ្ដល់ប្រាក់កម្ចីដល់ធនាគារតម្រូវឱ្យធនាគារសងត្រឡប់វិញដល់ពួកគេ ទាំងប្រាក់ការ បូកនឹងប្រាក់ដើម នៅពេលដល់ពេលត្រូវបង់។ ធនាគារ ឬ FI ក៏មានបំណុល និងកាតព្វកិច្ចបង់ប្រាក់ដល់ពួកគេផងដែរ»៕LA