The Phnom Penh Post Search

Search form

Logo of Phnom Penh Post newspaper Phnom Penh Post - សហគមន៍​កសិករ​ចុះ​កិច្ចសន្យា​លក់​ស្រូវ​ឲ្យ AMRU




សហគមន៍​កសិករ​ចុះ​កិច្ចសន្យា​លក់​ស្រូវ​ឲ្យ AMRU

ការ​ប្រមូល​ផល​ស្រូវ​របស់​កសិករ​នៅ ខេត្ត​បាត់ដំបង នា​ពេល​កន្លង​មក។
ការ​ប្រមូល​ផល​ស្រូវ​របស់​កសិករ​នៅ ខេត្ត​បាត់ដំបង នា​ពេល​កន្លង​មក។ ពេល​នេះ​កសិករ​នៅ​ព្រះវិហារ​បាន​ចុះ​កិច្ចសន្យា​លក់​ស្រូវ​ជា​លើក​ដំបូង។ ហេង ជីវ័ន

សហគមន៍​កសិករ​ចុះ​កិច្ចសន្យា​លក់​ស្រូវ​ឲ្យ AMRU

ភ្នំពេញៈ ក្រុម​ហ៊ុន​នាំ​អង្ករ​ចេញ AMRU Rice កាល​ពី​ម្សិល​មិញ​បាន​ចុះ​ហត្ថលេខា​លើ​កិច្ចសន្យា​ពាណិជ្ជកម្ម​ស្រូវ​សរីរាង្គ ២ ៥០០ តោន​ជាមួយ​សហគមន៍​ផលិត​ស្រូវ​ក្នុង ខេត្ត​ព្រះ​វិហារ ដើម្បី​កែច្នៃ​ជា​អង្ករ​នាំ​ចេញ​ទៅ​កាន់​ទីផ្សារ​សហភាព​អឺរ៉ុប និង​សហរដ្ឋ​អាមេរិក។

ស្រូវ​ផ្កា​ម្លិះ​ចំនួន ២ ៥០០ តោន ឬ ស្មើ​នឹង​អង្ករ​ចំនួន ១ ២០០ តោន​នឹង​ត្រូវ​នាំ​ចេញ​ទៅ​កាន់​ទីផ្សារ​សហភាព​អឺរ៉ុប​ចាប់​ពី ខែ​វិច្ឆិកា ឆ្នាំ​នេះ​រហូត​ដល់ ខែ​មេសា ឆ្នាំ​ក្រោយ។

នេះ​គឺជា​កិច្ច​ព្រម​ព្រៀង​បែប​ពាណិជ្ជកម្ម​លើក​ទីមួយ​រវាង​ក្រុម​ហ៊ុន​នាំ​ចេញ​ជាមួយ​កសិករ​លើ​ការ​នាំ​ចេញ​អង្ករ​ក្រអូប​សរីរាង្គ​ទៅ​កាន់​ទីផ្សារ​អន្តរជាតិ។ នេះ​បើ​តាម​ការ​ឲ្យ​ដឹង​ពី​លោក សុង សារ៉ន អគ្គ​នាយក AMRU Rice ជា​ក្រុម​ហ៊ុន​នាំ​ចេញ​ធំ​ជាង​គេ​មួយ​ក្នុង​ចំណោម​ក្រុម​ហ៊ុន​នាំ​ចេញ​ធំ​ទាំង ១០ នៅ​កម្ពុជា។

លោក​ថ្លែង​ថា៖ «យើង​នឹង​ដឹក​អង្ករ​ចេញ​លើក​ទី​មួយ​ចំនួន ១០ កុងតឺន័រ​នៅ ខែ​វិច្ឆិកា បន្ទាប់​ពី​អង្ករ​របស់​យើង​ទទួល​បាន​ការ​បញ្ជាក់​ថា ជា​អង្ករ​សរីរាង្គ​ដោយ​ស្ថាប័ន​បញ្ជាក់​សរីរាង្គ​របស់ បារាំង ECOCERT ដែល​នឹង​ចុះ​មក​ពិនិត្យ​និង​បញ្ជាក់​ពី​អង្ករ​របស់​យើង​នៅ​ក្នុង ខែ​តុលា នេះ»។

លោក​បន្ត​ថា ខេត្ត​ព្រះ​វិហារ ត្រូវ​បាន​ជ្រើស​រើស​ដើម្បី​ចុះ​កិច្ចសន្យា​លើក​នេះ​ដោយ​សារ​ខេត្ត​នេះ​ជា​ទឹក​ដី​ថ្មី​ដែល​ត្រូវ​បាន​ប្រើ​ប្រាស់​ដាំ​ដុះ​ស្រូវ។ កសិករ​នៅ​ក្នុង​ខេត្ត​នេះ​ក៏​បាន​អនុវត្ត​ការ​ដាំដុះ​ដោយ​មិន​ប្រើ​ជី​បំប៉ន ឬ ថ្នាំ​គីមី​បាញ់​សម្លាប់​សត្វ​ល្អិត​ឡើយ ដែល​ធ្វើ​ឲ្យ​ទិន្នផល​អង្ករ​ជា​អង្ករ​សរីរាង្គ។

ក្នុង​កិច្ចសន្យា​កសិករ​នឹង​ទទួល​បាន​តម្លៃ​បន្ថែម ២០ ភាគរយ​ពី​ក្រុម​ហ៊ុន AMRU Rice ខ្ពស់​ជាង​ការ​លក់​ឲ្យ​រោង​ម៉ាស៊ីន​កិន​ស្រូវ​ផ្សេង។

ក្រុម​ហ៊ុន AMRU Rice នឹង​រ៉ាប់​រង​លើ​ការ​ចំណាយ​ដើម្បី​ទទួល​បាន​ការ​បញ្ជាក់​អង្ករ​សរីរាង្គ​សម្រាប់​នាំ​ចេញ និង​ដឹក​ជញ្ជូន​ស្រូវ​ពី ខេត្ត​ព្រះ​វិហារ ដល់​រោង​ម៉ាស៊ីន​កិន​ស្រូវ​សរីរាង្គ​ដែល​មាន​តម្លៃ ១ លាន​ដុល្លារ​របស់​ខ្លួន​នៅ​ក្នុង ខេត្ត​បាត់ដំបង។

AMRU Rice នឹង​ផ្ដោត​នាំ​ចេញ​អង្ករ​សរីរាង្គ​នៅ​ពេល​នេះ​ទៅ​កាន់​ទីផ្សារ​អឺរ៉ុប​សម្រាប់​កិច្ច​ព្រម​ព្រៀង​លើក​នេះ​ហើយ​គ្រោង​នឹង​នាំ​ចេញ​អង្ករ ២០០ តោន​ជា​ការ​សាក​ល្បង​ទៅ​កាន់​អាមេរិក​នៅ ឆ្នាំ​២០១៥។

លោក អុក បុប្ផាផលណារី ប្រធាន​សហគមន៍​នៅ ស្រុក​រវៀង ខេត្ត​ព្រះ​វិហារ បាន​ថ្លែង​ថា លោក​មាន​សង្ឃឹម​អំពី​កិច្ច​ព្រម​ព្រៀង​នេះ​ដោយ​សារ​តម្លៃ​ដែល​បាន​ផ្ដល់​គឺ​ល្អ​ប្រសើរ​ជាង​តម្លៃ​ដែល​បាន​ផ្ដល់​ដោយ​ឈ្នួញ។

លោក​ថ្លែង​ថា៖ «ឈ្នួញ​តែងតែ​ផ្ដល់​តម្លៃ​តាម​តែ​ពួកគេ​ចង់​បាន។ កសិករ​មិន​មាន​ជម្រើស​នោះ​ទេ ដោយ​សារ​ពួកគេ​ត្រូវ​ការ​ប្រាក់។ កសិករ​រីក​រាយ​ដែល​យើង​អាច​មាន​ទីផ្សារ​ពិត​ប្រាកដ​មួយ​សម្រាប់​អង្ករ​របស់​ពួក​យើង​ហើយ​មាន​តម្លៃ​ល្អ»។

លោក​បន្ត​ថា ការ​ដាំ​ដុះ​ស្រូវ​សរីរាង្គ​ពិត​ណាស់​គឺ​ចំណាយ​អស់​តិច​ជាង​ការ​ដាំដុះ​ស្រូវ​ធម្មតា។ លោក​ជំរុញ​ឲ្យ​កសិករ​ធ្វើ​ស្រូវ​សរីរាង្គ​ដោយ​សារ​តែ​វា​ផ្ដល់​ប្រាក់​ចំណេញ​ច្រើន​ជាង​ការ​ធ្វើ​ស្រែ​ដោយ​ប្រើ​ជី និង​ថ្នាំ​សម្លាប់​សត្វ​ល្អិត​គីមី។

កសិករ​នៅ​ក្នុង ខេត្ត​ព្រះវិហារ អាច​ធ្វើ​ស្រែ​បាន​តែ​ម្ដង​ប៉ុណ្ណោះ​ក្នុង​មួយ​ឆ្នាំ ដែល​ទទួល​បាន​ទិន្នផល​ស្រូវ​ក្រអូប​ប្រហែល ៣ តោន​ក្នុង​មួយ​ហិកតា។

តួលេខ​បាន​ពី​អង្គការ​កសិកម្ម CEDAC បង្ហាញ​ថា ចាប់​ពី ខែ​មករា ដល់ ខែ​សីហា ឆ្នាំ​នេះ មាន​អង្ករ​សរីរាង្គ​ជាង ២៥៧ តោន​ត្រូវ​បាន​នាំ​ចេញ​ទៅ​កាន់​ទីផ្សារ​នៅ​ក្នុង ប្រទេស​អាមេរិក អាល្លឺម៉ង់ និង ទីក្រុង​ហុងកុង។

AMRU Rice គឺ​ក្រុម​ហ៊ុន​នាំ​ចេញ​អង្ករ​ទី​ពីរ​ដែល​បង្កើន​ចំណាប់​អារម្មណ៍​របស់​ខ្លួន​លើ​ការ​នាំ​ចេញ​អង្ករ​ក្រអូប​សរីរាង្គ​បន្ទាប់​ពី Mekong Oryza Trading បាន​ចុះ​ហត្ថលេខា​លើ MOU ជាមួយ​អង្គការ CEDAC ដែល​ជា​អ្នក​នាំ​ចេញ​អង្ករ​សរីរាង្គ​សម្រាប់ CEDAC កាល​ពី ខែ​ធ្នូ ឆ្នាំ​មុន៕

អត្ថបទគួរចាប់អារម្មណ៍