.jpg)
លោក រ័ត្ន សុវណ្ណនរៈ អគ្គនាយកត្រួតពិនិត្យ ធនាគារជាតិនៃកម្ពុជា។ រូបថត NBC
ភ្នំពេញៈ មន្ត្រីជាន់ខ្ពស់របស់ធនាគារជាតិនៃកម្ពុជា (NBC) បានថ្លែងថា បញ្ហាកង្វះព័ត៌មានអំពីសេវា និងផលិតផលហិរញ្ញវត្ថុមិនមានលទ្ធភាពក្នុងការបំពេញតាមលក្ខខណ្ឌតម្រូវនានា និងខ្វះការយល់ដឹងផ្នែកហិរញ្ញវត្ថុគឺជាឧបសគ្គចម្បងដែលបានរារាំងសហគ្រិនស្ត្រីក្នុងការទទួលបានហិរញ្ញប្បទានសម្រាប់ពង្រីកអាជីវកម្មរបស់ពួកគេ។
ការថ្លែងបែបនេះត្រូវធ្វើឡើងដោយលោក រ័ត្ន សុវណ្ណនរៈ អគ្គនាយកត្រួតពិនិត្យ ធនាគារជាតិនៃកម្ពុជា ក្នុងវេទិកាប្រព័ន្ធអេកូឡូស៊ីសហគ្រិនភាព ក្រោមប្រធានបទ «លទ្ធភាពទទួលបានហិរញ្ញប្បទានសម្រាប់សហគ្រិនស្ត្រីក្នុងសម័យកាលកូវីដ១៩» ដែលប្រព្រឹត្តទៅកាលពីថ្ងៃព្រហស្បតិ៍សប្តាហ៍មុន ដែលរៀបចំដោយអង្គការផេកកម្ពុជា (Pact Cambodia) តាមរយៈគម្រោងសហគ្រិននារីសកម្ម (WE Act) ដែលគាំទ្រថវិកាដោយទីភ្នាក់ងារជំនួយអាមេរិក USAID ក្រោមកិច្ចសហការជាមួយធនាគារជាតិនៃកម្ពុជា សហគ្រិនខ្មែរ Swisscontact និង Good Return។
លោកបានថ្លែងថា ទោះបីជាកម្រិតបរិយាប័ន្នហិរញ្ញវត្ថុនៅកម្ពុជាមានកំណើនគួរឱ្យកត់សម្គាល់ក៏ការជំរុញបរិយាប័ន្នហិរញ្ញវត្ថុនៅតែជួបប្រទះបញ្ហាប្រឈមមួយចំនួន ជាពិសេសចំពោះស្ត្រី។ ទោះជាស្ត្រី និងបុរសមានលទ្ធភាពស្មើគ្នាក្នុងការទទួលបានសេវាហិរញ្ញវត្ថុ ប៉ុន្តែការប្រើប្រាស់សេវាហិរញ្ញវត្ថុរបស់បុរស និងស្ត្រីនៅតែមានគម្លាតគ្នា។ ឧទាហរណ៍នៅក្នុងប្រទេសកម្ពុជា មូលនិធិ UNCDF បានរកឃើញថា គណនីប្រាក់បញ្ញើប្រមាណ ៧០ ភាគរយ គឺជាគណនីអសកម្មដែលមានសមតុល្យតិចតួចបំផុតហើយភាគច្រើននៃគណនីទាំងនេះគឺជារបស់ស្ត្រី។
លោកបញ្ជាក់ថា៖ «មានភ័ស្តុតាងជាច្រើនបង្ហាញថា លទ្ធភាពទទួលបានឥណទានរបស់ស្ត្រី និងបុរសមានកម្រិតប្រហាក់ប្រហែលគ្នា ប៉ុន្តែទំហំឥណទានជាមធ្យមរបស់ស្ត្រីមានកម្រិតទាប បើធៀបនឹងទំហំឥណទានជាមធ្យមរបស់បុរស។ ដើម្បីដោះស្រាយបញ្ហាប្រឈមទាំងនេះ ការជំរុញនវានុវត្តន៍សេវាឥណទានសម្រាប់សហគ្រាសធុនតូច និងមធ្យម ការលើកកម្ពស់សិទ្ធិ និងបង្កើនកិច្ចការពារអតិថិជនព្រមទាំងបង្កើនតម្លាភាពក្នុងវិស័យហិរញ្ញវត្ថុត្រូវបានកំណត់ជាសកម្មភាពអាទិភាពរបស់យើង»។
លោកស្រី Sabine Joukes ប្រធានគម្រោងសហគ្រិននារីសកម្មឱ្យដឹងថា អង្គការលោកស្រីបានធ្វើការជាមួយដៃគូពាក់ព័ន្ធនានាដើម្បីផ្តល់ចំណេះដឹងផ្នែកសេវាហិរញ្ញវត្ថុដល់សហគ្រិនស្ត្រី និងសិក្សាអំពីតម្រូវការរបស់ពួកគេ។
លោកស្រីលើកឡើងថា៖ «យើងមានគោលបំណងក្នុងការផ្សារភ្ជាប់តួអង្គសមាសភាពទាំងអស់ដើម្បីពាំនាំជម្រើសហិរញ្ញវត្ថុដែលឆ្លើយតបនឹងតម្រូវការរបស់សហគ្រិនស្ត្រី ហើយដើម្បីប្រាកដថា យើងអាចបំពេញចន្លោះខ្វះខាត ដូចនេះសហគ្រិនស្ត្រីមានជម្រើសដ៏ល្អដែលឆ្លើយតបនឹងតម្រូវការរបស់ពួកគាត់»។
លោក ឈាង វណ្ណមុនិណ្ណ នាយកប្រតិបត្តិសហគ្រាសខ្មែរបានឱ្យដឹងថា សហគ្រិនខ្មែរបានចាប់ផ្តើមបង្កើតកញ្ចប់ជំនួយសម្រាប់ការចាប់ផ្តើមចំនួន ២ លើកសម្រាប់សហគ្រាសទើបចាប់ផ្តើមថ្មី និងសហគ្រាសធុនតូច និងមធ្យមដែលជួបការលំបាកក្នុងអំឡុងពេលនៃការរីករាលដាលជំងឺកូវីដ១៩ ដោយមានអ្នកដាក់ពាក្យប្រហែល ៣០០ មកពីខេត្ត ១៩ និងសហគ្រាសចំនួន ២៧ បានទទួលជំនួយ។ ក្នុងចំណោមសហគ្រាសទាំង ២៧ ដែលទើបចាប់ផ្តើមថ្មី និងសហគ្រាសធុនតូច និងមធ្យមគឺ ៦០ ភាគរយនៃសហគ្រាសដែលឈ្នះគ្រប់គ្រងដោយស្ត្រី។
លោកថា៖ «ការរាំងស្ទះសម្រាប់អាជីវកម្មក្នុងស្រុកការចាប់ផ្តើមអាជីវកម្ម និងការរីកចម្រើនរបស់សហគ្រាសដំណាក់កាលដំបូងគឺការទទួលបានហិរញ្ញប្បទានសមស្រប។ ដូច្នេះវាគឺជាការចាំបាច់ក្នុងការធ្វើឱ្យប្រសើរឡើងនូវការទទួលបានហិរញ្ញវត្ថុតាមរយៈកម្មវិធីគាំទ្រភាពជាសហគ្រិនត្រូវបានបង្កើតឡើងតាមរយៈភាពជាដៃគូក្នុងចំណោមដៃគូ គ្រឹះស្ថានហិរញ្ញវត្ថុ និងវិនិយោគិន។
បើយោងតាមលោក សុវណ្ណនរៈ រដ្ឋាភិបាលកម្ពុជាបានដាក់ចេញនូវយុទ្ធសាស្ត្រជាតិស្តីពី «បរិយាប័ន្នហិរញ្ញវត្ថុ ឆ្នាំ ២០១៩-២០២៥» កាលពីថ្ងៃទី ១២ ខែកក្កដា ឆ្នាំ ២០១៩ ដោយបានកំណត់គោលដៅ «ការបង្កើនលទ្ធភាពទទួលបានសេវាហិរញ្ញវត្ថុផ្លូវការដែលមានគុណភាព កាត់បន្ថយអត្រាស្ត្រីដែលមិនទាន់ទទួលបានសេវាហិរញ្ញវត្ថុឱ្យបានពាក់កណ្តាលពី ២៧ ភាគរយ មក ១៣ ភាគរយ និងពង្រីកការប្រើប្រាស់សេវាហិរញ្ញវត្ថុផ្លូវការពី ៥៩ ភាគរយ ទៅ ៧០ ភាគរយ ត្រឹមឆ្នាំ ២០២៥ ព្រមទាំងធ្វើឱ្យប្រសើរឡើងនូវសុខុមាលភាពគ្រួសារ និងគាំទ្រកំណើនសេដ្ឋកិច្ច។
លោកថ្លែងថា៖ «ធនាគារជាតិនៃកម្ពុជាបាននិងកំពុងសហការជាមួយភាគីពាក់ព័ន្ធនានាក្នុងការសិក្សាលទ្ធភាពក្នុងការផ្តល់ឥណទានដោយមិនមានទ្រព្យធានា និងរៀបចំយុទ្ធនាការជាច្រើនទៀតក្នុងការលើកកម្ពស់ចំណេះដឹងផ្នែកហិរញ្ញវត្ថុសម្រាប់ស្ត្រី និងសហគ្រិនស្ត្រីក៏ដូចជាកិច្ចការពារអតិថិជនដែលប្រើប្រាស់ហិរញ្ញវត្ថុ»៕
