ភ្នំពេញៈ សហព័ន្ធស្រូវអង្ករកម្ពុជា CRF បានត្រៀមប្រព័ន្ធទិន្នន័យនាំចេញដើម្បីបង្ហាញទៅគណៈកម្មាធិការអឺរ៉ុបសម្រាប់ការចុះរបស់គណៈកម្មការនេះនៅក្នុងវិស័យស្រូវអង្ករកម្ពុជាខែកក្កដា។
ក្រុមការងារស៊ើបអង្កេតរបស់គណៈកម្មាធិការអឺរ៉ុបនេះ និងចុះមកត្រួតពិនិត្យទិន្នន័យ និងអង្កេតក្រុមហ៊ុននាំចេញអង្កររបស់កម្ពុជានៅខែកក្កដាខាងមុខនេះ។ នេះបើយោងតាមលោក មូល សារិទ្ធី អគ្គលេខាធិការនៃសហព័ន្ធស្រូវអង្ករកម្ពុជា។
លោកថ្លែងថា៖ «យើងបានពិភាក្សាជាមួយនឹងសហភាពអឺរ៉ុប ហើយយើងត្រៀមរៀបចំទិន្នន័យដើម្បីឆ្លើយតប និងត្រៀមក្រុមហ៊ុននាំចេញមួយចំនួនសម្រាប់ការអង្កេតលើកទីមួយរបស់អ្នកអង្កេតការនៃគណៈកម្មាធិការ»។
គណៈកម្មាធិការអឺរ៉ុបបានរកឃើញភ័ស្តុតាងគ្រប់គ្រាន់ដើម្បីដាក់ការស៊ើបអង្កេតមួយថាតើអង្ករកម្ពុជាដែលត្រូវបាននាំចេញទៅសហភាពអឺរ៉ុប បង្ហាញពីការមិនស្មើភាពគ្នាជាមួយកសិករនៅអឺរ៉ុបដែរឬយ៉ាងណា។
ការស៊ើបអង្កេតនេះត្រូវបានធ្វើឡើងកាលថ្ងៃទី ១៦ ខែមីនាដើម្បីឆ្លើយតបនឹងសំណើរបស់ប្រទេសអ៊ីតាលីដែលបានអំពាវនាវឲ្យមានការចាត់ «វិធានការការពារ» ដែលភាគច្រើនទាមទារឲ្យរឹតបន្តឹងការនាំចូល ឬ អត្រាពន្ធ ដើម្បីហូតពន្ធលើអង្ករដែលនាំចូលពីប្រទេសកម្ពុជា។ ការហូតពន្ធឡើងវិញលើអង្ករកម្ពុជាអាចមានផលប៉ះពាល់ចំពោះឧស្សាហកម្មនេះ។ ការនាំចេញអង្កររបស់កម្ពុជាទៅសហភាពអឺរ៉ុបកាលពីឆ្នាំទៅមានទំហំស្មើនឹង ៤០ ភាគរយនៃការនាំចេញអង្ករសរុបរបស់កម្ពុជា។
លោកបន្តថា៖ «យើងបានត្រៀមមេធាវីអន្តរជាតិដើម្បីការពារផលប្រយោជន៍នៃការនាំចេញអង្កររបស់យើង» កសិករអ៊ីតាលីបានប្តឹងទាស់ពីការនាំចូលអង្ករកម្ពុជាចាប់តាំងពីឆ្នាំ ២០១៤ មក ប៉ុន្តែនេះគឺជាលើកដំបូងដែលការស៊ើបអង្កេតផ្លូវការមួយត្រូវបានដាក់ដំណើរការដោយគណៈកម្មាធិការអឺរ៉ុប៕