.jpg)
សហព័ន្ធស្រូវអង្ករកម្ពុជា និងក្រុមហ៊ុន ហ្គ្រីនត្រេដ បញ្ចេញអង្ករលក់ដំបូងនៅថ្ងៃនេះដែលខ្លួនរំពឹងថានឹងរួមចំណែកដល់ការទប់ស្កាត់ការឡើងថ្លៃស្បៀង។ ហុង មិនា
ភ្នំពេញ: សហព័ន្ធស្រូវអង្ករកម្ពុជា និងក្រុមហ៊ុន ហ្គ្រីនត្រេដ បញ្ចេញអង្ករលក់ដំបូងនៅថ្ងៃនេះដែលខ្លួនរំពឹងថានឹងរួមចំណែកដល់ការទប់ស្កាត់ការឡើងថ្លៃស្បៀង និងរម្ងាប់ក្តីព្រួយបារម្ភរបស់ប្រជាជននៅក្នុងទីក្រុងបណ្តាលមកពីវីរុសកូវីដ ១៩ ដែលកំពុងរាលដាលនៅប្រទេសជាច្រើនក្នុងពិភពលោក។
មន្ត្រីសហព័ន្ធស្រូវអង្ករកម្ពុជាបានអះអាងថា ក្រុមហ៊ុនរោងម៉ាស៊ីនកិនស្រូវដែលជាសមាជិករបស់ខ្លួនទាំងនៅរាជធានីភ្នំពេញ និងតាមបណ្តាខេត្តបានត្រៀមបញ្ចេញអង្កររាប់ពាន់តោនសម្រាប់លក់ឲ្យប្រជាពលរដ្ឋនៅក្រុងភ្នំពេញដែលកំពុងទទួលរងសម្ពាធដោយក្តីបារម្ភចំពោះការរីករាលដាលនៃវីរុសកូវីដ១៩ និង ទប់ស្កាត់ការឡើងថ្លៃអង្ករបង្កដោយអ្នកឆ្លៀតឱកាស។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា សមាជិករោងម៉ាស៊ីនកិនស្រូវរបស់សហព័ន្ធស្រូវអង្ករកម្ពុជាគ្រោងបញ្ចេញអង្ករចន្លោះពី ១០០ តោនទៅ ៥០០ តោនសម្រាប់លក់ក្នុងស្រុកដើម្បីរក្សាស្ថិរភាពនៃការផ្គត់ផ្គង់អង្ករនៅលើទីផ្សារ ខណៈអង្ករនៅក្នុងឃ្លាំងរបស់សមាជិករបស់ខ្លួនទាំងជាង ៤០០ ទីតាំងមានចំនួនជាង ៤០ ម៉ឺនតោន។ លោកថ្លែងថា៖ «សូមប្រជាពលរដ្ឋកុំព្រួយបារម្ភ និងភ័យស្លន់ស្លោពេក យើងមានអង្ករគ្រប់គ្រាន់ មិនខ្វះនោះទេ។ យើងនឹងលក់អង្ករក្នុងតម្លៃសមរម្យ ហើយយើងលក់រហូតទាល់តែរដ្ឋាភិបាលអាចគ្រប់គ្រងកូវីដ ១៩ បានល្អប្រសើរ»។
ប៉ុន្មានថ្ងៃចុងក្រោយនេះប្រជាជនរស់នៅក្នុងទីក្រុងភ្នំពេញនាំគ្នាសម្រុកទិញស្បៀងអាហារបម្រុងទុកពីផ្សារទំនើបនានា ដែលជះឥទ្ធិពលដល់ការឡើងថ្លៃទំនិញនៅលើទីផ្សារ។
យោងតាមចេញប្រកាសព័ត៌មានរបស់សហព័ន្ធស្រូវអង្ករកម្ពុជា និងក្រុមហ៊ុន ហ្គ្រីនត្រេដនឹងបើកលក់អង្ករនៅថ្ងៃនេះដែលខ្លួនយល់ថាជាការរួមចំណែកទប់ស្កាត់ការឡើងថ្លៃស្បៀងអាហារ ជាពិសេសអង្ករដែលជាតម្រូវការចាំបាច់បំផុតក្នុងគ្រួសារ។
ក្រុមហ៊ុន ហ្គ្រីនត្រេដ ដែលជាក្រុមហ៊ុនរដ្ឋគ្រប់គ្រងដោយក្រសួងពាណិជ្ជកម្មនឹងបើកលក់អង្ករនៅស្នាក់ការរបស់ខ្លួនស្ថិតនៅសង្កាត់ផ្សារកណ្តាល ១ និងនៅឃ្លាំងស្តុកអង្ករស្ថិតសង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។ ក្រៅពីនោះក្រុមហ៊ុនដែលជាសមាជិកសហព័ន្ធធំៗ ដូចជា ក្រុមហ៊ុន អេមរូរ៉ាយ មេគង្គអូរីហ្សា បៃតងកម្ពុជា ខ្មែរហ៊្វូតគ្រុប រោងម៉ាស៊ីនវង្សប៊ុនហេង រោងម៉ាស៊ីនអៀងហ៊ាង និងរោងម៉ាស៊ីន ហាក់ សែ ក៏ចូលរួមក្នុងការបញ្ចេញអង្ករក្នុងតម្លៃថេរដែរ។
តាមតម្លៃដែលក្រុមហ៊ុនប្រកាស ប្រភេទអង្ករសែនក្រអូបនឹងត្រូវលក់ក្នុងតម្លៃ ១៥២ ០០០ រៀលក្នុង ១ បាវទម្ងន់ ៥០ គីឡូក្រាម ខណៈតម្លៃអង្ករផ្សេងៗទៀតមានតម្លៃខ្ពស់ ឬទាបតាមប្រភេទអង្ករ។
ការផ្អើលទិញស្បៀងស្តុកទុកបានកើតឡើងមុន រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ដែលបានប្រកាសកាលពីល្ងាចថ្ងៃសៅរ៍ពីវត្តមានដំបូងវីរុសកូវីដ ១៩ លើបុរសជនជាតិខ្មែរវ័យ ៣៨ ឆ្នាំនៅខេត្តសៀមរាបដែលបានឆ្លងពីជនជាតិជប៉ុន។
លោក លន់ យ៉េង ក៏បានអះអាងថា សហព័ន្ធស្រូវអង្ករកម្ពុជាក៏គ្រោងនឹងបញ្ចេញអង្ករលក់នៅខេត្តសៀមរាបផងដែរ។ លោកថ្លែងថា៖ «យើងក៏មានផែនការលក់អង្ករនៅទីនោះដែរ»។
លោក ចាន់ ពេជ្រ ប្រធានគ្រប់គ្រងទូទៅនៃក្រុមហ៊ុន Signatures of Asia បាននិយាយថា ក្រុមហ៊ុន Signatures of Asia ដែលជាក្រុមហ៊ុននាំចេញអង្ករបានត្រៀមលក់អង្ករក្នុងពេលនេះដោយបញ្ចេញអង្ករប្រមាណ ១០០០ តោន។
លោកថ្លែងថា៖ «ក្នុងជំហានដំបូងក្រុមហ៊ុនខ្ញុំនឹងដឹកអង្ករពីខេត្តចំនួន ២០ តោនមកទីក្រុងនៅសប្តាហ៍នេះ។ប្រសិនបើតម្រូវការខ្ពស់យើងនឹងបញ្ចេញអង្ករពីឃ្លាំងបន្តបន្ទាប់ទៀត»។
សាលារាជធានីភ្នំពេញក៏បានអំពាវនាវឲ្យប្រជាពលរដ្ឋរក្សាភាពស្ងៀមស្ងាត់ បន្ទាប់ពីពួកគេនាំគ្នាសម្រុកទៅទិញស្បៀងអាហារជាច្រើនត្រៀមបម្រុងទុកដោយសារការភ័យខ្លាចជំងឺ កូវីដ ១៩ ក្នុងសប្តាហ៍កន្លងទៅនេះ៕
