.jpg)
គណៈកម្មការអឺរ៉ុបនឹងស្នើប្រាក់រាប់លានអឺរ៉ូ ដើម្បីស្រោចស្រង់សេដ្ឋកិច្ចតំបន់អឺរ៉ុប។ រូបថត AFP
ប្រ៊ុចសែលៈ ប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា គណៈកម្មការអឺរ៉ុបនឹងស្នើនូវកញ្ចប់សង្គ្រោះសេដ្ឋកិច្ចថ្មីដើម្បីជួយតំបន់អឺរ៉ុបឲ្យងើបពីការខូចខាតសេដ្ឋកិច្ចបណ្តាលមកពីការរីករាលដាលវីរុសកូរ៉ូណា។
លោកស្រី Ursula von der Leyen បានឲ្យដឹងក្នុងសេចក្តីប្រកាសព័ត៌មានថា៖ «ដើម្បីធានាដល់ការងើបឡើងវិញផ្នែកសេដ្ឋកិច្ច គណៈកម្មការអឺរ៉ុបនឹងស្នើការផ្លាស់ប្តូរក្នុងសំណើក្របខ័ណ្ឌហិរញ្ញវត្ថុសម្រាប់រយៈពេលច្រើនឆ្នាំ (MFF) ដែលនឹងអនុញ្ញាតឲ្យដោះស្រាយកញ្ចប់ថវិកាសង្គ្រោះវិបត្តិកូរ៉ូណា»។
MFF គឺជាក្របខណ្ឌហិរញ្ញវត្ថុច្រើនឆ្នាំគឺជាថវិការយៈពេលវែងរបស់សហភាពអឺរ៉ុប។
លោកស្រីបាននិយាយថា៖ «កញ្ចប់ថវិកាសង្គ្រោះនោះនឹងរួមបញ្ចូលនូវកញ្ចប់ជំរុញផ្នែកសេដ្ឋកិច្ចដែលនឹងធានាសង្គតិភាពក្នុងសហភាពអឺរ៉ុបដែលត្រូវបានរក្សាតាមរយៈសាមគ្គីភាព និងការទទួលខុសត្រូវ»។
លោកស្រីបន្ថែមថា៖ «ក្នុងដំណាក់កាលនេះប្រធានគណៈកម្មការមិនច្រានចោលគំនិតណាមួយក្នុងដែនកំណត់នៃអនុសញ្ញានោះទេ»។
កាលពីខែមុនថ្នាក់ដឹកនាំសហភាពអឺរ៉ុបបានបរាជ័យរួចមកហើយនូវកិច្ចព្រមព្រៀងលើការពង្រីកគម្រោងថវិការយៈពេល ៧ ឆ្នាំខាងមុខរាប់ចាប់ពីឆ្នាំ ២០២១ ដល់ឆ្នាំ ២០២៧។ ពួកគេអាចមិនយល់ព្រមលើទំហំទឹកប្រាក់ដែលវិស័យនីមួយៗគួរទទួលបាន។
ទោះបីជាការជជែកបានបន្តចាប់តាំងពីពេលនោះមក ការរីករាលដាលនៃវីរុសឆ្លងបានរីករាលដាលកាន់តែច្រើនពាសពេញតំបន់អឺរ៉ុប ដោយមកដល់ពេលនេះអ្នកឆ្លងនៅអឺរ៉ុបមាន ២/៣ នៃចំនួនអ្នកឆ្លងនៅទូទាំងសកលលោក និងអ្នកស្លាប់មានចំនួន ២១ ៣៣៤ នាក់ នៃចំនួនអ្នកស្លាប់ ៣០ ០០៣នាក់។
ការរាលដាលជំងឺកូវីដ ១៩ បានផ្លាស់ប្តូរទស្សនវិស័យនៃអ្នកដឹកនាំនយោបាយជាច្រើន ដោយតំបន់អឺរ៉ុបទាំងមូលប្រឈមការមើលឃើញនៃការរអិលធ្លាក់ចុះនៃសេដ្ឋកិច្ចនៅចុងឆ្នាំនេះ។
ប៉ុន្តែអ្នកដឹកនាំសហភាពអឺរ៉ុបទាំង ២៧ ប្រទេសមិនបានយល់ស្របចំពោះការឆ្លើយតបសេដ្ឋកិច្ចល្អបំផុតទៅនឹងការខូចខាតបណ្តាលមកពីការរីករាលដាលនៃជំងឺកូវីដ ១៩ ក្នុងអំឡុងពេលប្រជុំ Video-conference កាលពីថ្ងៃព្រហស្បតិ៍ឡើយ។
ពួកគេបានសុំឲ្យប្រទេសក្នុងតំបន់ចាយប្រាក់អឺរ៉ូនាំមកនូវសំណើនៅខែក្រោយ។
លោកស្រី von der Leyen បានបន្តថា៖ «គណៈកម្មការអឺរ៉ុបនឹងចូលរួមក្នុងការពិភាក្សាទាំងនេះ ហើយត្រៀមខ្លួនរួចរាល់ដើម្បីជួយប្រសិនបើទទួលបានការគាំទ្រដោយក្រុមប្រទេសចាយប្រាក់អឺរ៉ូ»។
លោកស្រីបញ្ជាក់៖ «ស្របគ្នានេះគណៈកម្មការកំពុងធ្វើការងារលើគម្រោងសម្រាប់ដំណាក់កាលងើបឡើងវិញនៅក្នុងអនុសញ្ញាដែលមានស្រាប់»។
អ៊ីតាលី អេស្ប៉ាញ និងបារាំងដែលជាប្រទេសទទួលរងខ្លាំងបំផុតរហូតមកដល់ពេលនេះ។ ការរីករាលដាលឆាប់រហ័សនៃជំងឺកូវីដ ១៩ កំពុងជំរុញសហភាពអឺរ៉ុបឲ្យស្វែងរកមធ្យោបាយដើម្បីចែករំលែកបន្ទុកហិរញ្ញវត្ថុកាន់តែប្រសើរជាងនេះ។
ប៉ុន្តែប្រទេស ហូឡង់ និងប្រទេស អាល្លឺម៉ង់ មិនបានអើពើនោះឡើយ ដោយភ័យខ្លាចថា អ្នកជិតខាងរបស់ខ្លួននៅភាគខាងត្បូងដែលចាយធំនឹងធ្វើអាជីវកម្មពីវិបត្តិនេះដើម្បីជំរុញឲ្យមានការដាក់បញ្ចូលបំណុលរដ្ឋាភិបាលតំបន់ចាយប្រាក់អឺរ៉ូបន្ថែមទៀត៕ RR
