ភ្នំពេញៈ សហភាពអឺរ៉ុបបានផ្តល់ថវិកាចំនួន ៥,៣ លានអឺរ៉ូ សម្រាប់គម្រោងថ្មីចំនួន ២ ដើម្បីជំរុញការស្តារសេដ្ឋកិច្ចបៃតងនៅកម្ពុជា ដែលជាគម្រោងជំរុញការប្រើប្រាស់ និងផលិតប្រភពថាមពលមាននិរន្តរភាព និងដាក់ឲ្យសហគ្រាសធុនតូច និងមធ្យមក្នុងស្រុកតាមមាគ៌ានៃការអភិវឌ្ឍសេដ្ឋកិច្ចបៃតង។ នេះបើយោងតាមសេចក្តីប្រកាសព័ត៌មានរបស់វិទ្យាស្ថានកំណើនបៃតងសកល (GGGI) ចេញផ្សាយកាលពីថ្ងៃសុក្រ។
មូលនិធិនេះត្រូវបានផ្តល់ដោយសហភាពអឺរ៉ុប និងទីភ្នាក់ងារអភិវឌ្ឍន៍ឆែកសម្រាប់គម្រោង «Switch to Solar» ក្នុងរយៈពេល ៤ ឆ្នាំចាប់ពីឆ្នាំ ២០២០ ដល់ឆ្នាំ ២០២៤ ដែលអនុវត្តដោយអង្គការ People In Need (PIN) និងដៃគូ ដើម្បីរួមចំណែកដល់កំណើនសេដ្ឋកិច្ចប្រកបដោយចីរភាព និងបរិយាប័ន្នក្នុងតំបន់ជនបទនៅកម្ពុជា។
ប្រជាជនប្រមាណ ១,១៤ លាននាក់ នៅទូទាំងខេត្តចំនួន ៦ និងស្រុក ១៥ តាមតំបន់បឹងទន្លេសាបនឹងទទួលបានអត្ថប្រយោជន៍ពីឱកាសសេដ្ឋកិច្ចកាន់តែច្រើននៅថ្នាក់មូលដ្ឋានដែលបរិស្ថានធម្មជាតិកាន់តែមាននិរន្តរភាព និងបានទទួលផលិតផល និងសេវាកម្មដែលមិនប៉ះពាល់បរិស្ថានពីគោលដៅសហគ្រាសខ្នាតតូចបំផុត តូច និងមធ្យម។
លោក Jerus D''Silva ប្រធានកម្មវិធីទទួលបន្ទុកការពង្រឹងអំណាចសេដ្ឋកិច្ចថាមពលបៃតង និងកាកសំណល់បានឲ្យដឹងនៅក្នុងសេចក្តីប្រកាសព័ត៌មានថា បច្ចុប្បន្នថាមពលសូឡាគឺជាផ្នែកមួយនៃភាពងាយស្រួលបំផុតក្នុងការអនុវត្ត និងរីកចម្រើនលឿនបំផុតនៃបច្ចេកវិទ្យាក្នុងវិស័យថាមពលកកើតឡើងវិញ។
លោកបន្តថា ថាមពលអគ្គិសនីគឺជាមូលដ្ឋានគ្រឹះនៃអ្វីៗគ្រប់យ៉ាងដែលទ្រទ្រង់សេដ្ឋកិច្ចដែលទាមទារឲ្យមានការផ្តោតការយកចិត្តទុកដាក់កាន់តែច្រើនដើម្បីកសាងសេដ្ឋកិច្ចឲ្យដំណើរការល្អ និងប្រកបដោយនិរន្តរភាព។
លោកនិយាយថា៖ «ខ្ញុំជឿថា គម្រោងនេះនឹងចូលរួមចំណែកដល់ការពង្រឹងអំណាចសេដ្ឋកិច្ច និងជីវភាពរស់នៅប្រជាពលរដ្ឋនៅតំបន់ជនបទ»។
លទ្ធផលរំពឹងទុកសំខាន់ៗពីគម្រោងនេះគឺគំរូអាជីវកម្ម និងដំណោះស្រាយបច្ចេកវិទ្យាត្រូវបានរៀបចំ និងលើកកម្ពស់ និងពង្រឹងសមត្ថភាពរបស់អ្នកផ្តល់បច្ចេកវិទ្យាថាមពលសូឡាក្នុងតំបន់ ព្រមទាំងគោលដៅសហគ្រាសខ្នាតតូចបំផុត តូច និងមធ្យម និងអ្នកប្រើប្រាស់ជាច្រើនបានបង្កើនចំណេះ និងទទួលបានឧបករណ៍ថាមពលសូឡា។
គម្រោងដែលផ្តល់ថវិកាដោយសហគមន៍អឺរ៉ុបទី ២ គឺ «ការលើកកម្ពស់ការអនុវត្តថាមពលប្រកបដោយនិរន្តរភាពក្នុងវិស័យកាត់ដេរនៅកម្ពុជា» ដែលគម្រោងនេះនឹងលើកកម្ពស់ការអនុវត្តថាមពលស្អាត រួមទាំងប្រសិទ្ធភាពថាមពល ប៉ុន្តែគម្រោងនេះក៏លើកកម្ពស់ប្រសិទ្ធភាពថាមពលសូឡាលើដំបូលផ្ទះ និងថាមពលដុតអុសផងដែរ។
លោកស្រី Karolien Casaer-Diez តំណាងប្រចាំប្រទេសកម្ពុជានៃអង្គការ GGGI បានអះអាងថា គម្រោងម៉ូដែលសេដ្ឋកិច្ចរបស់ GGGI ដែលបង្កើនប្រសិទ្ធភាពថាមពល ២០ ភាគរយនៅក្នុងវិស័យកាត់ដេរនឹងនាំឲ្យមានការកើនឡើង ៣១ ភាគរយ នៃផលិតភាពថាមពលនៅឆ្នាំ ២០៣០ និងចៀសវាងចំណាយលើថាមពល ២ ពាន់លានដុល្លារ។
លោកស្រី Carmen Moreno ឯកអគ្គរដ្ឋទូតសហភាពអឺរ៉ុបបាននិយាយថា៖ «ខ្ញុំរីករាយដែលសហភាពអឺរ៉ុបបានចូលរួមគម្រោងទាំងនេះចំពោះភាពប្រសើរឡើងនៃសេដ្ឋកិច្ចបៃតង និងអាជីវកម្មជនបទក្នុងខេត្តជុំវិញបឹងទន្លេសាប រួមបញ្ជូលទាំងវិស័យកាត់ដេរដែលរងផលប៉ះពាល់ពីជំងឺកូវីដ ១៩»៕ LA