.jpg)
ភ្នំពេញៈ ក្រសួងអប់រំ យុវជន និងកីឡា កាលពីថ្ងៃសុក្រសប្តាហ៍មុនបានរៀបចំសិក្ខាសាលាមួយក្នុងគោលបំណងជំរុញសហគ្រិនភាពក្នុងចំណោមយុវជន ដើម្បីបំផុសគំនិតពួកគេឲ្យយល់ដឹងពីសហគ្រិនភាព និងការកំណត់គោលដៅសម្រាប់ជីវិតនៅពេលអនាគត។
សិក្ខាសាលាស្តីពី «សហគ្រិននៅកម្ពុជា» ត្រូវបានរៀបចំឡើងនៅគ្រប់មន្ទីរអប់រំ យុវជន និងកីឡាទាំង ២៥ រាជធានីខេត្ត ដោយរួមសហការដោយអង្គការអន្តរជាតិនៃការងារ (ILO) និងអង្គការ United Nations Volunteers (UNV)។
នៅក្នុងសិក្ខាសាលានេះ មានការចាក់បញ្ចាំងវីដេអូខ្លីៗស្តីពីបទពិសោធធ្វើជំនួញ និងផែនការជីវិតដល់អ្នកចូលរួម ហើយក្រោយមក យុវជនបានពិភាក្សាដេញដោលគ្នាទាក់ទងនឹងខ្លឹមសារវីដេអូទាំងនោះ។
អ្នកស្រី ស៊ូ សុជាតា អ្នកសម្របសម្រួលគម្រោងរបស់អង្គការអន្តរជាតិនៃការងារ បានឲ្យដឹងថា សិក្ខាសាលាលើកដំបូងនេះ បានដើរតួនាទីយ៉ាងសំខាន់ក្នុងការជួយតម្រង់ទិសយុវជនខ្មែរពីគ្រប់មជ្ឈដ្ឋានដែលបានចូលរួមស្តាប់ និងពិភាក្សាគ្នា ដើម្បីរៀនសូត្រពីការរៀបចំផែនការអនាគតរបស់ខ្លួន។
អ្នកស្រីមានប្រសាសន៍ថា៖ «សិក្ខាសាលានេះបើកឱកាសឲ្យយុវជន ទាំងក្នុងសាលា និងក្រៅសាលាបានពិភាក្សាគ្នាលើប្រធានបទមួយចំនួនដូចជា តើអ្វីទៅជាសហគ្រិនភាព? តើអ្វីខ្លះជាសក្តានុពលដែលខ្លួនមានពីកំណើត? តើការងារបែបណាដែលស័ក្តិសមសម្រាប់ខ្លួន? តើត្រូវរៀបចំខ្លួនបែបណាដើម្បីអាចក្លាយជាសហគ្រិននាពេលអនាគត?»។
ប៉ុន្តែអ្នកស្រីបានសង្កេតឃើញថា ហាក់មិនសូវមានការចូលរួមពីយុវជនក្រៅសាលាឡើយ ដែលអាចបណ្តាល មកពីការផ្សព្វផ្សាយមិនបានទូលំទូលាយ ឬទីតាំងសិក្ខាសាលាស្ថិតនៅឆ្ងាយពីអ្នកទាំងនោះ។
អ្នកស្រីថ្លែងថា៖ «តាមផែនការយើងចង់ឲ្យមានការចូលរួមពីអ្នកនៅក្រៅសាលាឲ្យបានច្រើន ដើម្បីបណ្តុះគំនិតពួកគេឲ្យមានភាពជាសហគ្រិន ឬចាប់យកជំនាញណាមួយច្បាស់លាស់សម្រាប់ជីវិត»។
លោក តាំង សុផាណារ័ត្ន ប្រធាននាយកដ្ឋានគ្រប់គ្រងមជ្ឈមណ្ឌលយុវជន នៃក្រសួងអប់រំ យុវជន និងកីឡា បានប្រាប់ថា សិក្ខាសាលានេះបានផ្តល់ជាគំនិតឲ្យយុវជនចេះបង្កើតមុខរបរដោយខ្លួនឯង មានបំណិនជីវិត ដោយមិនរំពឹងតែលើការធ្វើការងារឲ្យគេនោះទេ។ ការបណ្តុះគំនិតជាមុនស្តីពីសហគ្រិនភាព នឹងធ្វើឲ្យយុវជនងាយទទួលបានជោគជ័យនៅពេលបញ្ចប់ការសិក្សា។
លោកបន្តថា៖ «យើងចង់ឲ្យយុវជនខ្មែរចេះបង្កើតមុខរបរដោយខ្លួនឯង ទៅតាមសក្តានុពលដែលខ្លួនមាន»។
កញ្ញា ស៊ីង យ៉ុងឈីង សិស្សថ្នាក់ទី ១១ នៃវិទ្យាល័យជម្ពូវ័ននៅក្រុងភ្នំពេញដែលបានចូលរួមក្នុងសិក្ខាសាលានេះបានថ្លែងថា នេះជាការផ្ទេរបទពិសោធល្អៗពីអ្នកទទួលជោគជ័យក្នុងនាមជាសហគ្រិន និងអ្នកដឹកនាំតាមក្រុមហ៊ុនមួយចំនួនដល់យុវជនជំនាន់ក្រោយ។
កញ្ញា យ៉ុងឈីង បានបញ្ជាក់ថា៖ «សហគ្រិនភាពជោគជ័យគឺជាអ្វីដែលខ្ញុំចង់ដឹង ចង់ឮ ព្រោះនៅពេលអនាគតខ្ញុំក៏ចង់ក្លាយជាអ្នកជោគជ័យក្នុងការងារឌីហ្សាញដែរ»។
យុវសិស្សថ្នាក់ទី ១២ នៃវិទ្យាល័យវត្តភ្នំ លោក ឡាយ សុភ័ក្រ្តា បានប្រាប់ថា បច្ចុប្បន្នមានយុវជនមួយចំនួនកំពុងសប្បាយភ្លេចខ្លួន ដោយមិនបានគិតគូរពីមុខជំនាញ ឬអាជីពសម្រាប់ថ្ងៃអនាគតទេ។
យុវសិស្សរូបនេះបានថ្លែងថា សិក្ខាសាលានេះបានជួយលើកទឹកចិត្តដល់យុវជនដែលប្រឡងធ្លាក់ឲ្យមានភាពរឹងមាំ និងគិតពីការបង្កើតមុខរបរផងដែរ៕ LA
